Jono 7

₁Pala kudia, o Jesus phirel pe e Galilea, ke vo či kamelas te bešel ande e Judea, ke le Židovuri rodenas te mudaren les. ₂Eta, o prasniko le Židovongo, o prasniko katar o Tabernaklo, pašiol. ₃Ai leske phral phenen leske: Žiatar kathar, ai žia ande e Judea, eta ke te tjire vortača te dikhen vi von e butji kai tu keres. ₄Khonik či kerel garades, kana kamel te sikadiol: te keresa tu kudala dieli, sikav tu ka e lumia. ₅Ke či leske phral či patianas ande leste.

₆O Jesus phenel lenge: muři vramia inke či avili, numa tumari vramia si sakda gata. ₇E lumia naštil te vuřitsil tumen; me, voi vuřitsil ma, ke me phenav pa late ke lake butia si nasul. ₈Anklen, tume, ka kudo prasniko; me či ankliav, ke muři vramia inke nai gata. ₉Pala ke phendias lenge kudia, vo bešel ande e Galilea.

₁₀Kana leske phral ankliste ka o prasniko, vi vo anklisto, na angla o narodo, numa garades. ₁₁Le Židovuri rodenas les pe o prasniko, ai phenenas: Kai lo vo?

₁₂Sas ande o narodo baro buntuimos pala leste. Le jekh phenenas: Si jekh manuš lašio. Kaver phenenas: Niči, del rigate le buten. ₁₃Khonik či delas duma sar kamelas pa leste, daratar katar le Židovuri.

₁₄Karing o maškar le prasnikosko, o Jesus anklisto ka o templo. Ai vo sikiarelas. ₁₅Le Židovonge sas šodo, phenenas: Sar žianel vo kaiti, vo kai či sikilo?

₁₆O Jesus del len palpale: Muřo sikiarimos nai mandar, numa katar kudo kai tradias man. ₁₇Te si varekon kai kamel te kerel pe leske, vo žianela ke muřo sikiarimos si katar o Del, vai te dava duma anda mande. ₁₈Kudo kai del duma anda peste rodel pesko vestimos; numa kudo kai rodel o vestimos kudalesko kai tradias les, kudo si čačo, ai nai xoxaimos ande leste. ₁₉O Moše či dias tume o Zakono? Ai khonik anda tumende či kerel o Zakono. Sostar roden tume te mudaren ma?

₂₀O narodo del palpale: Ande tute si jekh duxo nasul. Kon rodel tut te mudarel tu?

₂₁O Jesus del len palpale: Me kerav jekh butji, ai tumenge si sa šodo. ₂₂O Moše dias tume t'aven šinde — na ke avel katar o Moše, ke kudia avel katar le phure — ai tume šinen jekhe manušes o dies o sabato. ₂₃T'avela ke jekh manuš lel o šinimos o dies o sabato, eta ke o Zakono katar o Moše te na avel busterdo, sostar xoliavon tume pe mande ke me sa sastiarav jekhe manušes o dies o sabato? ₂₄Na den pe kris sar dikhen, numa den kris pe sar si e kris.

₂₅Uni kai bešenas ande o Jerusalem phenenas: Nai vo kado kai rodenas te mudaren les? ₂₆Ai eta, vo del duma sar vo kamel, ai von či phenen leske khanči! Šai t'avel čačes ke le birevia prinžiarde ke vo si o Kristo? ₂₇Numa kado, ame žianas katar vo si; numa o Kristo, kana vo avela, khonik či žianel katar vo si.

₂₈Ai o Jesus, sikiarelas ande o templo, tsipilas: Tume žianen ma, ai tume žianen katar me sim! Me či avilem anda mande, numa kudo kai tradias ma si čačo, ai tume či žianen les. ₂₉Me, me žianav les; ke me avav lestar, ai vo tradias man.

₃₀Von kadia rodenas te len les, numa khonik či thodias o vast pe leste, ke lesko časo inke či avilo. ₃₁But anda o narodo patian ande leste, ai von phenenas: O Kristo, kana vo avela, kerela vo mai but čudeni sar kerel kado?

₃₂Le Farizianuri ašunde o narodo sar bulguin pa leste kudala dieli. Atunči le bare raša ai le Farizianuri tradine slugen te len les. ₃₃O Jesus phenel: Me mai sim tumensa pe tsiřa vramia, porme žiavtar karing kudo kai tradias ma. ₃₄Tume rodena ma ai tume či arakhena ma, ai tume naštin t'aven kothe kai me avava.

₃₅Pe kudia le Židovuri phenen maškar pende: Kai žiala vo, kai ame či arakhasa les? Žiala vo ka kudala kai si maškar le Grekuri, ai sikiarela vo le Grekon? ₃₆So si kudia vorba kai vo phendias: Tume rodena ma ai či arakhena ma, ai tume naštin t'aven kai me avava?

₃₇O mai paluno dies, o baro dies le prasnikosko, o Jesus, bešel pe punřende, tsipilas: Te si varekon trušalo, t'avel mande, ai te pel. ₃₈Kudo kai patial ande mande, bare paia živinde pitiana anda lesko peř, sar phenel o Ramomos. ₃₉Vo phenel ande kudia pa o Duxo kai trubul te len kudala kai patian ande leste; ke o Duxo nas inke dino, ke o Jesus nas inke vestime.

₄₀Žene anda o narodo, ašunenas kadale vorbi, phenenas: Kado si čačes o profeto.

₄₁Kaver phenenas: O Kristo si. Ai kaver phenenas: Šai t'avel mišto anda e Galilea kai avel o Kristo? ₄₂O Ramomos či phenel vo ke si katar e vitsa le Davidoski, ai anda o gav o Betlehem, kai sas o David, ke o Kristo trubul t'avel? ₄₃Sas kadia, pala leste, čingar ande o narodo. ₄₄Uni anda lende kamenas te len les, numa khonik či thodias o vast pe leste.

₄₅Kadia le služi gele palpale ka le bare raša ai le Farizianuri. Ai kudala phende lenge: Sostar tume či andian les?

₄₆Le služi den len palpale: Šoha manuš či dias duma sar kado manuš.

₄₇Le Farizianuri mai den len palpale: Nai ke vi tume, tume san diliarde. ₄₈Si varekon maškar le birevia vai maškar le Farizianuri kai patian ande leste? ₄₉Numa kado narodo kai či žianen o Zakono, si armandine!

₅₀O Nikodem, kai avilosas ka o Jesus, ai kai sas jekh anda lende, phenelas lenge: ₅₁Amaro zakono del vo strafo jekhe manušes mai anglal t'ašunel les ai te žianas so vo kerdias?

₅₂Von den les palpale: San vi tu Galileno? Le sama le Ramomata ai tu dikhesa ke anda e Galilea či anklel profeto. ₅₃Ai gele sa khere.