1Psalmo le Asafoske.
O Del! le thema streia dine ande so si tjiro,
Von rimosarde tjiro svinto templo,
Von kerde katar o Jerusalem jekh kotor bařengo.
2Von dine le staturi tjire slugenge
Te xan len le čiriklia le čereske,
O mas tjire čačenge ka le žigeni la phuviake;
3Von dine muial lengo rat sar o pai
Sa krugom o Jerusalem.
Ai nai khonik te angropon len.
4Ame aresliam jekh lažiav sa amare vortačonge,
Asaimaske ai prasaimaske kudalenge kai si krugom amendar.
5Ži kana, Baro Del! xoliavos tu bi te terdios,
Ai ke tjiri xoli phabol sar jekh jag?
6De tjiri xoli pe le thema kai či žianen tu,
Ai pe le amperatsi kai či akharen tjiro anav!
7Ke xale o Jakob,
Ai phaglias lesko kher kai bešelas.
8Na mai de tu godji ka amare bezexa kai nakhle!
Ke tjire lašimata t'aven sigo angla amende!
Ke amenge si but čořimos.
9Ažutisar ame, o Del amare skipimosko, pala o vestimos tjire anavesko!
Skipisar ame, ai jertisar amare bezexa, pala tjiro anav!
10Sostar le thema phenena von: Kai lengo Del?
Te žianas, angla amende, maškar le thema,
Ke tu te keres te pokjinen o rat tjire slugengo, o rat dino muial!
11Ke le vatimata le phanglenge t'aven ži tute!
Katar tjiro vast te skipil kudalen kai xasavon!
12De ka amare vortača eftavar ande pengo brek
Le lažiave kai von kerde, Baria!
13Ai ame, tjiro narodo, e bakroře tjira čariako,
Ame vestisaras tu pe sakda;
Vitsa vitsatar ame phenas tjire luvudimata.
