Jono 6

₁Pala kudia, o Jesus gelotar pe e kaver rig la mariaki e Galileaki (vai o Tiberiaseski). ₂Jekh baro narodo žial pala leste, ke von dikhle le čudeni kai vo kerel pe le nasvale. ₃O Jesus anklel pe o plai, ai kothe bešel peske vortakonsa. ₄Eta, e Patradi pašiol, o prasniko le Židovongo. ₅Kana vazdias opre le jakha, ai dikhel ke jekh narodo avel leste, o Jesus phenel ka o Filipo: Kai kjinasa ame manře, ke kadala žene t'aven len te xan? ₆Vo phenelas kudia te zumavel les, ke vo žianelas so si te kerel.

₇O Filipo del les palpale: Le manře kai si t'aven ame pe dui šela dinari či avena dosta ke sako te šai lel jekh tsiřa.

₈Jekh anda leske vortača, o Andreas, phral katar o Simon Petri, phenel leske: ₉Si kathe jekh terno šiavořo kai si les panž manře anda orzo ai dui maše; numa so šai avel kudo pe kaiti but žene?

₁₀O Jesus phenel: Keren te bešen tele. Sas ande kudo than but čar. Von kadia bešle, sas amburim panž mii manuš. ₁₁O Jesus lias le manře, naisardias, ai dias le ka kudala kai bešen tele; sa kadia dias le maše, sogodi von kamenas. ₁₂Kana von pravardile, vo phenel peske vortakonge: Kjiden le kotora kai ašen, eta ke khanči te na xasavol. ₁₃Von kjidine kadia, ai von pherde deš-u-dui košnitsi le kotorensa kai ašile anda le panž manře orzoske, pala ke sa xale.

₁₄Kudale žene, dikhle e čudenia kai o Jesus kerdias, phenenas: Kado si čačes o profeto kai trubul t'avel ande e lumia. ₁₅Ai o Jesus, sar žianelas ke von aven te len les te thon les amperato, mai gelotar pe o plai, ferdi vo.

₁₆Kana e riat aresli, leske vortača vuliste tele pe o berego la mariako. ₁₇Ankliste ande jekh čuno, von nakhle e maria te žian ande o Kapernaum. Sas vuže e riat, ai o Jesus inke či areslo ži lende. ₁₈Phurdel jekh bari balval, ai e maria miškil pe but. ₁₉Kana tradine o čuno pašte panž kilometri, von dikhle le Jesus sar phirel pe e maria ai pašiol paša o čuno. Ai lias len le e dar. ₂₀Numa o Jesus phenel lenge: Me sim; na daran! ₂₁Von kamenas te len les ande o čuno, ai strazo o čuno areslo kothe kai von žianas.

₂₂O narodo kai bešlo pe e kaver rig la mariaki dikhliasas ke sas kothe ferdi jekh čuno, ai ke o Jesus či anklisto ande kudo čuno peske vortakonsa, numa ke von gele korkořo. ₂₃Teharin, sas aver čunuri kai aresle anda o Tiberias paša o than kai von xale o manřo pala ke o Baro naisardias. ₂₄Le žene anda o narodo, dikhle ke či o Jesus či leske vortača nas kothe, ankliste von ande kudala čunuri ai gele ande o Kapernaum te roden le Jesus.

₂₅Ai arakhle les inčial e maria, von phenen leske: Rabi, kana avilian tu kathe?

₂₆O Jesus del len palpale: Čačimasa, čačimasa, me phenav tumenge, tume roden ma, na ke tume dikhlian čudeni, numa sar ke tume xalian manřo ai ke tume pravardilian. ₂₇Keren butji, na pala o xamos kai xasavol, numa pe kudo kai bešel pe o traio sakda, ai kai o Šiav le manušesko dela tume; ke vo si kai o Del tumaro Dad thodias pe leste e pečata.

₂₈Von phenen leske: So trubul ame te keras, te keras e butji le Devleski?

₂₉O Jesus del palpale: E butji le Devleski, si te patian ande kudo kai vo tradias.

₃₀Če čudenia keres tu, eta ame te dikhas, ai te patias ande tute? So keres tu? ₃₁Amare dada xale e mana ande e pusta, sar si ramome: Vo dias len o manřo anda o čeri te xan.

₃₂O Jesus phenel lenge: Čačimasa, čačimasa, me phenav tumenge, o Moše či dias tumen o manřo anda o čeri, numa muřo Dad dias tumen o čačo manřo anda o čeri. ₃₃Ke o manřo le Devlesko, si kai vulel anda o čeri ai kai del o traio la lumiake.

₃₄Von phenen leske: Baria, de ame sakda kudo manřo.

₃₅O Jesus phenel lenge: Me sim o manřo le traiosko. Kudo kai avel mande či avela šoha bokhalo, ai kudo kai patial ande mande či avela šoha trušalo. ₃₆Numa, me phenav tumenge, tume dikhlian ma, ai tume či patiaian. ₃₇Sa sogodi anda kudala kai o Dad del ma avel mande, ai me či šiudava avri kudales kai avel mande. ₃₈Ke me vulistem anda o čeri, na te kerav so me kamav, numa so kamel kudo kai tradias man. ₃₉Eta, so kamel kudo kai tradias ma, si te na xasarav khanikas anda kudalende kai dias ma, numa te živindisarav len o mai paluno dies. ₄₀So kamel muřo Dad, si ke kon-godi dikhel le Šiaves ai patial ande leste avel les o traio pe sakda; ai me živindisarava les o mai paluno dies.

₄₁Le Židovuri bulguin pala leste, ke vo phendias: Me sim o manřo kai vulisto anda o čeri. ₄₂Ai von phenenas: Nai kado o Jesus, o šiav katar o Josef, kai ame žianasas leske dades ai leska da? Sar phenel vo: Me vulistem anda o čeri?

₄₃O Jesus del len palpale: Na bulguin maškar tumende. ₄₄Khonik naštil t'avel mande, te na avela o Dad kai tradias ma te tsirdel les peste; ai me živindisarava les o mai paluno dies. ₄₅Si ramome ande le profeturi: Von avena sa sikade katar o Del. Kadia kon-godi ašundias le Dades ai lias so vo sikiardias avela mande. ₄₆Khonik či dikhlias le Dades, te na kudo kai avel katar o Del; kudo kai dikhlias le Dades. ₄₇Čačimasa, čačimasa, me phenav tumenge, kudo kai patial ande mande si les o traio pe sakda. ₄₈Me sim o manřo le traiosko. ₄₉Tumare dada xale e mana ande e pusta, ai von mule. ₅₀Si o manřo kai vulel anda o čeri eta kudo kai xal te na merel. ₅₁Me sim o manřo živindo kai vulisto anda o čeri. Te si varekon kai xal anda kudo manřo, vo traila pe sakda; ai o manřo kai me dava, si muřo mas, kai me dava pe o traio la lumiako.

₅₂Pe kadia, le Židovuri si le čingar maškar lende, phenenas: Sar šai del ame vo pesko mas te xas?

₅₃O Jesus phenel lenge: Čačimasa, čačimasa, me phenav tumenge: Te na xana tume o mas katar o Šiav le manušesko ai te na pena tume lesko rat, tume nai tumen traio ande tumende. ₅₄Kudo kai xal muřo mas ai kai pel muřo rat si les o traio pe sakda; ai me živindiva les o mai paluno dies. ₅₅Ke muřo mas si čačes jekh xamos, ai muřo rat si čačes jekh pimos. ₅₆Kudo kai xal muřo mas ai kai pel muřo rat bešel ande mande, ai me bešav ande leste. ₅₇Sar o Dad kai si živindo tradias man, ai ke me traiv katar o Dad, kadia kudo kai xal ma trail mandar. ₅₈Kathe si o manřo kai vulisto anda o čeri. Nai sar tumare dada kai xale e mana ai kai mule. Kudo kai xal kado manřo traila sakda.

₅₉Kadala dieli vo phendias ande e khangeri ande o Kapernaum.

₆₀But anda leske vortača, pala ke ašunde leste, phenenas: Kadia vorba si zurali; kon šai ašunel la?

₆₁O Jesus, žianelas ande peste ke leske vortača bulguin, phenelas lenge: Nai tumenge mišto? ₆₂Ai te dikhena tume le Šiaves le manušeske te nakhel kai vo sas angla savořende? ₆₃O duxo si kai zuriarel; o mas nai khančesko. Le vorbi kai me phenav tumenge si duxo ai traio. ₆₄Numa si maškar tumende uni kai či patian. Ke o Jesus žianelas de anglal kon si kudala kai či patian pe, ai kon si kudo kai dela les ande o vast. ₆₅Ai vo mai phenel: Sa anda koda me phenav tumenge ke khonik naštil t'avel mande, te na avela leske šinado katar o Dad.

₆₆De kothar, uni anda leske vortača geletar, ai či mai gele von lesa. ₆₇O Jesus phenel vo kadia ka le deš-u-dui: Ai tume, či kamen vi tume te žiantar?

₆₈O Simon Petri del les palpale: Baria, kaste žiasa ame? Tute si le vorbi le traioske pe sakda. ₆₉Ai ame patiaiam ai ame prinžiardiam ke tu san o Kristo, o svinto le Devlesko.

₇₀O Jesus del les palpale: Nai ke me alosardem tumen, tumen le deš-u-don? Ai jekh anda tumende si jekh demono! ₇₁Vo delas duma pa o Juda Iskariot, šiav katar o Simon; ke vo sas kai trubulas te bikjinel les, vo, jekh anda le deš-u-dui.