1Luvudin le Bare Devles!
Luvudin le Bare Devles, ke vo ai lašio,
Ke leski mila žial pe sakda!
2Kon phenela le bare butia le Bare Devleske!
Kon phenela sa lesko luvudimos?
3Veseli kudala kai len sama o zakono,
Kai keren e kris sa e vramia!
4Baro Del, de tu godji mande ande tjiro mištimos tjire narodoske!
De tu godji mande kana des le te skipin pe,
5Eta te dikhav e dragostia kai tu alosardian,
Ke te veseli ma katar o veselimos tjire narodosko,
Ai ke te vestiv ma so si tutar!
6Ame kerdian bezexa san amare dada,
Ame kerdiam o bezex, ame kerdiam o nasul.
7Amare dada ande e Egipta či line sama tjire čudeni,
Von či dine pe godji ka tjire but šukarimata,
Von buntuisaile paša e maria, paša e Maria e Loli.
8Numa vo skipisardias le pala lesko anav,
Te sikavel peski zor.
9Vo daradias la Maria e Loli, ai voi šukjili;
Ai vo kerdias te phiren maškar le uni sar ande e pusta.
10Vo skipisardias le anda o vast kudalesko kai vuřitsilas le,
Vo skipisardias le anda o vast le dušmanosko.
11Le paia ušiarade lenge dušmanon:
Či ašilo či jekh.
12Ai von pataile leske vorbi,
Von gjilabade leske luvudimata.
13Numa von sigo busterde leske butia,
Von či ažiukerde te kerel so vo kamel.
14Von kamle aver diela ande e pusta,
Ai von zumade le Devles korkořo.
15Vo dias len so von mangle;
Porme tradias o xasarimos ande lengo stato.
16Von sikade pe, ande e vatra, xoliariko pe o Moše,
Pe o Aron, o svinto katar o Baro Del.
17E phuv puterdili ai lias o Datan,
Ai voi phandadili pe e trupa katar o Abiram;
18E jag lias lengi trupa,
E pařa biladias le nasulen.
19Von kerde jekh vitselo ande o Horeb,
Von dine čanga angla jekh vobrazo čugunosko,
20Vo pařude pengo vestimos
Pe o stato jekhe guruvesko kai xal e čar.
21Von busterde le Devles, lengo skipitori,
Kai kerdias bare dieli ande e Egipta,
22Čudeni ande o them o Xam,
Šodo pe e Maria e Loli.
23Ai vo delas duma te bilavel le;
Numa o Moše, lesko alome, ninkerdilo pe leste,
Te del rigate leski xoli ai te na mukel les te phařavel len.
24Lenge nas lašio o them guglo;
Ai von či patian e vorba le Bare Devleski,
25Von bulguin ande penge tseři,
Von či patian lesko hango.
26Ai vo vazdel o vast te solaxal
Te peravel le ande e pusta,
27Te peravel lengi vitsa maškar le thema,
Ai te puřitsil le maškar o them.
28Von astardile ka o Bal-Peor,
Ai von xale so si šinado le mulenge.
29Von xoliarde le Bare Devles katar so vo kerde,
Ai jekh nasvalimos avilo maškar lende.
30O Pinhas uštilo t'ašiavel,
Ai o nasvalimos terdilo;
31Kodia sas thodine pe lende kris,
Vitsa vitsatar pe sakda.
32Von xoliarde le Bare Devles paša le paia katar o Meriba;
Ai o Moše sas malado pala lende,
33Ke von diliarde lesko duxo,
Ai vo dias duma lokořes anda le vuš.
34Von či mudarde le narodon
Kai o Baro Del phendias lenge te mudaren.
35Von thode pe maškar le thema,
Ai von sikile lenge butia.
36Von služisarde lenge xoxamne dela,
Kai sas lenge jekh kletka;
37Von dine penge šiaven
Ai penge šeian ka le xoxamne dela,
38Von dine muial o rat kai nai došalo,
O rat penge šiavengo ai penge šeiango,
Kai von dine ka le xoxamne dela, anda o Kanan,
Ai o them sas mahrime katar le merimata.
39Von marisarde le katar penge butia,
Von kurvisaile pala penge dieli.
40E xoli le Bare Devleski phabuli pe pesko narodo,
Ai vo vuřitsisardias so sas lesko.
41Vo dias le ande le vast le themengo;
Kudala kai vuřitsinas le sas bare pe lende;
42Lenge dušmaia mesainas pe lende,
Ai von sas dine pe o lažiav tela lengi zor.
43Butivar vo skipisardias le;
Numa von sikadile buntuimasa ande so vo kamen te keren,
Ai von aresenas čoře katar pengi bezex.
44Vo dikhlias lengo nekazo,
Kana ašundias lenge roimata.
45Vo dias pe godji mištimasa ka peski patia;
Lias les e mila sar si lesko baro mištimos,
46Ai vo vazdias lenge e mila
Katar sa kudala kai ninkerenas le phangle.
47Skipisar ame, Baro Del, amaro Del!
Ai kjide ame maškar le thema,
Eta ame te vestisaras tjiro svinto anav,
Ai ke ame te thas amaro vestimos te luvudisaras tu!
48Svintsime t'avel o Baro Del, o Del anda o Israel,
Vitsa, vitsatar!
Ai ke sa o narodo te phenen: amen!
Luvudin le Bare Devles.
PANŽTO KLIŠKA
