1Ka o birevo kudalengo kai gjilaben. Le šiavenge le Koreske. Pe o hango le žiuvliango. Gjili.
2O Del si amenge jekh kai garadiovas ai jekh kai ninkeras ame,
Jekh skipimos kai si amensa sakda ande o nekazo.
3Sa anda kudia ame sam bi darako kana e phuv rimol pe,
Ai ke le plaia isdran ande o fundo le maringe,
4Kana le talazuria la mariake bašen, salaven,
Ušten žikin te keren t'isdran le plaia.
5Si jekh pai kai vulel te veselil o foro le Devlesko,
O templo kai bešel o Mai Vučo.
6O Del si maškar leste: vo či miškil;
O Del arakhel les sar uštel o diminiats.
7Thema miškin pe, amperatsi isdran;
Vo kerel t'ašunen lesko hango: e phuv bilal daratar.
8O Baro Del le řaioske zurale si amensa,
O Del katar o Jakob si amenge jekh opre kai te garadiovas.
9Aven, dikhen e butji le Bare Devleski,
Le phařaimata kai kerdias pe e phuv!
10Vo kerdias t'ašen le marimata ži ka o gor la phuviako;
Vo phaglias e sulitsa, ai vo phaglias e xanřo,
Vo biladias katar e jag le vurdona le marimaske.
11Terdion, ai žianen ke sim Del:
Me sim baro pe le thema, me sim baro pe e phuv.
12O Baro Del le řaioske zurale si amensa,
O Del katar o Jakob si amenge jekh baro than opre kai garadiovas.
