PSALMI 121

Εὐφράνθην ἐπὶ τοῖς εἰρηκόσιν μοι

Εἰς οἶκον κυρίου πορευσόμεθα.

₂ἑστῶτες ἦσαν οἱ πόδες ἡμῶν

ἐν ταῖς αὐλαῖς σου, Ιερουσαλημ.

₃Ιερουσαλημ οἰκοδομουμένη ὡς πόλις

ἧς ἡ μετοχὴ αὐτῆς ἐπὶ τὸ αὐτό.

₄ἐκεῖ γὰρ ἀνέβησαν αἱ φυλαί,

φυλαὶ κυρίου μαρτύριον τῷ Ισραηλ

τοῦ ἐξομολογήσασθαι τῷ ὀνόματι κυρίου·

₅ὅτι ἐκεῖ ἐκάθισαν θρόνοι εἰς κρίσιν,

θρόνοι ἐπὶ οἶκον Δαυιδ.

₆ἐρωτήσατε δὴ τὰ εἰς εἰρήνην τὴν Ιερουσαλημ,

καὶ εὐθηνία τοῖς ἀγαπῶσίν σε·

₇γενέσθω δὴ εἰρήνη ἐν τῇ δυνάμει σου

καὶ εὐθηνία ἐν ταῖς πυργοβάρεσίν σου.

₈ἕνεκα τῶν ἀδελφῶν μου καὶ τῶν πλησίον μου

ἐλάλουν δὴ εἰρήνην περὶ σοῦ·

₉ἕνεκα τοῦ οἴκου κυρίου τοῦ θεοῦ ἡμῶν

ἐξεζήτησα ἀγαθά σοι.