Psalmo 109

Del muře řudjimasko, na aš!

₂Ke von putren pe mande jekh mui nasul ai xoxamno,

Von den duma mansa jekha šibasa xoxamni,

₃Von terdion krugom ma divanonsa vuřitsime

Ai von keren pe mande marimos bi došako.

₄Žikin me kamav le, von si muře dušmaia;

Numa me našav ka o řudjimos.

₅Pala o mištimos von keren pe mande nasulimos,

Ai vuřitsimos pala muřo kamimos.

₆Tho le tela o vast jekhe nasulesko,

Ai kai jekh kai thol doš te ninkerel-pe pe leski rig čači!

₇Kana dena les kris, te phenen ke si došalo,

Ai ke lesko řudjimos te nakhel sar t'avel došalo!

₈Ke leski diesa t'aven tsiřa,

Ke jekh kaver te lel so si les!

₉Ke leske šiave t'aresen baiastruki,

Ai leski řomni phivli!

₁₀Ke leske šiave t'aven šiudine ai te mangen,

Ke von te roden manřo dur katar lenge khera phage!

₁₁Ke kudo kai del vužile lel sogodi si lesko,

Ai ke le streia čoren sogodi vo nirisardias!

₁₂Ke khonik te na kamel les,

Ai ke khonik te na avel leske mila anda leske baiastruki!

₁₃Ke leske vitsi t'aven bilade,

Ai ke te lengo anav te bilal ande e vitsa kai avela!

₁₄Ke e bezex leske dadengi te bešel angla o Baro Del

Ai ke e bezex leska daki te na avel khosli!

₁₅Ke t'aven sakda angla o Baro Del,

Ai ke te lel pa e phuv lengi godji,

₁₆Ke vo či dias pe godji t'avel miloso,

Ke vo mardias le čořes ai le prostos,

Žikin či mudardias le manušes kai sas lesko ilo šindo!

₁₇Leske sas drago e armai: te perel pe leste!

Leske nas drago o svintsimos: te duriol lestar!

₁₈Ke te thol pe peste e armai sar tsolo,

Ke te del sar o pai ande leste,

Sar o vuloi ande leske kokala!

₁₉Te avel pe leste tsolo te garavel les,

Praštia t'avel sakda phanglo!

₂₀Kadia si, katar e partia le Bare Devleski, o pokjinimos muře dušmanongo,

Ai kudala kai den duma nasul pa mande!

₂₁Ai tu, Baro Del, Baria! ker pe muři pala tjiro anav,

Ke tjiro mištimos si baro; skipisar ma!

₂₂Me sim čořo ai prosto,

Ai muřo ilo si řanime ande mande.

₂₃Me žiavtar sar e ušialin kai perel,

Me sim tradino sar o grastořo.

₂₄Muře čanga kovlile katar o posto,

Ai muřo stato tsino lo katar o slabomos.

₂₅Me sim lenge jekh prasaimasko;

Von dikhen pe mande, ai miškin o šero.

₂₆Ažutisar ma, Baro Del, muřo Del!

Skipisar ma pala tjiro mištimos!

₂₇Ai ke te žianen ke si tjiro vast,

Ke tu san, Baro Del, kai kerdian!

₂₈Te von den armaia, tu svintsos;

Te von uštena, von avena tele,

Ai tjiri sluga veselila pe.

₂₉Ke muře dušmaia t'avel pe lende o lažiav,

Ke t'avel pe lende o lažiav sar jekh bunda!

₃₀Me luvudiva anda muřo mui zurales le Bare Devles

Me vestiva les maškar le but manuša;

₃₁Ke vo bešel pe o čačo le čořesko,

Te skipil le katar kudala kai thonas pe lende doš.