Titus 2

₁Mes te, prezeg an traou a gonven d’ar gelennnadurez vad. ₂Ra vezo an dud koz moderet, ra vezint tud a zoare, prudant, iac’h er feiz, er garantez, er batianted. ₃Ra vezo ar gragez avanset en oad doareet‐mad ive, evel ma tere ouz ar zantelez; ra ziwallint da veza droug‐prezegerezed, na re douget d’ar gwin; ra roint kelennadurez vad; ₄evit ma lakaint ar gragez yaouank da garet ho friejou, da garet ho bugale; ₅da veza fur, chast, da ziwall ho zi; da veza leun a vadelez, da zenti euz ho friejou; evit na vezo ket drougkomzet a enep ger Doue. ₆Exhort ive an dud yaouank da veza fur, ₇o rei da‐unan en pep tra ar skouer euz an œuvrou mad, dre ar burete euz da zoctrin, ha dre ar furnez euz da gomportamant, gant eur gomz iac’h, ₈ha na ve kavet abec e‐bed enhi, evit ma vezo confontet an enebourien, dre n’ho devezo droug e‐bed da lavaret divar ho pen. ₉Lavar d’ar mevelien senti ouz ho mistri, ha labourad da blijoud dezhe e pep tra, hep ho dislavaret; ₁₀diwall da laeres netra, mes beza fidel e pep tra, evit ma lakint henori en pep tra doctrin Doue hor Zalver.

₁₁Rag gras Doue, evit silvidigez an holl dud, a zo bet diskouezet; ₁₂ha diski a ra deomp e tleomp dilezel an impiete ha dezirou ar bed, ha beva, er vuez‐man, en demperans er justis, hag er biete; ₁₃o c’hortoz an esperans eürus, hag an diskouezidigez euz a c’hloar hon Doue braz ha Salver Jesus‐Christ, ₁₄pehini a zo en em roet he‐unan evidomp, evit hor prena euz a bep droug hag hor purifia, hag evit ober dezhan he‐unan eur bobl choazet, douget evit an œuvrou mad.

₁₅Desk an traou‐man d’an dud, exhort, ha repren anezhe gant peb otorite. Diwallo den da zisprija ac’hanoud.