Marcu 5

₁Ghjunsenu da mare indà, inde a cuntrata di i Geraseni. ₂Sbarcatu ch'ellu fù Ghjesù, un omu esciutu da e tombe è pigliatu da un spiritu malignu li vense à u scontru. ₃Quell'omu s'era accasatu inde e tombe è nimu a li facia à ligallu, puru cù e catene. ₄Chì era statu à spessu impastughjatu è incatenatu, ma avia strappatu e catene è rottu e pastoghje, è nimu u pudia dumà. ₅È si ne stava ghjornu è notte pè e tombe è pè e muntagne, briunendu è lacerendusi cù e petre. ₆Videndu à Ghjesù da luntanu, corse è li s'inghjinuchjò. ₇È à voce rivolta, disse: «Chì ci hè da mè à tè, o Ghjesù, Figliolu di Diu l'Altissimu? À nome di Diu, a ti dumandu, ùn mi turmentà.» ₈Era per via chì Ghjesù li dicia: «Esci da st'omu, o spiritu malignu.» ₉Ghjesù li dumandò: «Cumu ti chjami?» Ellu rispose: «U mio nome è Legione, perchè simu parechji.» ₁₀È u supplicava assai d'un scunvialli da u lucale.

₁₁Or vicinu à a muntagna, c'era una grossa banda di maghjali chì pasculavanu. ₁₂È i spiriti u supplicavanu dicenduli: «Mandaci inde i maghjali ch'è no'ci entrimu.» ₁₃È Ghjesù a li cuncesse. Tandu i spiriti maligni, esciuti da l'omu, entronu inde i maghjali, a banda di guasi due mila capi, si frumbò da l'elpa è s'annegò in mare. ₁₄Quelli chì i facianu pasce si ne fughjinu, sparghjendu a nutizia in cita è pè a campagna è a ghjente andò à vede ciò chì era stalvatu. ₁₅Ghjunta duv'ellu era Ghjesù, è videndu u indemuniatu, quellu chì avia avutu addossu a legione di i demonii, chì pusava, vestutu è assinnatu, a ghjente s'intimurì. ₁₆I testimoni di u fattu racuntonu ciò chì era successu à u indemuniatu è quella di i maghjali. ₁₇È senz'altru a ghjente supplicò à Ghjesù d'andassine da i so lochi. ₁₈Mentre ch'ellu imbarcava, quellu ch'era statu indemuniatu li dumandava a grazia di stà cun ellu. ₁₉Ghjesù ùn a li cuncesse, ma li disse: «Vaitine in casa toia è raconta à e to ghjente tuttu ciò chì u Signore ti hà fattu, è, cum'ellu hà avutu pietà di tè.» ₂₀È l'omu si n'andò, principiendu à annunzia in a Decapola, tuttu ciò chì Ghjesù avia fattu in so favore. È tutti ne eranu meravigliati.

₂₁Ghjesù essendu vultatu [in barca] da mare in dà, un immensa folla li s'accolse in giru. Ed era vicinu à u mare. ₂₂È tandu ghjunse à truvallu unu di i capisinagoga chjamatu Ghjaìru, chì, à tempu vistulu, li s'inghjinuchjò à i pedi, ₂₃È li si ricumandò tantu, dicendu: «A mio figliola hè in puntu di morte, veni è imponili e mane ch'ella sia salva è pudè campà.» ₂₄È Ghjesù partì cun ellu.

È una folla maiò u seguitava stringhjenduli si. ₂₅È ci era una donna chì, dapoi dodeci anni perdia u sangue, ₂₆avia suffertu assai in manu à parechji medici è ci avia lasciatu tuttu u soiu senza riescita, chì andava ancu peghjurendu, ₂₇avendu intesu parlà di Ghjesù, si frafullò per da retru è li tuccò u vestitu. ₂₈Chì dicia: «Basta ch'o'tocchi u so vestitu è saraghju salvata.» ₂₉U sangue cessò subitu di corre, è a donna seppe in tutta a so persona ch'ella era guarita da u so male. ₃₀È senz'altru, Ghjesù, chì s'avvide in ellu stessu chì una forza l'era surtita, si girò versu a folla è disse: «Quale hà toccu u mio vestitu?» ₃₁I so discepuli li dissenu: «Ùn vedi cumu chì a folla ti si stringhje, è dumandi: quale mi hà toccu?» ₃₂Ma ellu guardava à tutti per vede quella ch'era a cagione di stu fattu. ₃₃È a donna intimurita è tremulone, sapendu ciò chì l'era successu, s'avvicinò, li si lampò à i pedi è li disse tutta a verità. ₃₄È Ghjesù li disse: «O figliola, a to fede t'hà salvatu. Vai in pace, è sìa guarita da u tò male.»

₃₅Mentre ch'ellu parlava, ghjunse ghjente da a casa di u capisinagoga, per dì à quellu: «A to figliola hè morta. Chì disturbi sempre u Maestru?» ₃₆Ghjesù ch'avìa intesu issu discorsu disse à u capisinagoga: «Ùn teme. Abbii a fede è basta.» ₃₇È ùn permesse à nimu di seguitallu, fora di Petru, Ghjacumu è Ghjuvanni, u fratellu di Ghjacumu. ₃₈Ghjunsenu in casa di u capisinagoga, è Ghjesù vide u cunbugliu, cù ghjente chì pienghjia è briunava assai. ₃₉Entratu ch'ellu fù, disse: «Cumu hè chè voi v'affannate? Chì hè issu cumbugliu è chì sò issi pienti? A zitella ùn n'hè morta chì dorme.» ₄₀A ghjiente si ne ridia, ma ellu fenduli esce tutti, pigliò u babbu è a mamma è quelli chì l'avianu accumpagnatu, è entrò induv'ella era a zitella. ₄₁Pigliendu a zitella per a manu li disse: «Talita cumi», ciò chì vole dì: «O zitella, ti dicu d'arrizzati.» ₄₂A zitella s'arrizzò subitu è viaghjò chì avìa dodeci anni. Firmonu sbalurditi da tamanta meraviglia. ₄₃Ma ellu li si ricumandò assai chì nimu sappia ciò chì s'era passatu è li disse di fà manghjà a zitella.