Psalmo 50

O Del, Zuralo, o Baro Del, de duma, ai akhar la lumia,

De katar uštel o kham ži kai perel o kham.

₂De katar o Sion, čačo šukar,

O Del strefial.

₃Vo avel, amaro Del, vo či bešel muto;

Angla leste si jekh jag kai xal,

Krugom lestar jekh baro tumano.

₄Vo tsipil karing le čeri opre,

Ai karing e phuv, te del kris peske narodos:

₅Kjide mange mire čačen,

Kai kerde patia mansa katar o sakrifiso!

₆Ai le čeri phenena leski kris,

Ke o Del si krisinitori.

₇Ašun, muřo narodo! ai me dava duma; Israel!

Ai phenava t'arakhes tu.

Me sim Del, tjiro Del.

₈Nai pala tjire sakrifisuri ke phenav ke či kerdian mišto;

Tjire phabarimata si sakda angla mande.

₉Me či lava jekh guruv ande tjiro kher,

Či buzne ande tjire stali.

₁₀Ke le žigeni anda le veša si muře,

Sa le žigeni le plaienge miensa;

₁₁Me žianav sa le čiriklia le plaienge,

Ai sogodi tsirden pe ande le kimpuri si mire.

₁₂Te sim bokhalo, me či phenava tuke,

Ke e lumia si muři ai sogodi si andre.

₁₃Xav me o mas le guruvengo?

Piav me o rat le buznengo?

₁₄De sakrifiso le Devles šukarimos,

Ai ker so phendian karing o Mai Vučo.

₁₅Ai akhar ma o dies kai si nasul;

Me skipiva tu, ai tu luvudisa ma.

₁₆Ai o Del phenel ka o nasul:

So si! tu gjines muře zakonuri,

Ai tut si muři patia ka mui,

₁₇Tu kai vuřitsis so phenen,

Ai kai šiudes muře vorbi pala tute!

₁₈Te dikhesa jekhe čořes, tuke si drago lesa,

Ai tjiri partia si le kurvarensa.

₁₉Tu des tjiro mui te kerel nasul.

Ai tjiri šib si jekh vorba kai athavel.

₂₀Tu bešes, ai tu des duma pe tjiro phral,

Tu rimos le šiaves tjira dako.

₂₁Eta so tu keres, ai me ašilem.

Tu gindisas ke me sim sar tute;

Numa dav tu palpale, ai thav sa angla tjire jakha.

₂₂Le tu sama, tume kai bustren le Devles,

Daratar ke šinav, bi khonik te skipil.

₂₃Kudo kai del sakrifisuri šukar luvudil ma,

Ai kudo kai lel sama peski vurma

Kerava te dikhel o skipimos le Devlesko.