1Gjili le Asafoske.
Muřo narodo, ašun muře sikiarimata!
Tho kan ka le vorbi muře moske!
2Me putrava muřo mui godiaver vorbasa,
Me phenav e godji anda e vramia purani.
3So ame ašundiam, so ame žianas,
So amare dada phende amenge,
4Ame či garavasa le angla amare glati;
Ame phenasa ka e vitsa kai avela le luvudimata katar o Baro Del,
Ai leski zor, ai le čudeni dieli kai kerdias.
5Vo thodias jekh marturo ande o Jakob,
Vo thodias jekh zakono ande o Israel,
Ai vo dias ordina ka amare dada te sikiaren le ka penge glati.
6Te žianel le e vitsa kai avela,
Ka le glati kai arakhadiona,
Ai ke, kana avena bare, von dena duma penge glatenge,
7Eta te thon ande o Del pengo patiamos,
Ke te na bustren le butia le Devleske,
Ai te len opre leske poronki,
8Eta te na aven, sar lenge dada,
Jekh vitsa kai či ninkerel ai buntuil pe,
Jekh vitsa kai lesko ilo nai phandado,
Ai kai o duxo nai čačo ka o Del.
9Le šiave katar o Efraim, armime ai tsirdel e sulitsa,
Ambolde o dumo o dies le marimasko.
10Von či garade e patia le Devleski,
Ai von či kamle te phiren sar si o zakono.
11Von thode te bustren leske butia,
Leske šukarimata kai vo sikadias lenge.
12Angla lenge dada vo kerdias čudeni,
Ande o them o Egipto, ande o than katar o Zoan.
13So šindias e maria ai puterdias lenge te nakhen,
Vo kerdias te ušten le paia sar jekh zido.
14Vo ningerelas le diese katar o nuvero,
Ai sa e riat katar jekh jag kai strefial.
15Vo šindias le bař ande e pusta,
Ai dias te pen but sar o pai;
16Anda o bař kerdias t'anklel paiořa,
Ai vulen le paia sar le bare paia.
17Numa von mai kerde bezexa pe leste,
Te buntuin-pe pe o Mai Vučo ande e pusta.
18Von rimosarde le Devles ande pengo ilo,
Ai mangle xamos sar len kerel veseli.
19Von dine duma sar o Del,
Von phende: O Del šai daštil vo
Te thol jekh skafidi ande e pusta?
20Eta, vo maladias o bař, ai paia pitian,
Ai paia buvlile;
Šai del vo vi manřo,
Vai te del mas ka pesko narodo?
21O Baro Del ašundias, ai vo xoliailo;
Jekh jag phabol pe o Jakob,
Ai e xoli uštili pe o Israel,
22Ke von či patian ande o Del,
Ke von či gindin ke šai ažutil le.
23Vo porunčilas pe le nuveria opre,
Ai vo puterdias le vudara le tserenge;
24Delas pe lende o brišin la manako te xan,
Vo dias le o gjiv anda o čeri.
25Von xale sa o manřo le barengo,
Vo tradias lenge xamos te čailion.
26Vo kerdias te phurdel ande le čeri e balval anda e rig čači,
Ai andias katar peski zor e balval anda e rig tele;
27Vo kerdias te perel pe lende o mas sar e kišai,
Ai sar e kišai la mariake le čiriklia;
28Vo kerdias te peren maškar lengo kimpo,
Sa krugom katar bešen.
29Von xale ai čailile but:
O Del dias le so von mangle.
30Von nas čaile sar von kamen,
Len sas le inke o xamos ande o mui,
31Kana e xoli le Devleski uštili pe lende;
Vo maladias merimasa le mai zuralen,
Vo peradias le terne muršen anda o Israel.
32Makar sa kudia, von mai keren bezexa,
Ai von či patian so vo kerdias.
33Vo phabarel lenge diesa barimatasa,
Ai lenge berša te geton pe sigo.
34Kana vo malavela le merimasa, von rodena les,
Von avenas ai amboldenas pe karing o Del;
35Von denas pe godji ke o Del sas lengo bař,
Ke o Del Mai Vučo sas lengo skipitori.
36Numa von šibinas les katar o mui,
Ai von xoxavenas les la šibasa;
37Lengo ilo nas ninkerdo karing leste,
Ai von nas čače ka leski patia.
38Numa, ande peski mila, vo jertisardias e bezex ai či phařadias
Vo ninkerdias butivar peski xoli ai či dias la sa.
39Vo delas pe godji ke von si ferdi mas,
Jekh haburo kai žialtar ai či mai avel.
40Sodivar von buntuisaile pe leste ande e pusta!
Sodivar von rimosaile kana sas korkořo!
41Von či ašile te zumaven le Devles,
Ai te amin pe ka o Svinto anda o Israel.
42Von či denas pe godji ka leski zor,
O dies kai ankaladias le katar o dušmano,
43Le čudeni kai vo kerdias ande e Egipta,
Ai le šodo dieli ande o than biplaiesko katar o Zoan.
44Vo pařudias lenge paia ratesa,
Ai von naštinas te pen le paia.
45Vo tradias pe lende mačia venime te xan le.
Ai braški te phařaven le.
46Vo dias lenge gjiva ka le grastoře,
Lengi butji ka le grastoře.
47Vo kerdias te xasavon lenge reza katar e babitsa,
Ai lenge sikomururi katar o paxome.
48Vo muklias lenge žigeni ka e babitsa,
Ai lenge žigeni ka e jag le čereski.
49Vo tradias pe lende peski xoli phabardi,
Peski xoli phabardi ai o nekazo,
Jekh trupa andželi čořimaski.
50Vo muklias sa peski xoli te žial,
Vo či skipisardias lengo duxo katar o merimos,
Vo dias lengo traio te merel;
51Vo maladias sa le mai anglune arakhade anda e Egipta,
Le mai anglune zora tela le tseři katar o Xam.
52Vo kerdias te žialtar lesko narodo sar le bakriořa,
Vo ningerdias le sar jekh trupa ande e pusta.
53Vo ningerdias le mišto, t'aven bi darako,
Ai e maria tasadias lenge dušmanon.
54Vo ningerdias le karing e granitsa svinto,
Karing kudo plai kai lesko čačo bias.
55Vo tradias angla peske le thema,
Dias le o them t'avel lengo,
Ai kerdias te bešen ande penge tseři le kumpani anda o Israel.
56Numa von gele pe o Del Mai Vučo ai buntuisaile pe leste,
Ai von či line sama leski ordini.
57Von duraile ai či patian, sar lenge dada,
Von ambolden, sar jekh sulitsa bangi.
58Von xoliarde les katar penge rimome thana,
Ai xoliarde le katar penge vobrazuri.
59O Del ašundias, ai lias les e xoli;
Vo spidias zurales o Israel.
60Vo muklias o than kai bešelas ande o Šilo,
E tseřa kai bešelas maškar le manuš;
61Vo dias pesko vestimos ka o phanglimos,
Ai peski amperetsia ande le vast le dušmanosko.
62Vo thodias peske narodos tela e xanřo,
Ai vo xoliailo pe so si lesko.
63O jag xalia lenge terne muršen,
Ai lenge šeia pativalia nas vestime;
64Lenge raša pele tela e xanřo,
Ai lenge phivlia či mai roven.
65O Baro uštel sar kudo kai suto,
Sar jekh harniko kai tasulo ande mol.
66Vo maladias peske dušmanon kai našenas,
Vo thodias pe lende jekh lažiav pe sakda.
67Numa vo šiudias e tseřa katar o Josef,
Ai vo či alosardias e kumpania katar o Efraim;
68Vo alosardias e kumpania anda o Juda,
O plai o Sion kai vo kamel.
69Ai vo thodias pesko svinto than sar le thana vazdine,
Sar e phuv kai vo kerdias pe sakda.
70Vo alosardias o David sar peski sluga,
Ai vo ankaladias avri katar e stala le bakriangi;
71Vo lias les palal katar le bakriořa kai penas thud,
Te čailiarel le Jakobos, lesko narodo,
Ai o Israel, so si lesko.
72Ai o David ningerdias le jekhe ilesa intrego,
Ai vo ningerdias len le vastensa godiaver.
