Psalmo 49

₂Ašunen kadia, tume savoře, naroduria,

Thon kan, tume savoře, naroduri la lumiake,

₃Tsinoře ai bare,

Barvale ai čoře!

₄Muřo mui kerel t'ašunen vorbi godiaver,

Ai muřo ilo si les ginduri pherde mišto.

₅Me thav kan ka so si te phenav,

Me putrav muři gjili pe o bašimos la tsiturako.

₆Sostar darava me le diesa kai si nasul,

Kana e bezex muře dušmanongi si krugom mandar?

₇Von patian pe ande pengo lašimos,

Ai von luvudin pe ande pengo baro barvalimos.

₈Von naštin te kjinen pe jekh avres,

Či te den ka o Del o prešo kjinimasko.

₉O kjinimos lengo duxosko si kuč,

Ai či avela šoha;

₁₀Von či traina sakda,

Von naština te den rigate katar e martia.

₁₁Ke von dikhena le; le godiaver meren,

O dilo ai o prosto vi von xasavon,

Ai von muken avrenge penge mištimata.

₁₂Von gindin pe ke lenge khera si pe sakda,

Ke lenge khera kai bešen ašena berš beršesa,

Von kai lenge anava si vestime pe e phuv.

₁₃Numa o manuš kai si les pativ nai te žial dun,

Vo si jekh fialo sar e žigania kai šinen laki koř.

₁₄Kadia si lengi vurma, lengi dilimos,

Ai kudala kai žian pala lende drago lenge lengo divano.

₁₅Sar le žigeni, von si thodine kai si le mule,

O merimos xal le;

Ai sigo le manuš vorta inčaren le tela le punře,

Lengo šukarimos bilal, kai si le mule - kothe si lengo kher.

₁₆Numa o Del skipila muřo duxo katar kai bešen le mule,

Ke vo lela ma tela pesko vast.

₁₇Na dara ke jekh manuš barvavol,

Ke le mandjina leske khereske bution;

₁₈Ke von či ningerel khanči kana merela,

Leske mandjinata či vulena pala leste.

₁₉Makar vo gindila pe veselo ande pesko traio,

Makar mišto luvudina tu o veselimos kai si tu,

₂₀Tu žiasa kai bešen le mule,

Kai šoha či dikhena e vedaria.

₂₁O manuš kai si les pativ, ai kai nai godiaver,

Si jekh fialo sar e žigania kai šinen laki koř.