Jono 5

₁Pala kudia, sas jekh prasniko le Židovongo, ai o Jesus anklisto ande o Jerusalem. ₂Eta, ande o Jerusalem, paša o vudar le bakrořengo, si jekh bania kai akharen la židovitsko Betesda, ai kai si la panž stilpuri. ₃Tela kudala vudara sovenas but nasvale, koře, bange, paralitikuri, [kai ažiukerenas te miškil pe o pai; ₄ke jekh andželo vulelas univar ande e bania ai miškilas o pai; ai kudo kai vulelas o mai angluno kana o pai miškilas sas sasto, sogodi avelas lesko nasvalimos.] ₅Sas kothe jekh manuš nasvalo de trianda-ai-oxto berš. ₆O Jesus dikhlias les ke sovel tele, ai žianelas ke vo si nasvalo de dumult, phenel leske: Kames te sastios?

₇O nasvalo del les palpale: Baria, nai man khonik te šiudel man ande e bania kana o pai miškil pe, ai žikin me žiav, jekh aver vulel angla mande.

₈Ušti, phenel leske o Jesus, le tjiro pato, ai phir. ₉Strazo kudo manuš sastilo; vo lias pesko pato, ai phirel.

₁₀Sas jekh dies sabato. Le Židovuri phenen kudaleske kai sastilo: Si sabato; nai tuke slobodo te ningeres tjiro pato.

₁₁Vo del len palpale: Kudo kai sastiardias ma phendias mange: Le tjiro pato, ai phir.

₁₂Von pušen les: Kon si kudo manuš kai phendias tuke: Le tjiro pato, ai phir?

₁₃Numa kudo kai sastilo či žianelas kon si; ke o Jesus gelotar katar o narodo kai sas ande kudo than.

₁₄De kothar, o Jesus arakhel les ande o templo, ai phenel leske: Eta, tu sastilian; na mai ker bezex, daratar ke si t'avel tu dieli mai žiungale.

₁₅Kudo manuš gelotar, ai phenel ka le Židovuri ke o Jesus si kai sastiardias les. ₁₆Sa anda kudia le Židovuri našen pala o Jesus, ke vo kerelas kudala dieli sabatone. ₁₇Numa o Jesus del len palpale: Muřo Dad kerel kadala dieli ži akana; vi me, kerav.

₁₈Anda kudia, le Židovuri rodenas mai but te mudaren les, na ferdi ke del pe o lažiav o sabato, numa ke akharel le Devles Tate, kerel vo pes jekh fialo sar o Del.

₁₉O Jesus mai lias e vorba, ai phenel lenge: Čačimasa, čačimasa, me phenav tumenge: O Šiav naštil te kerel khanči anda peste, vo kerel ferdi so dikhel ke kerel o Dad, o Šiav sa jekh fialo kerel. ₂₀Ke o Dad si drago leske o Šiav ai sikavel leske sogodi kerel; ai sikavel leske le butia mai bare sar kadala, eta t'avel tumenge šodo. ₂₁Ke, sar o Dad živindisarel le mulen ai del len traio, kadia o Šiav del o traio kaske vo kamel. ₂₂O Dad či del kris khanikas, numa dias sa e kris ka o Šiav, ₂₃eta te den pativ le Šiaves, sar den pativ le Dades. Kudo kai či del pativ le Šiaves či del pativ le Dades kai tradias les.

₂₄Čačimasa, čačimasa, me phenav tumenge, kudo kai ašunel muři vorba, ai kai patial kudales kai tradias ma, si les o traio pe sakda ai či avela dino pe kris, numa nakhel katar e martia ka o traio. ₂₅Čačimasa, čačimasa, me phenav tumenge, o časo avel, ai inke vuže avilo, kai le mule ašunena o hango le Šiavesko le Devlesko; ai kudala kai ašunena les traina. ₂₆Ke, sar o Dad si les o traio ande leste, kadia dias ka o Šiav t'avel les o traio ande leste. ₂₇Ai vo dias les e putiaria te del kris, ke vo si Šiav le Devlesko. ₂₈Te na avel tumenge šodo anda kadia; ke o časo avela kai sa kudala kai si ande le groapoševuri ašunena lesko hango, ai anklena avri. ₂₉Kudala kai kerde mištimos živindina pe o traio, numa kudala kai kerde nasulimos živindina t'aven pe kris.

₃₀Me naštiv te kerav khanči anda mande; sar me ašunav, me dav kris; ai muři kris si vorta, ke me či kerav so me kamav, numa so mangel kudo kai tradias ma.

₃₁T'avel ke me dav duma pa mande, nai muři marturia vorta čači. ₃₂Te si jekh aver ke del duma pa mande, ai me žianav ke so vo phenel si čačimos. ₃₃Tume tradian karing o Jono, ai vo sas marturo ka o čačimos. ₃₄Mange, nai katar jekh manuš ke si mange marturo, numa me phenav kadia, eta te tume t'aven skipime. ₃₅O Jono sas o lampa kai phabol ai strefial, ai tume kamlian te veselin tume jekh časo ka leski vedaria. ₃₆Me, si ma jekh marturia mai bari sar o Jono; ke e butji kai o Dad dias man te kerav, kudala butia kai me kerav, si martururi pa mande ke si o Dad kai tradias man, ₃₇ai o Dad kai tradias man vo si marturo pa mande. Tume či ašundian šoha lesko hango, tume či dikhlian leski fatsa, ₃₈ai leski vorba či bešel ande tumende, ke tume či patian ande kudo kai vo tradias. ₃₉Tume zumaven le Ramomata, ke tume gindin tume ke si ande lende o traio pe sakda. Von si kai si marturo pa mande. ₄₀Ai tume či kamen t'aven mande t'avel tumen o traio!

₄₁Me či tsirdav muřo vestimos katar le manuš. ₄₂Numa me žianav ke nai ande tumende o kamimos le Devlesko. ₄₃Me avilem ande o anav muře Dadesko, ai tume či len ma; t'avel jekh aver ande pesko anav, tume len les. ₄₄Sar tume šai patian, tume kai tsirden tumaro vestimos jekh kavrestar, ai kai či roden o vestimos kai avel katar o Del? ₄₅Na gindin tume ke me thav beda pe tumende angla o Dad; kudo kai thol beda pe tumende, si o Moše, ande kaste tume thodian t'ažiukeren. ₄₆Ke te si ke tume patian ande o Moše, vi ande mande patian, ke vo ramosardias pa mande. ₄₇Numa te tume te na patian ande kudala ramomata, sar patian tume muře vorbi?