A parabula di u suminadore
1Si messe torna a insignà, vicinu à u mare. Era avvintu da l'immensa folla è li tucchede à cullà ind'una barca ancurata in mare, mentrea ancurata in mare, mentre chì a ghjiente si fermava à orlu di mare. 2L'insignava aduprendu assai e parabule è ind'u so insignamentu li dicia: 3«State à sente: u seminatore partì per suminà. 4È mentre ch'ellu suminava, unepoche di granelle casconu à orlu di strada. Si calonu l'acelli è e si pizziconu. 5Ne cascò dinò inde u petricaghju, duv'ella era scarsa a terra. Nascinu subitu chì a terra ùn era fonda. 6Ma à u pisà di u sole funu trascallate è si secconu per mancanza di radiche. 7Ne cascò dinò inde e spine ma e spine crescinu è l'assuffuconu è fruttu ùn ne dedenu. 8Ne cascò inde a terra bona è quelle spuntonu, crescinu è dedenu u fruttu. E granelle resenu u trenta u sessanta o u centu.» 9È disse: «A chì hà orecchje da sente, ch'ellu senti.»
À chì ghjovanu e parabule
10Quand'elli funu trà elli, quelli chì eranu cun ellu è i dodici li dumandedinu di e parabule. 11Ellu rispose: «A voi hè cuncessu di cunnosce u misteru di u Regnu di Diu. Ma per quelli di fora hè tuttu in parabule, 12di modu chè,
Guardendu ch'elli ùn veghinu,
sintendu è bè ch'elli ùn capiscanu,
per ch'elli ùn si cunvertinu
è avè riscattu di i so peccati.»
Ghjesù spiega a parabula di u suminadore
13È li disse: «Ùn avete micca capitu sta parabula? Allora chì ne serà di tutte l'altre! 14U suminatore lampa a sumente di a Parolla. 15È quelli chì sò à orlu di strada quand'ella casca a sumente sò quelli chì sentenu a Parolla, ma subitu ch'elli l'anu intesa, ghjunghje Satana è a li caccia da u core. 16È quelli chì ricevenu a sumente inde u petricaghju, sò quelli chì sentenu a Parolla è l'accettanu subitu cù gioia. 17Ma radiche ùn ne anu: sò ghjente di una stonda. S'elli sò tribbulati o perseguitati per via di a Parolla, inciampanu subitu. 18È l'altri chì ricevenu a sumente à meze spine, sò quelli chì anu intesu a Parolla, 19ma chì si lascianu piglià da i penseri di issu mondu, da l'ingannu di e richezze, da e voglie dirraghjunate, chì suffocanu a Parolla è cusì quella ùn pò fruttà. 20Quelli chì ricevenu a sumente in la terra bona, sò quelli chì stanu à sente a Parolla, chì a mettenu in pratica. È cusì danu u fruttu, à u trenta, a u sessanta o à u centu.»
A lumera sottu à u bacinu
21Poi li disse: «Soca s'accende una lumera per mettela sottu à u bacinu o sottu à u lettu? Ùn hè fatta a lumera per stà nant'à u candeleru? 22Chì ùn ci hè nulla di piattu chì ùn abbia da esse scupartu, ùn ci hè secretu chì ùn abbia da vene palesatu. 23A chì hà orecchje per sente, ch'ellu senti.»
24Poi li disse: «Siate attenti à ciò ch'è vo'sentite: a misura ch'è vo aduprate per l'altri serà aduprata per voi è ci serà ancu u soprappiù. 25Cusì, a chì pussete li sera datu torna, è à chì ùn hà li serà cacciatu u so pocu è tantu.»
A parabula di a sumente chì cresce
26È disse: «U Regnu di Diu hè cum'è un omu chì sumena i sò chjosi. 27Ch'ellu dormi o ch'ellu veghji, di notte cum'è di ghjornu, a sumente inghjerma è cresce senza ch'ellu sappii comu. 28A terra da per ella produce prima l'arba, poi a spiga è a spiga, dopu, s'empie di granelle. 29Quandu chì u fruttu hè maturu, l'omu dà subitu di manu à a falce, ghjà ch'ella hè venuta a cugliera.»
A parabula di a sumente di a senapa
30È dicia: «À chè l'assumiglieremu u Regnu di Diu, in chì parabula u raprisintaremu? 31Hè cum'è una granella di senapa, chì, à u suminà, hè a più chjuca di tutte e sumente di a terra, 32poi suminata ch'ella hè, cresce è diventa più maiò chè tutta l'ortaglia. Face a fronda tantu è tantu chì l'acelli di u celu s'ascondenu in a so ombra.»
L'adopru di e parabule
33È l'annunziava a Parolla cù parechje parabule simule, secondu ciò ch'elli pudianu capisce. 34À e folle, ùn li parlava mai senza parabule. Ma solu cun elli, à i so discepuli li spiegava tuttu.
Ghjesù calma una tempesta
35È quellu ghjornu, toccu a sera, li disse: «Andemu da mare indà.» 36Dopu d'avè licenziatu a folla, accumpagnonu à Ghjesù in mare cù a barca duv'ellu si truvava dighjà, è d'altre barche seguitavanu. 37È si levò una forte tempesta di ventu. I marosuli assaltavanu a barca chì s'empiia d'acqua. 38Ghjesù chì era in poppa durmia nant'à un capezzale. U sveghjonu dicenduli: «O Maestru, simu persi è mancu ti ne primureghji?» 39Arrente à u mare: «Zittu, pianta.» U ventu cascò è ci fù a bunaccia. 40Poi li disse: «chì avete à teme? Fede ùn ne avete ancu?» 41Funu presi da un gran timore, dicendusi unu à l'altru: «Quale sarà quessu, chì ancu u ventu è u mare li stanu sottumessi?»
