1Luvudin le Bare Devles, akharen lesko anav!
Keren te žianel maškar le naroduri leske bare dieli!
2Gjilaben, gjilaben ande leski pativ!
Den duma pa sa leske šukarimata!
3Vestin tume ande lesko svinto anav!
Ke o ilo kudalengo kai roden le Bare Devles veselil pe!
4Akharen le Bare Devles ai ka leski zor, Roden sakda leski fatsa!
5Den tume godji sogodi vo kerdias,
Ka leske čudeni ai ka le krisa anda lesko mui,
6Vitsa katar o Abraham, leski sluga,
Šiave katar o Jakob, leske alome!
7O Baro Del si amaro Del;
Leske krisa si pe sa e phuv.
8Voi del pe godji sakda ka leski patia,
So vo phendias lenge pe jekh mia vitsi,
9E patia kai vo kerdias le Abrahamosa,
Ai e solax kai vo kerdias ka o Jakob;
10Vo thodias le Jakoboske jekh zakono,
Pe o Israel jekh patia pe sakda,
11Phendias: Me dava tu o them o Kanan Sar te perel tuke.
12Von sas atunči tsiřa
Tsiřa but, ai streia ande o them,
13Ai von žianas them-themestar
Ai anda jekh them karing jekh kaver narodo;
14Numa či muklias khanikas te maren le,
Ai vo mardias amperaton pala lende:
15Na asban muře svintson,
Ai na keren nasul pe muře profeturia!
16Vo akhardias pe o them e bokh,
Vo šindias lendar sogodi trubul le.
17Vo tradias angla lende jekh manuš:
O Josef sas bikjindo sar řobo.
18Phangle leske punře ande le šele,
Thode les ande le sastria,
19Ži ande e vramia kai areslias so vo phendias,
Ai kai o vorba le Bare Devleski zumadias les.
20O amperato lias tele leske phandimata,
O baro le narodongo skipisardias les.
21Vo thodias les baro pe pesko kher,
Ai o vlado pe sa pesko kher,
22Eta te kerel sar vo kamel te phandel le prinson,
Ai te sikiarel e godji le phuren.
23Atunči, o Israel avilo ande e Egipta,
Ai o Jakob bešlo ande o them o Xam.
24Vo kerdias te butiol lesko narodo,
Ai mai zuralo sar peske dušmaia.
25Vo pařudias lengo ilo, kadia te vuřitsin peske narodos
Ai ke von kerde anda penge služi žungalimasa
26Vo tradias le Moše, leski sluga,
Ai o Aron, kai vo alosardias.
27Von kerde katar leski putiaria šodo dieli maškar lende,
Von kerde čudeni ande o them o Xam.
28Vo tradias le tuniariči ai andias o kalimos,
Ai von či buntuisaile pe leski vorba.
29Vo pařudias lenge paia ratesa,
Ai vo kerdias te meren lenge mašie.
30Le braški sas ande o them sar le kiria,
Zi ande le sobi lenge amperatonge.
31Vo phenel, ai avile le mačia votrime,
Le žiuva pe sa e phuv.
32Vo dias babitsa ande o than brišindesko,
Paři jagake ande lengo them.
33Vo maladias lenge reza ai lenge figi,
Ai phařadias le kopačia pe lenge riga.
34Vo phenel, ai avile le grastoře,
Grastoře bi gjinde,
35Kai xale sa e čar le themeski,
Kai xale le fruti lenge kimponge.
36Vo maladias sa le mai angluni arakhade ande lengo them,
Sa le mai angluni anda lengi zor.
37Vo ankaladias peske narodos le rupesa ai le sunakasa,
Ai khonik či pelo maškar leske kumpani.
38Le Egiptanuri veselisaile kana geletar,
Ke e dar kai sas le lendar lias le.
39Vo thodias o nuvero te garavel le,
Ai e jag te strefial e riat.
40Sar von mangle, vo kerdias t'aven le čiriklia
Ai vo pravardias len le manřesa anda o čeri.
41Vo puterdias o bař, ai paia vuliste;
Von gele san jekh baro pai ande le thana šuke.
42Ke vo dias pe godji ka peski svinto vorba,
Ai katar o Abraham, leski sluga.
43Von ankaladias peske narodos veselimasa,
Leske alome maškar le tsipimata veseli.
44Vo dias len le phuvia le themenge,
Ai von line le fruti la butiake le narodonge,
45Eta t'arakhen leske ordini,
Ai ke te von len sama leske zakonuri.
Luvudin le Bare Devles!
