IOB 39

₁εἰ ἔγνως καιρὸν τοκετοῦ τραγελάφων πέτρας,‡

ἐφύλαξας δὲ ὠδῖνας ἐλάφων;

₂ἠρίθμησας δὲ αὐτῶν μῆνας πλήρεις τοκετοῦ,

ὠδῖνας δὲ αὐτῶν ἔλυσας;

₃ἐξέθρεψας δὲ αὐτῶν τὰ παιδία ἔξω φόβου;*

ὠδῖνας αὐτῶν ἐξαποστελεῖς;

₄ἀπορρήξουσιν τὰ τέκνα αὐτῶν, πληθυνθήσονται ἐν γενήματι,*

ἐξελεύσονται καὶ οὐ μὴ ἀνακάμψουσιν αὐτοῖς.‡

₅τίς δέ ἐστιν ὁ ἀφεὶς ὄνον ἄγριον ἐλεύθερον,

δεσμοὺς δὲ αὐτοῦ τίς ἔλυσεν;

₆ἐθέμην δὲ τὴν δίαιταν αὐτοῦ ἔρημον*

καὶ τὰ σκηνώματα αὐτοῦ ἁλμυρίδα·‡

₇καταγελῶν πολυοχλίας πόλεως,

μέμψιν δὲ φορολόγου οὐκ ἀκούων

₈κατασκέψεται ὄρη νομὴν αὐτοῦ*

καὶ ὀπίσω παντὸς χλωροῦ ζητεῖ.‡

₉βουλήσεται δέ σοι μονόκερως δουλεῦσαι

ἢ κοιμηθῆναι ἐπὶ φάτνης σου;

₁₀δήσεις δὲ ἐν ἱμᾶσι ζυγὸν αὐτοῦ,

ἢ ἑλκύσει σου αὔλακας ἐν πεδίῳ;

₁₁πέποιθας δὲ ἐπ᾽ αὐτῷ, ὅτι πολλὴ ἡ ἰσχὺς αὐτοῦ,

ἐπαφήσεις δὲ αὐτῷ τὰ ἔργα σου;

₁₂πιστεύσεις δὲ ὅτι ἀποδώσει σοι τὸν σπόρον,

εἰσοίσει δέ σου τὸν ἅλωνα;

₁₃πτέρυξ τερπομένων νεελασα,*

ἐὰν συλλάβῃ ασιδα καὶ νεσσα·

₁₄ὅτι ἀφήσει εἰς γῆν τὰ ᾠὰ αὐτῆς*

καὶ ἐπὶ χοῦν θάλψει

₁₅καὶ ἐπελάθετο ὅτι ποὺς σκορπιεῖ*

καὶ θηρία ἀγροῦ καταπατήσει·

₁₆ἀπεσκλήρυνεν τὰ τέκνα αὐτῆς ὥστε μὴ ἑαυτῇ,*

εἰς κενὸν ἐκοπίασεν ἄνευ φόβου·

₁₇ὅτι κατεσιώπησεν αὐτῇ ὁ θεὸς σοφίαν*

καὶ οὐκ ἐμέρισεν αὐτῇ ἐν τῇ συνέσει.

₁₈κατὰ καιρὸν ἐν ὕψει ὑψώσει,*

καταγελάσεται ἵππου καὶ τοῦ ἐπιβάτου αὐτοῦ.‡

₁₉ἦ σὺ περιέθηκας ἵππῳ δύναμιν,

ἐνέδυσας δὲ τραχήλῳ αὐτοῦ φόβον;

₂₀περιέθηκας δὲ αὐτῷ πανοπλίαν,

δόξαν δὲ στηθέων αὐτοῦ τόλμῃ;

₂₁ἀνορύσσων ἐν πεδίῳ γαυριᾷ,

ἐκπορεύεται δὲ εἰς πεδίον ἐν ἰσχύι·

₂₂συναντῶν βέλει καταγελᾷ

καὶ οὐ μὴ ἀποστραφῇ ἀπὸ σιδήρου·

₂₃ἐπ᾽ αὐτῷ γαυριᾷ τόξον καὶ μάχαιρα,

₂₄καὶ ὀργῇ ἀφανιεῖ τὴν γῆν

καὶ οὐ μὴ πιστεύσῃ, ἕως ἂν σημάνῃ σάλπιγξ·

₂₅σάλπιγγος δὲ σημαινούσης λέγει Εὖγε,

πόρρωθεν δὲ ὀσφραίνεται πολέμου σὺν ἅλματι καὶ κραυγῇ.

₂₆ἐκ δὲ τῆς σῆς ἐπιστήμης ἕστηκεν ἱέραξ

ἀναπετάσας τὰς πτέρυγας ἀκίνητος καθορῶν τὰ πρὸς νότον;

₂₇ἐπὶ δὲ σῷ προστάγματι ὑψοῦται ἀετός,

γὺψ δὲ ἐπὶ νοσσιᾶς αὐτοῦ καθεσθεὶς αὐλίζεται

₂₈ἐπ᾽ ἐξοχῇ πέτρας καὶ ἀποκρύφῳ;‡

₂₉ἐκεῖσε ὢν ζητεῖ τὰ σῖτα,*

πόρρωθεν οἱ ὀφθαλμοὶ αὐτοῦ σκοπεύουσιν·‡

₃₀νεοσσοὶ δὲ αὐτοῦ φύρονται ἐν αἵματι,

οὗ δ᾽ ἂν ὦσι τεθνεῶτες, παραχρῆμα εὑρίσκονται.