1Gjili. Psalmo le Davidoske.
2Muřo ilo lo zuralo, o Del!
Me gjilabava, me kerava te bašen muře
strumenturia: si muřo vestimos!
3ušten, muřo luto ai muři tsitura!
Me uštiavava o dies.
4Me luvudiva tut maškar le naroduri,
Me gjilabava tu maškar le thema.
5Ke tjiro mištimos ušten mai opre le čeri,
Ai tjiro čačimos ži ka le nuveria.
6Ušti pe le čeri, o Del!
Ai ke tjiro vestimos t'avel pe sa e phuv!
7Eta ke kudala kai si tuke drago t'aven skipime,
Skipime katar tjiro čačo, ai ker pe amari!
8O Del phenel ande pesko svintsimos: Me niriva,
Me hulavava o Šexem, me hulavava e dolina o Sukot;
9Mande o Gilead, mande o Manase;
Efraim si kai garavel muřo šero,
Ai o Juda muři řai amperetisko;
10O Moab si o tazo kai xalavav ma;
Me thov muři papuka pe o Edom;
Me phurdav tsipimata veseli pe o them katar le Filistanuri!
11Kon ningerela ma ande o foro zuralo?
Kon ningerela ma ande o Edom?
12Nai tu, o Del, kai dian ame palpale,
Ai kai či mai anklelas avri, o Del, amare armiansa?
13De ame te skipisavas katar e dar!
O skipimos katar o manuš si intaino.
14Le Devlesa, ame kerasa bare dieli;
Vo inčarela amare dušmanon.
