Marcu 6

₁Esciutu da quella casa, Ghjesù andò inde u so paese, è i so discepuli u seguitonu. ₂È, venutu u sabbatu, principiò à insignà inde a sinagoga. È tanti chì u stavanu à sente funu stunati è dissenu: «Da induve li venenu ste cose? Chì hè sta sapienza chì l'hè stata data? Cumu escenu da e so mane tutti issi miraculi? ₃Ùn hè ellu l'artigianu, u figliolu di Maria, u fratellu di Ghjacumu, di Ghjiseppu, di Ghjuda è di Simone? È e surelle ùn sò quì cù noi?» È si ne scandalizavanu. ₄È Ghjesù li disse: «Ùn ci hè prufeta chì ùn sia rivaritu, cacciatu ne in lu so paese, frà a so ghjente è in casa soia.» ₅Ùn ci pobbe fà alcun'meraculu, fora di risanà qualchì malatu, impunenduli e mane. ₆È fù surpresu da a mancanza di fede di i soi. È fece u giru di i paesi di u vicinatu, insignendu;

₇Poi chjamò i dodeci è cuminciò à mandalli dui à dui denduli u putere sopra à i spiriti maligni. ₈È li ricumandò d'ùn piglia nunda pè u viaghju, s'ellu ùn hè un bastone: nè pane, nè bisaccia, nè muneta inde a bursella. ₉Ma di calzassi di sandule è di vestesi d'una tunica sola. ₁₀È li disse: «Entrendu in qualunque casa, stateci fin'à a u parte. ₁₁Ma ind' i lochi duve elli ùn vi riceveranu è ùn vi staranu à sente, à u parte scuzzulate a polvera chì voi avete sottu à i pedi , in modu di testimugnanza contru à elli.» ₁₂È à l'esce predicavanu chì a ghjente si cunvertissi. ₁₃È scunviavanu assai demonii, è ogliendu parechji malati, i risanavanu.

₁₄U Rè Erode ne intese parlà, di fatti, a rinomina di Ghjesù si sparghjia. À chì dicìa chì Ghjuvanni u Battistu era rinvivitu da trà li morti è ch'ella era per quessa ch'elli accadianu sti meraculi di Ghjesù. ₁₅À chì dicìa ch'ellu era Elia, à chì dicia ch'ellu era un prufeta cum'è l'altri prufeti. ₁₆Quandu ch'Erode ne intese parlà, disse: «Ghjuvanni, quellu ch'eiu feci scapà hè rinvivitu.» ₁₇Chì Erode stessu avia piglitu à Ghjuvanni è l'avia fattu incatenà in prighjò, per vìa di Erodiade, a moglia di u fratellu Filippu, ch'ellu si tenia. ₁₈Chì Ghjuvanni dicia à Erode: «Ùn hè micca permessa ch'è tù ti tenga cù a moglia di to fratellu.» ₁₉Erodiade li ne vulia è cercava à fallu tumbà, ma ùn li riescia. ₂₀Chì Erode temia à Ghjuvanni, sapendu ch'ellu era un omu ghjustu è santu, è, per ciò u defendia. È dopu intesulu era imbrugliatu assai, ma u stava à sente vulintere. ₂₁Ma si presentò un ghjornu prupiziu, chì Erode, per festighjà u s'anniversariu, invitò à cena i capezzoni di u sò palazzu, i magistrati è i principali di a Galilea. ₂₂Entrata ch'ella fù a figliola di Erodiade, è mentre ch'ella ballava, piacì à Erode è à i so invitati. U Rè disse à a ghjuvanotta: «Dumandami ciò ch'è tù voli è ti sera cuncessa.» ₂₃Li ne fece ghjuramentu: «Dumandami ciò ch'è tù voli, u ti daraghju, fussi puru a metà di u mio regnu.» ₂₄È ella, esciuta ch'ella fù, disse à a mamma: «Chì li dumanderaghju?» È quella rispose: «U capu di Ghjuvanni u Battistu.» ₂₅Subitu rientrò, andeti in frezza versu u Rè, è li fece a so dumanda, dicendu: «Vogliu ch'è tù mi dia, à l'istante, nant'à un piattu, u capu di Ghjuvanni u Battistu.» ₂₆U Rè ne fù cuntristatu assai, ma per vìa di u so ghjuramentu è di i so invitati, un volse ricusà. ₂₇Un guardia, armatu di spada, fù subitu speditu cù l'ordine di purtà u capu nant'à un piattu. Andedi u suldatu, è li tagliedi u capu in prighjò. ₂₈È u ghjunse nant'à un piattu ch'ellu purghjì à a ghjuvanotta, è quella u dede à a mamma. ₂₉Sappiutula, i discepuli di Ghjuvanni ghjunsenu à piglià u so cadaveru per mettelu inde un sepolcru.

₃₀Accustendusi à Ghjesù, l'apostuli li racuntonu tuttu ciò ch'elli avianu fattu è insegnatu. ₃₁Ellu li disse: «Venite ind'un locu ritiratu è tranquillu è ripusatevi una stonda.» Ci vole à dì chì parechji facianu u passa è veni è ùn li davanu mancu tempu à manghjà. ₃₂È imbarchendusi s'avvionu ver' di un locu ritiratu è tranquillu. ₃₃Assai ghjente chì l'avianu visti alluntanassi i ricunniscinu. È, à pedi, da tutte e cità, accorsenu e ghjente, è ghjunsenu prima chè elli à u locu. ₃₄À u sbarcà, Ghjesù vide una folla immensa è n'ebbe cumpassione, chì eranu cume tante pecure senza pastore, è principiò à insignalli tante cose. ₃₅Cum'ellu era dighjà tardi, li s'accustonu i so discepuli dicenduli: «U locu hè desertu è l'ora hè bella avanzata. ₃₆Falli rientre ch'elli possanu andà per isse campagne vicinante o pè i paesi à cumprassi da manghjà.» ₃₇Ma ellu rispose: «Dateli voi da manghjà.» È li dissenu: «Andaremu à cumprà per due centu danari di pane per putelli fà manghjà tutti.» ₃₈Ellu dumandò: «Pani, quantu n'avete? Andate à piglià capu.» Fattu u contu li dissenu: «Ci hè cinque pani è dui pesci.» ₃₉L'incaricò di falli pusà à tutti, à filarate, nant'à l'arba fresca. ₄₀È si pusonu, per stolì di centu o di cinquanta. ₄₁Pigliò i cinque pani è i dui pesci, pisò l'ochji in celu, benedisse è spezzò i pani, i dede à i so discepuli ch'elli i purghjissinu à a ghjente, è spartì frà tutti i dui pesci. ₄₂Ène manghjedinu tutti è funu sazii. ₄₃Cù ciò chì fermava di pane è di pesci empiinu dodeci coffe. ₄₄È quelli chì avianu manghjatu i pani eranu cinque milla omi.

₄₅Subitu custresse i so discepuli à entre in barca è à passà nanzu ad ellu da culandi, ver' di Betsaida, mentre ch'ellu si licenzierebbe da u populu. ₄₆Licenziatusi da u populu, si ne cullò nant'à à muntagna per preca. ₄₇À tardi, a barca era sempre à mezu mare è ellu solu era à terra. ₄₈È videnduli affannati à ramà —chì u ventu l'era cuntrariu—, versu trè ore di mane, andò à truvalli, marchjendu annantu à l'acqua, è i volse avanzà. ₄₉Ma elli, videndulu marchjà annantu à l'acqua, u piglionu pè una fantomia, è si messenu à briunà. ₅₀Chì tutti u videnu è si spaventonu. Ellu, subitu li parlò è disse: «Curaghju! Sò eiu. Ùn abbiate peura.» ₅₁Cullò inde a barca cun elli. U ventu cessò. Ne funu ancu più sbarluditi. ₅₂Elli ùn avianu micca capitu l'affare di i pani è u so core era sempre abbughjatu.

₅₃Compia a traversata ghjunsenu in Ghjenesarè duv'elli accustonu. ₅₄A tempu sbarcati, Ghjesù fù ricunnisciutu da e ghjente. ₅₅È gironu a cuntrata sana, è messinu à purtà i infermi ghjacilati in ogni locu duv'elli sapianu di truvallu. ₅₆È in ogni locu duv'ellu ghjunghjia, paesi, cità o case di campagna, spunianu l'infermi inde e piazze è u supplicavanu di legalli tuccà ùn fussi chè l'orlu di u so vestitu. È tutti quelli chì u tuccavanu eranu salvati.