Psalmo 36

₂E vorba vuřitsoso katar o nasul si ande o fundo lesko ilesko;

E dar le Devleski nai angla leske jakha.

₃Ke vo luvudil pe korkořo ka peske jakha,

Te bilal peski bezex, te kerel peski xoli.

₄Le vorbi leske moske si xoxamne ai athaven;

Vo či kamel te kerel godiasa, te kerel mištimos.

₅Vo del pe godji sar te kerel nasul ande pesko than,

Vo ninkerel-pe pe jekh vurma kai nai laši,

Vo či del palpale o nasulimos.

₆Baro Del! tjiro lašimos aresel ži ka le čeri,

Tjiro čačimos ži ka le nuveria.

₇Tjiri kris si sar le plaia le Devleske,

Tjire krisa sar le bare uni.

Baro Del! tu ninkeres le manušen ai le žigenien.

₈Sode si kuč tjiri mila, o Del!

Tela e ušialin tjire phakangi le manuša roden jekh garaimos.

₉Von pravaren pe katar o but xamasko anda tjiro kher,

Ai tu des len te pen ka o paiořo tjire dragosko.

₁₀Ke paša tute si katar vulel o traio;

Katar tjiri vedaria ame dikhas e vedaria.

₁₁Tho tjiro mištimos pe sa kudala kai žianen,

Ai tjiri kris pe sa kudala kai lengo ilo si vorta!

₁₂Ke o punřo le barimatasko te na aresel ži mande,

Ai ke o vast le nasulengo te na kerel te našav!

₁₃Inke peren kudala kai keren e bezex;

Von si dine muial, ai von naštin te mai ušten.