Jono 8

₁O Jesus gelo ka o plai le Maslinengo. ₂Numa, de diminiatsara, vo mai gelo ande o templo, ai sa o narodo avel leste. Bešlo tele, vo sikiarelas len. ₃Atunči le zakonaria ai le Farizianuri andine jekha žiuvlia lini sar kerel kurvetsia; ai thodine la maškar o narodo; ₄von phenen leske: Birevo, kadia žiuvli line la sar kerel kurvetsia. ₅O Moše, ande o Zakono, dias amen ordina te mudaras la bařensa kasave žiuvlian; tu kadia, so phenes tu? ₆Von phenenas kudia te zumaven les, eta te thon pe leste beda. Numa o Jesus, bangilo, ramolas pe e phuv le naiesa.

₇Sar von mai pušenas lestar, vo uštilo ai phenel lenge: Ke kudo anda tumende kai nai les bezex šiudel o mai angluno bař pe late. ₈Ai vo pale bangilo, vo ramolas pe e phuv. ₉Kana von ašunde kudia, von geletar jekh pala kaver, de katar o mai phuro ži ka o mai paluno; ai o Jesus bešlo korkořo la žiuvliasa kai sas kothe maškaral. ₁₀Atunči vo uštilo, ai dikhel ferdi la žiuvlia; o Jesus phenel lake: Žiuvlio, kai le kudala kai thon beda pe tute? Nai khonik te den tu strafo?

₁₁Voi del palpale: Niči, Baria. Ai o Jesus phenel lake: Či me či dav tu strafo; žia, ai na mai ker bezex.

₁₂O Jesus mai del lensa duma, ai phenel: Me sim e vedaria la lumiaki; kudo kai avel pala mande či phirela ande o tuniariko, numa avela les e vedaria le traioski.

₁₃Pe kodo, le Farizianuri phenen leske: Tu des duma pa tute; so tu phenes nai čačimos.

₁₄O Jesus del len palpale: Makar ke me dav duma pa mande, so me phenav si čačimos, ke me žianav katar me avav ai kai me žiav; numa tume, tume či žianen katar me avav ai kai me žiav. ₁₅Tume den kris sar si o mas; me či dav kris khanikas. ₁₆Ai me te dava kris, muři kris si čači, ke me či sim korkořo; numa o Dad kai tradias ma si mansa. ₁₇Si ramome ande tumaro Zakono ke e marturia katar dui manuš si čači. ₁₈Me phenav pa mande, ai o Dad kai tradias ma si marturo pa mande.

₁₉Von phenen leske kadia: Kai lo tjiro Dad?

O Jesus del len palpale: Tume či žianen man, či muře Dades. Te žianenas man tume, tume žianenas vi muře Dades.

₂₀O Jesus phenel kudala vorbi, sikiarelas ande o templo, ande o than kai si o mandjin; ai khonik či thodias o vast pe leste, ke lesko časo inke či avilo.

₂₁O Jesus phenel lenge: Me žiavtar, ai tume rodena ma, ai tume merena ande tumare bezexa; tume naštin t'aven kai me žiav.

₂₂Pe kudia le Židovuri phenen: Mudarela vo pes korkořo, ke vo phenel: Tume naštin t'aven kai me žiav?

₂₃Ai vo phenel lenge: Tume san telal; me, me sim opral. Tume san anda kadia lumia; me, me či sim anda kadia lumia. ₂₄Sa anda kudia me phenav tumenge ke tume merena ande tumare bezexa; ke tume či patian kon sim me, tume merena ande tumare bezexa.

₂₅Kon san tu? phenen leske von. O Jesus del len palpale: So me phenav tumenge de mai anglal. ₂₆Si ma but dieli te phenav pa tumende ai te dav tumen kris; numa kudo kai tradias ma si čačo, ai so me ašundem lestar, me phenav les la lumiake.

₂₇Von či hatiaren ke von del duma lensa pa o Dad. ₂₈O Jesus kadia phenel lenge: Kana tume vazdena opre le Šiaves le manušesko, atunči tume žianena kon sim me, ai ke me či kerav khanči anda mande, numa ke dav duma sar ke o Dad sikiardias ma. ₂₉Kudo kai tradias ma si mansa; ai vo či muklias ma korkořo, ke me kerav sakda so si leske drago.

₃₀Sar o Jesus delas duma kadia, but patian ande leste.

₃₁Ai vo phenel le Židovonge kai patian ande leste: Te bešena tume ande muři vorba, tume čačes san muře vortača. ₃₂Tume žianena o čačimos, ai o čačimos skipila tumen.

₃₃Von den les palpale: Ame sam anda e vitsa katar o Abraham, ai ame či samas šoha tela vast le kavrenge; sar phenes tu: Tume avena skipime?

₃₄Čačimasa, čačimasa, me phenav tumenge, mai phenel lenge o Jesus, kon-godi thol pe ka e bezex si řobo la bezexako. ₃₅Eta, o řobo či bešel sakda ande o kher; o šiav bešel sakda. ₃₆T'avel ke o Šiav skipil tumen, tume avena čačes slobodo. ₃₇Me žianav ke tume san katar e vitsa le Abrahamoski; numa tume roden te mudaren man, ke muři vorba či žial ande tumende. ₃₈Me phenav so me dikhlem ka muřo Dad; ai tume, tume keren so tume ašundian katar tumaro dad.

₃₉Von den les palpale: Amaro dad si o Abraham.

O Jesus phenel lenge: T'avilianas tume šiave katar o Abraham, tume kerdianas le butia katar o Abraham. ₄₀Numa akana tume roden te mudaren ma, me kai phendem tumenge o čačimos kai ašundem katar o Del. Kadia, o Abraham či kerdiasas. ₄₁Tume keren le butia tumare dadeske.

Von phenen leske: Ame či sam mastevi kai či prinžiaras amare daden; amen si ferdi jekh Dad, o Del.

₄₂O Jesus phenel lenge: Te avilinosas o Del tumaro Dad, tume sas te kamen man, ke me anda o Del anklistem ai ke me avav; me či avilem anda mande, numa vo tradias man. ₄₃Sar či hatiaren tume sar me dav duma? Ke tume naštin t'ašunen muři vorba. ₄₄Tumaro dad si o beng, ai tume kamen te keren so mangel tumaro dad. Vo sas kai mudarel de anda o gor, ai vo či kamel te ninkerel o čačimos, ke nai o čačimos ande leste. Kana vo phenel o xoxaimos, vo del duma anda peste; ke vo si o xoxamno ai o dad le xoxaimosko. ₄₅Ai me, sar ke me phenav o čačimos, tume či patian ma. ₄₆Kon anda tumende del duma ke me sim bezexalo? Te me phenava o čačimos, sostar či patian tume mande. ₄₇Kudo kai si anda o Del ašunel le vorbi le Devleske; tume či ašunen, ke tume či san anda o Del.

₄₈Le Židovuri dine les palpale: Nai amen čačimos ke phenas ke tu san jekh Samaritano, ai ke tut si tu jekh demono?

₄₉O Jesus mai del len palpale: Nai man demono; numa me dav pativ muře Dades, ai tume den ma pe o lažiav. ₅₀Me či rodav t'avav vestime; si jekh kai rodel kudia ai kai del kris. ₅₁Čačimasa, čačimasa, me phenav tumenge, te si varekon kai garavela muři vorba, vo či dikhela šoha o merimos.

₅₂Akana, phenen leske le Židovuri, ame prinžiaras ke tu si tu jekh demono. O Abraham mulo, vi le profeturi, ai tu phenes: T'avela varekon ke garavela muři vorba, či merela vo šoha. ₅₃San tu mai baro sar amaro dad o Abrahamo, kai mulo? Le profeturi vi von mule. Kon gindis ke tu san?

₅₄O Jesus del palpale: Te luvudiv ma me anda mande, muřo luvudimos nai khanči. Muřo Dad si kai luvudil ma, vo kai tume phenen ke si tumaro Del, ₅₅ai kai tume či žianen les. Me žianav les; ai, te phenava me ke či žianav les, me avava jekh fialo sar tumende, jekh xoxamno. Numa me žianav les, ai me arakhav leski vorba. ₅₆O Abraham, tumaro dad, isdrailo dragostar ke vo dikhela muřo dies. Vo dikhlias les, ai vo veselisailo.

₅₇Le Židovuri phenen leske: Tu inke či san panž-var-deše beršengo, ai tu dikhlian le Abraham!

₅₈O Jesus phenel lenge: Čačimasa, čačimasa, me phenav tumenge, mai anglal katar o Abraham t'avel, me simas.

₅₉Pe kudia, von line bař te šiuden le pe leste; numa o Jesus garadilo ai anklisto avri anda o templo.