Psalmo 19

₂O čeri phenel o vestimos le Devlesko,

Ai o buvlimos sikaven e butji leske vastenge.

₃O dies sikavel jekh kavre dieses,

E riat del te žianel jekh kaver riat.

₄Nai jekh šib, nai vorbi

Kai či ašunen lende:

₅Lengo bašimos žial pe sa e lumia,

Lenge glasuri žian ka le gora la lumiake,

Kai vo thodias jekh tseřa le khameske.

₆Ai o kham, jekh fialo sar jekh terno ansurime kai anklel avri anda peski soba,

Našel veselimasa sar jekh harniko;

₇Vo uštel pe jekh gor le čerengo,

Ai getol pesko našimos pe e kaver rig:

Khanči naštil te garadiol katar lesko tatimos.

₈O zakono le Bare Devlesko si vorta, vo pravarel o duxo;

O marturia le Bare Devlesko si čačo, vo godiarel kudales kai či žianel.

₉Le ordini katar o Baro Del si vorta, von veselin o ilo;

Le poronki katar o Baro Del si vuže, von strefian le jakha.

₁₀E dar katar o Baro Del si vuži, voi bešel pe sakda;

Le krisa katar o Baro Del si čače, von si pria vorta.

₁₁Von si mai kuč sar o sunakai, sar mai but fino sunakai;

Von si mai gugle sar o avdjin, sar kudo kai pitial anda leste.

₁₂Tjiri sluga vi vo sikiol;

Kon lel le sama si les baro pokjinimos.

₁₃Kon žianel sar vo del rigate?

Jertisar mange so či žianav.

₁₄Vile sama tjira sluga katar le barimatange;

Ke te na aven bare pe mande!

Atunči avava vorta, bi došalo katar le bare bezexa.

₁₅Le mištimasa le vorbi katar muřo mui

Ai so si ma ande o ilo,

O Baro Del, muřo bař ai muřo skipitori!