Jono 9

₁O Jesus nakhelas, dikhlias jekhe manušes kořes dekin arakhadilo. ₂Leske vortača pušen les kadia: Rabi, kon kerdias e bezex, kado manuš vai leske niamuri, t'arakhadilo vo kořo?

₃O Jesus del len palpale: Nai ke vo vai leske niamuri kerde bezex, numa ke te e butji le Devleski te sikadiol ande leste. ₄Trubul ame te keras, žikin si o dies, le butia kudaleske kai tradias man; e riat avel, kai khonik naštil te kerel butji. ₅Žikin me sim ande e lumia, me sim e vedaria la lumiaki.

₆Pala ke phendias kudia, vo čungardias pe e phuv, ai kerdias čik le čungaresa. Porme thodias čik pe le jakha le kořeske. ₇Ai vo phenel: Žia, ai xalav tu ka e xaing o Siloam (kudia bušol tradino). Vo gelo, xaladias pe, ai gelo palpale, dikhelas mišto.

₈Leske vortača ai kudala kai angla savořende žianenas les sar jekh čořo kai mangelas phenenas: Nai vo kado kai bešelas tele ai kai mangelas?

₉Uni phenenas: Vo si. Le kaver phenenas: Niči, numa miazol pe leste.

Ai vo inke phenelas: Me sim.

₁₀Von phenenas leske kadia: Sar tjire jakha puterdile?

₁₁Vo del palpale: O manuš kai akharen les Jesus kerdias čik, svintsisardias muře jakha, ai phendias mange: Žia ka e xaing o Siloe, ai xalav tu. Me gelem, ai me xaladem ma, ai me arakhlem o dikhimos.

₁₂Von phenen leske: Kai lo kudo manuš?

Vo del palpale: Me či žianav.

₁₃Von ningerde karing le Farizianuri kudales kai sas kořo. ₁₄Eta, sas jekh dies o sabato kai o Jesus kerdias e čik, ai puterdias leske jakha. ₁₅Mai jekh data, le Farizianuri vi von pušen lestar sar vo arakhadias te dikhel. Ai vo phenel lenge: Vo thodias čik pe muře jakha, me xaladem ma, ai me dikhlem.

₁₆Pe kudia uni anda le Farizianuri phenenas: Kudo manuš či avel katar o Del, ke vo či lel sama o sabato.

Kaver phenenas: Sar jekh manuš bezexalo šai kerel kasave čudeni? Ai sas hulaimos maškar lende.

₁₇Von mai phenen le kořeske: Tu, so phenes tu pa leste, sar vo puterdias tjire jakha?

Vo del palpale: Si jekh profeto.

₁₈Le Židovuri či patian ke vo sas kořo ai ke arakhadias te dikhel, žikin či andine leske dades ai leska da. ₁₉Ai von pušen lendar, phenenas: Si kado tumaro šiav, kai tume phenen ke arakhadilo kořo? Sar vo dikhel akana?

₂₀Von den palpale: Ame žianas ke vo si amaro šiav, ai ke vo arakhadilo kořo. ₂₁Numa sar vo dikhel akana, vai kon puterdias leske jakha, si ke ame či žianas. Pušen lestar, vo si peske beršengo, vo dela duma so si pa leste. ₂₂Lesko dad ai leski dai phenenas kadia ke von daranas katar le Židovuri; ke le Židovuri thode pe inke ande jekh than, t'avela varekon te prinžiaren le Jesus sar Kristo, avela šiudino anda e khangeri židovitsko. ₂₃Sa anda kudia leske niamuri phenenas: Si peske beršengo, pušen lestar.

₂₄Le Farizianuri akharen pe duito data le manušes kai sas kořo, ai von phenen leske: De vestimos ka o Del; ame žianas ke kudo manuš si jekh bezexalo.

₂₅Vo del palpale: Te si jekh bezexalo, me či žianav; me žianav jekh diela, si ke me simas kořo ai ke akana me dikhav.

₂₆Von phenen leske: So kerdias vo? Sar puterdias vo tjire jakha?

₂₇Vo del len palpale: Me phendem tumenge inke, ai tume či ašundian; sostar kamen tume te mai ašunen? Vi tume kamen t'aven leske vortača.

₂₈Von prasan les ai phenen: Tu san lesko vortako; ame, ame sam le vortača le Mošeske. ₂₉Ame žianas ke o Del dias duma ka o Moše; numa kado, ame či žianas katar lo vo.

₃₀Kudo manuš dias len palpale: Šodo si ke tume či žianen katar lo vo; ai numa vo puterdias muře jakha. ₃₁Ame žianas ke o Del či kerel pe le bezexalengi; numa, te si varekon te del les pativ ai kerel so vo kamel, kudo avela pe leski. ₃₂Šoha nas ašundo te phenen ke varekon puterdias le jakha jekheske kai arakhadilo kořo. ₃₃Te kudo manuš te na avilinosas katar o Del, vo naštil te kerel khanči.

₃₄Von den les palpale: Tu arakhadilian sa ande e bezex, ai tu sikiares. Ai von gonisarde les.

₃₅O Jesus ašundias ke von gonisarde les ai arakhlias les. Vo phenelas leske: Patias tu tu ka o Šiav le Devlesko?

₃₆Vo del palpale: Ai kon si kudo, Baria, eta te patiav me ande leste?

₃₇Tu dikhlian les, phenel o Jesus, ai kudo kai del tusa duma, vo si.

₃₈Ai vo phenel: Me patiav, Baria. Ai vo dias čanga angla leste.

₃₉Porme o Jesus phenel leske: Me avilem ande kadia lumia pe jekh kris, pe kudala kai či dikhen te dikhen, ai kudala kai dikhen t'aven koře.

₄₀Uni Farizianuri kai sas lesa, ašunde kudala vorbi, phenen leske: Vi ame, sam ame koře?

₄₁O Jesus del len palpale: T'avilianas tume koře, tume sas te na avel tume bezexa. Numa akana tume phenen: Ame dikhas. Sa anda kudia tumari bezex bešel.