Psalmo 37

Na xoliavo pe le nasul,

Te na avel tu drago te keres sar kudala kai keren nasul.

₂Ke von si šinde sa kadia sigo sar e čar,

Ai von šukion sar e čar zeleno.

₃De tu ka o Baro Del, ai ker o mištimos;

T'avel tuke o them kai bešes ai te kjides o čačimos.

₄Ker anda o Baro Del tjire dragosti,

Ai vo dela tu so tjiro ilo mangel.

₅Mang katar o Baro Del te lel sama tutar,

Tho ande leste tjiro patiamos, ai vo kerela.

₆Vo sikavela peski kris sar e vedaria,

Ai tjiro zakono sar o kham ka mismeri.

₇Beš muto angla o Baro Del, ai ažiuker ande leste;

Na xoliavo pe kudo kai niril ande peske vurmi,

Pe o manuš kai aresel te kerel nasul sar kamel.

₈Muk e xoli, muk o xoliarimos;

Na xoliavo, si nasul te keres.

₉Ke le nasul si šiudine,

Ai kudala kai ažiukeren ande o Baro Del avela lengo o them.

₁₀Mai tsiřa vramia, ai o nasul či mai avela;

Tu dikhesa o than kai vo sas, ai vo bilailo.

₁₁Le bi laše si lengo o them,

Ai von veselin pe but katar e patia.

₁₂Le nasul den pe godji san te keren pe le vorta,

Ai vo grintsil le dand pe leste.

₁₃O Baro asal katar o nasul,

Ke vo dikhel ke lesko dies getol pe.

₁₄Le nasul tsirden e xanřo,

Von phanden peski sulitsa,

Te keren te peren le čoře ai le prosti,

Te šinen e koř kudalengi kai lengi vorba si vorta.

₁₅Lengi xanřo del andre ande pengo ilo,

Ai lengi sulitsi phagion.

₁₆Mai mišto tsiřa katar o vorta

Ke o but katar le nasul;

₁₇Ke le vast le nasulenge avena phage,

Numa o Baro Del ninkerel le vorton.

₁₈O Baro Del žianel le diesa le manušenge kai si vorta,

Ai so si lengo avela le pe sakda.

₁₉Von nai tele ande e vramia kai si nasul,

Ai von si čaile le diesa kai si bokh.

₂₀Numa le nasul xasavon,

Ai le dušmaia le Bare Devleske, san le mai laše čaria;

Von bilan, von bilan thuvesa.

₂₁O nasul lel vužile, ai vo či del palpale;

O vorta si leske mila, ai vo del.

₂₂Ke kudala kai svintson le Bare Devles si lengo o them,

Ai kudala kai den armaia si šiudine.

₂₃O Baro Del zuriarel le pasuri le manušeske,

Ai leske si drago leski vurma;

₂₄Te perela, či avela ninkerdo tele,

Ke o Baro Del lel lesko vast.

₂₅Me simas terno, me phurilem;

Ai me či dikhlem o vorta te muken les,

Či leske šiave te mangen manřo.

₂₆Sakda vo si miloso, ai vo del vužile;

Ai leske šiave si svintsime.

₂₇De tu rigate katar o nasulimos, ker mištimos,

Ai t'avel tu pe sakda tjiro kher.

₂₈Ke o Baro Del drago leske e kris,

Ai vo či mukel kudalen kai patian;

Von si sakda tela lesko vast,

Numa le šiave katar le nasul si dine rigate.

₂₉Le vorta avela lengo o them,

Ai von bešena pe sakda.

₃₀O mui katar o vorta phenen o godiarimos,

Ai leski šib phenel e kris.

₃₁O zakono leske Devlesko si ande lesko ilo;

Leske pasuri či miškin.

₃₂O nasul lel sama kai si o vorta,

Ai vo rodel te mudarel les.

₃₃O Baro Del či mukel les ande lenge vast,

Ai vo či kerel te pokjinel kana si pe e kris.

₃₄Ažiuker ande o Baro Del, arakh leski vurma,

Ai vo vazdela tu t'avel tjiro o them;

Tu dikhesa le nasul šiudine.

₃₅Me dikhlem le nasules ande sa peski zor;

Vo bariolas sar jekh kopači kai zelenil.

₃₆Vo nakhlias, ai eta, vo manai;

Me rodav les, ai vo manai.

₃₇Le sama katar kudo kai si vorta čačo, ai dikh pe kudo kai si vorta;

Ke si jekh vitsa le manušeske patiako.

₃₈Numa kai buntuin pe si sa bilade,

E vitsa le nasulengi si šiudini.

₃₉O skipimos le vortonge avel katar o Baro Del;

Vo si kai lel sama lendar ande e vramia kai o nekazo.

₄₀O Baro Del ažutil le ai skipil le;

Vo ankalavel le katar le nasul ai skipil le,

Ke von roden ande leste kai te garadion.