PSALMI 125

Ἐν τῷ ἐπιστρέψαι κύριον τὴν αἰχμαλωσίαν Σιων

ἐγενήθημεν ὡς παρακεκλημένοι.

₂τότε ἐπλήσθη χαρᾶς τὸ στόμα ἡμῶν

καὶ ἡ γλῶσσα ἡμῶν ἀγαλλιάσεως.

τότε ἐροῦσιν ἐν τοῖς ἔθνεσιν

Ἐμεγάλυνεν κύριος τοῦ ποιῆσαι μετ᾽ αὐτῶν.

₃ἐμεγάλυνεν κύριος τοῦ ποιῆσαι μεθ᾽ ἡμῶν,

ἐγενήθημεν εὐφραινόμενοι.

₄ἐπίστρεψον, κύριε, τὴν αἰχμαλωσίαν ἡμῶν

ὡς χειμάρρους ἐν τῷ νότῳ.

₅οἱ σπείροντες ἐν δάκρυσιν

ἐν ἀγαλλιάσει θεριοῦσιν.

₆πορευόμενοι ἐπορεύοντο καὶ ἔκλαιον

αἴροντες τὰ σπέρματα αὐτῶν·

ἐρχόμενοι δὲ ἥξουσιν ἐν ἀγαλλιάσει

αἴροντες τὰ δράγματα αὐτῶν.