Romanuri 1

₁Lil katar O Paul, sluga katar o Jesus Kristo, akhardo te avel apostolo, ai alome te phenel e Laši Viasta katar o Del,

₂e Laši Viasta kai sas šinadi angla savořende katar o Del katar leske profeturi ande le Svintsi Ramomata. ₃Si pala lesko Šiav (arakhadilo katar e vitsa le Davidoski ande o mas, ₄ai phende leske «Šiav le Devlesko» zuralimasa, pala o Duxo Svintsimasko, katar lesko živindimos maškar le mule), o Jesus Kristo amaro Baro. ₅Lestar ame liam e dragostia ai te sikiaras, t'anas ande lesko anav te patian o patiamos sa kudalen kai či patian, ₆maškar save vi tume san, tume kai san akharde katar o Jesus Kristo.

₇Ramosarav ka sa kudala kai, ande e Roma, kamel len o Del, akharde t'aven Svintsi; ke e dragostia ai e patia t'avel tumenge dine katar o Del amaro Dad ai katar o Rai o Jesus Kristo!

₈Me angla savořende naisiv muře Devles katar o Jesus Kristo, pala sa tumende, sar ke tumaro patiamos si vestime ande sa e lumia. ₉O Del, kai me služiv ande muři godji ande e Laši Viasta katar lesko Šiav, si muřo marturo ke me sakda dav duma pa tumende, ₁₀mangav sakda ande muře řudjimata eta t'avel ma, sar vo kamel, e veselia te žiav karing tumende. ₁₁Ke me kamav te dikhav tumen, te dav tumen uni dinimata anda o duxo, eta te tume t'aven zurale, ₁₂vai mai mišto, eta t'avas zurale ande jekh than maškar tumende katar o patiamos kai si ame ande jekh than, tumenge ai mange.

₁₃Me kamav te mukav tume te žianen, phralale, ke butivar sas ma gindo te žiav te dikhav tumen, eta te lav varesave fruti tumendar, sar anda le kaver thema; numa naštisardem ži akana. ₁₄Me trubuv te žiav ka le Grekuri ai ka le sirbati, ka le godiaver ai ka kudala kai či žianen. ₁₅Kadia me gribiv ma te phenav vi tumenge e Laši Viasta, tumenge kai san ande e Roma.

₁₆Ke mange nai lažiav katar e Laši Viasta: si jekh zor katar o Del te skipil kongodi patial, le Židovos angla savořende, porme le Grekos. ₁₇Ke ande e Laši Viasta si sikado sar o Del kerel le manušen čačes vorta angla peste katar o patiamos, sar si ramome: O vorta katar o patiamos traila.

₁₈O Del tradela peski xoli anda o čeri pe sa kudala kai či patian ai pe kudala kai či keren mišto ai pe le manuš kai či muken e kris te žial angle, ₁₉ke sa so kamen te žianen anda o Del si sikado lenge, o Del sikadias les lenge. ₂₀Čačes, le lašimata kai či dikhion katar o Del, leski zor pe sa e vramia ai lesko stato devlikano, dikhel-pe pe e jakh, dekin si e lumia, šai dikhes les ande leske butia. Kadia nai lenge jertimos. ₂₁Sar, prinžiarde le Devles, von či luvudisarde les sar Del, ai von či naisarde les; numa von dine rigate ande penge ginduri, ai lengo ilo bi-godiako areslo pherdo anda o tuniariko. ₂₂Luvudin pe ke si godiaver, von aresle dile; ₂₃ai von pařude o luvudimos le Devlesko kai či rimol-pe pe le vobrazuri kai sikaven le manušes kai rimol pe, le čiriklia, le žigenien, ai le sapa.

₂₄Sa anda kudia o Del dias le te na aven vuže, sar ke mangen lenge ile; kadia ke von den pe o lažiav penge staturi; ₂₅von kai pařude o čačimos le Devlesko t'avel xoxamno, ai kai kamen ai služisaren le manušes ande o than kudalesko kai kerdias le manušes, o Del kai svintsil pes sakda. Amen!

₂₆Sa anda kudia o Del muklias len te keren o žiungalimos: Ke lenge řomnia pařude so si vorta la žiuvliake pe kudia kai či trubul; ₂₇ai sa kadia le murš, mukle sar sas sikiarde ka le žiuvlia, lias len e pařa jekh pe le kaver, keren manuš manušesa dieli žiungale, ai von len ande pende o pokjinimos kai trubul len ke dine rigate.

₂₈Sar von či kamle te žianen le Devles, o Del muklias le t'aven šiudine sar von kamen, te keren dieli kai nai mišto. ₂₉Pherde sako diela bi-krisako, nasulimos, xanžalimos, kurvetsia pherde žaluzia, mudarimata, čingarimata, xitria, xoxaimos, maren mui, ₃₀phenen nasul jekh pa jekh avreske; si dušmaia le Devleske, ai barimatange; prasan, luvudin pe. Zumaven te keren sa mai nasul, buntuin-pe pe penge niamuri. ₃₁Nai len godji, nai len čačimos, nai len ilo, nai len mila. ₃₂Ai, makar ke žianen ke e kris le Devleski phenel ke trubul te aven mudarde kudala kai keren kasave dieli, na ke ferdi von keren kadia, numa ažutin kudalen kai keren kudala dieli.