Psalmo 80

₂Tho o kan, Pastuřo anda o Israel,

Tu kai trades sar le bakre le Josefos!

Sikadio ande tjiro šukarimos,

Tu kai bešes opral le xeruburi!

₃Angla o Efraim, Beniamin ai Manase, uštiav tjiri zor,

Ai aidi t'ažutis ame!

₄O Del, uštiav ame!

Ker te strefial tjiri fatsa, ai ame avasa skipime!

₅Baro Del, o Del le řaioske zurale,

Ži kana xoliasa tu pe o řudjimos tjire narodosko?

₆Tu pravares le jekhe manřesa asvensa,

Tu des le te pen asva bi mesurako.

₇Tu keres anda amende jekh diela kai kerel te maren mui amendar amare vortača,

Ai amare dušmaia asan amendar.

₈O Del le řaioske zurale, uštiav ame!

Ker te strefial tjiri fatsa, ai ame avasa skipime!

₉Tu ankaladianas anda e Egipta jekh rez;

Tu dian avri le themen, ai tu thodian les.

₁₀Tu lašiardian angla lende:

Voi šiudias vuni ai pherdias e phuv;

₁₁Le plaia sas garade katar lenge ušialina,

Ai lake patria sas sar le tsedruri le Devleske;

₁₂Lake patria asbanas e maria,

Ai lake tsinoře ži ka o pai.

₁₃Sostar tu phařadian lake baria,

Kadia ke kon nakhel len la?

₁₄O balo sirbato le vešesko xal la,

Ai le žigeni le kimponge xan andre.

₁₅Del le řaioske zurale, aidi!

Dikh opral anda le čeri, ai dikh! le sama kadia rez!

₁₆Le sama so tjiro čačo vast thodias,

Ai o šiav kai tu alosardian!

₁₇Voi si phabardi katar e jag, voi si šindi!

Von xasavon angla tjiri fatsa darani.

₁₈Ke tjiro vast t'avel pe o manuš pe tjiri rig čači,

Pe o šiav le manušesko kai tu alosardian tuke!

₁₉Ai ame či mai duriuvasa tutar.

Ker ame te mai traisaras, ai ame mangasa tjiro anav.

₂₀Baro Del, Del le řaioske zurale, uštiav ame!

Ker te strefial tjiri fatsa, ai ame avasa skipime.