1Řudjimos le Davidoske.
Baro Del! ašun o čačimos, le sama katar muře tsipimata,
Tho kan ka muřo řudjimos kerdo le vušensa bite xoxaven!
2Ke muři kris t'avel angla tjiri fatsa,
Ke tjire jakha te dikhen muřo čačimos!
3Te zumavesa muřo ilo, te dikhesa les riate,
Te zumavesa ma, tu či arakhesa khanči:
Muřo gindo nai aver ke ferdi so anklel avri anda muřo mui.
4So me dikhav, ke keren le manuš, čačimos ka e vorba tjire vuštengi,
Me la ma sama katar e vurma le nasulengi;
5Muře pasuri si zurale pe tjire vurmitsi,
Muře punře či den rigate.
6Me akharav tu, ke tu keres pe muři, o Del!
Bangiar karing mande tjiro kan, ašun muři vorba!
7Sikav tjiro lašimos, tu kai skipis kudales kai roden kai te garadion,
Ai katar tjiro čačo vast tu skipis le katar lenge dušmaia!
8Arakh ma sar e jakh;
Garav ma, tela e ušialin tjire phaka,
9Pe le nasul kai aven pe mande,
Pe muře dušmaia kai terdion krugom ma.
10Von phandaven penge pořa,
Len si ande o mui vorbi barimaske.
11Von si pala amare pasuri, si, von terdion krugom ame,
Von len sama sar te peraven ame.
12Si sar jekh liono kai kamel te šinel,
Jekh lionutso kai ležisarel ande peski groapa.
13Ušti, Baro Del, žia angla leste, de les muial!
Skipisar ma katar o nasul tjira xanřesa!
14Skipisar ma katar le manuš tjire vastesa, Baro Del, katar le manuš anda kadia lumia!
Lengi partia si ande o traio,
Ai tu pheres lengo peř tjire mištimasa;
Lenge šiave si čaile,
Ai von muken so si le mai but ka penge nepotsi.
15Mange, ande muřo čačimos, dikhava tjiri fatsa;
De sar uštiav, čailiuvav tutar.
