Apostoli 28

₁Pala ke sa skipisailiam, ame prinžiardiam ke e inzula bušol Malta. ₂Le sirbati kerde karing amende mištimasa; von line ame paša jekh bari jag, kai von dine jag ke o brišin del ai ke si pria šil. ₃O Paul kjidias but čar šuki ai thodias la pe e jag. Jekh sap anklisto avri katar o tatimos ai astardilo pe lesko vast. ₄Kana le sirbati dikhle e žigenia astardi pe lesko vast, von phenen jekh avreske: Čačes kado manuš si jekh kai mudarel, ke e kris či kamlias te mukel les te trail, pala ke vo sas skipime katar e maria. ₅O Paul šiudias la žigenia ande e jag, ai nas les či jekh dukh. ₆Kudala žene ažiukerenas te dikhen les ke phukiol vai te perel tele mulo; numa, pala ke but ažiukerde, dikhle ke nai leske khanči dukh, von pařude pengo gindo ai phenen ke vo si jekh del.

₇Sas, nai dur kothar, phuvia si le mai bare manušeske anda e inzula, bušol Publius, kai lias ame peste ai garadias ame trin dies sar mai mišto. ₈O dad le Publiusosko sas atunči ande o than nasvalo, sas les tatimos ai nasvalimos ande o dji; gelo o Paul karing leste, řudjisardias, thodia pe leste le vast, ai sastiardias les. ₉Pe kudia, avile le kaver nasvale anda e inzula, ai von sastile. ₁₀Dine ame bare podarki ai, kana žiastar, dine ame le dieli kai trubulas amen.

₁₁Pala trin šion, ame anklistiam pe jekh čuno akharel les «le Dela Žiameia» anda e Alexandria, vo nakhlias o ivend ande e inzula. ₁₂Aresliam ande o Sirakus, ame bešliam kothe trin dies. ₁₃Kothar, žias paša e rig, ame aresliam ande o Regio; ai e balval katar e rig tele uštilo teharin, ame kerdiam ande dui dies e vurma ži ande o Puteoli, ₁₄kai ame arakhliam phralen kai řudjisaile amende te nakhas efta dies lensa. Ai kadia ame geliam ande e Roma. ₁₅Anda e Roma avile angla amende, ži ka o Bazar katar o Apius ai ka le Trin-Birturi, le phral kai ašunde ke dine duma pa amende. O Paul, kai dikhlias len, naisardias le Devles, ai lias zor.

₁₆Kana ame aresliam ande e Roma, mukle le Paul te bešel korkořo, jekha ketanasa kai arakhel les.

₁₇Trin dies pala kudia, o Paul akhardias le mai bare Židovon; ai, kana von kjidinisaile, vo mothol lenge kakala vorbi: Manušale phralale. Kerdem khanči či pe o narodo či pe o zakono amare dadenge, thode man ande e temnitsa ande o Jerusalem ai dine ma ande le vast ka le Romanuri. ₁₈Pala ke von pušle man, von kamenas te muken man, ke nas ande mande khanči kudalestar trubul te mudaren man. ₁₉Numa le Židovuri či kamle, ai musai sas mange te akharav ka o Tsesar, nai ma či jekh gindo te thav doš pe muřo them. ₂₀Eta anda soste me manglem te dikhav tumen ai te dav tumensa duma; ke si pala ke ažiukerav ande o Israel ke si pe mande kado lanso.

₂₁Von den les palpale: Ame či liam či jekh lil anda Judea pa tute, ai či avilo či jekh phral te anel vai te phenel nasul pa tute. ₂₂Numa ame kamas te ašunas tutar so si tut gindo, ke ame žianas ke o narodo kai-godi si pe kudia partida ande savi tu san.

₂₃Von thodine leske jekh dies, ai but avile t'arakhen les kai bešel. O Paul phenel lenge pa e amperetsia le Devleski, sas marturo, ai rodelas, katar o zakono katar o Moše ai katar le profeturi, te sikavel lenge so si o Jesus. O divano gelo de diminiats ži riate. ₂₄Uni patian so vo phendias, ai le kaver či patian. ₂₅Sar von žianastar čingarasa, o Paul mai mothol kakala vorbi: Si čačimasa ke o Svinto Duxo, kana dias duma tumare dadenge katar o profeto Esai, phendias:

₂₆Žia karing kudo narodo, ai phen:

₂₈Žianen kadia ke kado skipimos katar o Del si tradino ka kudala kai nai-Židovuri, ai ke von ašunen. [ ₂₉Kana vo phendias kudo, le Židovuri geletar, denas duma but maškar pende.]

₃₀O Paul bešlo dui berša antregi ande jekh kher kai vo pokjinelas. Vo lelas sa kudalen kai avenas te dikhen les, ₃₁phenelas pa e amperetsia le Devleski ai sikiarelas so si o Rai o Jesus Kristo. Mukle les te phenel bi-darako.