Lukas 23

₁Von uštile sa ai von ningerde le Jesus angla o Pilato. ₂Von line pe te thon beda pe leste, phenenas:

Ame arakhliam kadale manušes ke vazdel amaro them te buntuil pe, či mukel te pokjinen so trubul ka o Amperato, ai kai phenel pe vo o Kristo, amperato.

₃O Pilato pušel les, kadia:

San tu o amperato le Židovongo?

O Jesus del palpale:

Tu phenes.

₄O Pilato phenel le bare rašange ai le narodoske:

Me či arakhav či jekh doš ande kado manuš.

₅Numa von mai den duma, ai phenen:

Vo vazdel o narodo, ke sikiarel ande sa e Judea, de katar e Galilea, katar lias pe, ži kathe.

₆Kana o Pilato ašundias ke den duma pa e Galilea, von pušel te si kudo manuš Galileano; ₇ai, vo hatiardias ke vo si anda o them katar o Herodo, vo tradias les ka o Herodo, kai vi vo sas ande o Jerusalem kudo dies. ₈Kana o Herodo dikhlias le Jesus, lias les jekh bari veselia; ke de dumult vo kamelas te dikhel les, pala so vo ašundias ke phenen pa leste, ai vo ažiukerelas te dikhel les te kerel uni čudeni. ₉Vo but pušel les; numa o Jesus či del les palpale. ₁₀Le bare raša ai le zakonaria sas kothe, ai thonas zurales beda pe leste. ₁₁O Herodo ai peske ketani, kai arakhen les, len lestar sama vuřitsimasa; maren mui lestar, thon pe leste jekh tsolo pria šukar ai traden les ka o Pilato. ₁₂Sa ande kudo dies o Pilato ai o Herodo aresle vortača; von sas angla savořende dušmaia.

₁₃O Pilato kjidias le bare rašan, le birevon, ai o narodo, phenel lenge:

₁₄Tume andian mange kadale manušes sar jekh kai kerdias te vazdel pe o narodo te buntuil pe. Ai eta, me pušlem les angla tumende, ai me či arakhlem les došalo ande či jekh anda le dieli kai tume thon beda pe leste: ₁₅Či o Herodo vi vo, ke vo tradias les amenge, ai eta, kado manuš či kerdias khanči ke t'avel mudardo. ₁₆Me kadia mukava les, pala ke marena les la trestiasa.

₁₇[Sa sako prasniko, leske sas zakono te mukel lenge jekhe čor.]

₁₈Von tsipil sa ande jekh than:

Mudar kadales, ai muk amenge le Barabas.

₁₉Kudo manuš sas thodino ande e temnitsa pala jekh buntuimos kai sas ande o foro, ai pala jekh mudarimos.

₂₀O Pilato mai del duma, ke kamelas te mukel le Jesus. ₂₁Ai von tsipin:

Amblav, amblav les pe o trušul!

₂₂O Pilato phenel lenge pe e trito data:

Če nasul kerdias vo? Me či arakhlem khanči ande leste kai trubul te merel. Me mukava les kadia, pala ke marena les la trestiasa.

₂₃Numa von mai thon zor bare tsipimatansa te amblaven les pe o trušul. Ai lenge tsipimata nirisarde. ₂₄O Pilato kerdias pe lengi te avela kadia. ₂₅Vo muklias kudales kai sas thodino ande e temnitsa pala jekh buntuimos ai jekh mudarimos, ai kai von mangenas; ai vo muklias le Jesus sar von kamen.

₂₆Sar ningerenas les, von line jekhes kai bušol Simon anda e Sirena, kai avelas pa le kimpuri, ai von thodine pe leste o trušul, te ningerel les pala o Jesus.

₂₇Žianas pala leste jekh baro narodo ai žiuvlia kai marenas pengo kolin ai rovenas pe leste. ₂₈O Jesus amboldias pe karing lende, ai phenel:

Šeia anda o Jerusalem, na roven pe mande; numa roven pe tumende ai pe tumare glati. ₂₉Ke eta, le dies avena kai phenena: Veseli kudala kai nai le glati, veseli le pořa kai nai le glati, ai le čuča kai či dine thud! ₃₀Atunči von thona pe te phenen le plaienge: Peren pe amende! ai le plaiořenge: Garaven ame! ₃₁Ke, te kerena kadala dieli le kašteske zeleno, so aresela le kašteske šuko?

₃₂Tradine sa ande kudia vramia do čoren, kai trubulas te mudaren le le Jesusosa. ₃₃Kana aresle ande o than kai akharen les Šero Nango, von amblade les kothe, vi le do čoren, jekh pe e čači, o kaver pe e stingo. ₃₄O Jesus phenel:

Tate, jertisar lenge, ke von či žianen so von keren.

Von hulade leske tsalia, khelde-pe pe lende. ₃₅O narodo sas kothe, ai dikhelas. Le birevia marenas mui lestar, phenenas:

Vo skipisardias le kavren; ke te skipil pe vo, te si vo o Kristo, o alome katar o Del!

₃₆Le ketani vi von marenas mui lestar; pašile ai den les šut. ₃₇Von phenenas:

Te san tu o amperato le Židovongo, skipisavo tu korkořo!

₃₈Sas opral pa lesko šero kako ramomos: Kado si o amperato le Židovongo.

₃₉Jekh anda le čor amblade paša leste prasal les, phenelas:

Či san tu o Kristo? Skipisavo tu korkořo, ai skipisar ame!

₄₀Numa, o kaver ašiavel les, ai phenelas:

Či daras tu katar o Del, tu kai avili vi kris pe tute? ₄₁Amen, vorta dine ame kris, ke ame las so trubulas pala amare mudarimata: Numa kado či kerdias khanči nasul.

₄₂Ai vo phenel ka o Jesus:

De tu godji mande, kana tu avesa ande tjiri amperetsia.

₄₃O Jesus del les palpale:

Me phenav tuke čačimasa, adies tu avesa mansa ande o řaio.

₄₄Sas pašte mismeri ai sas tuniariko pe sa e phuv, ži ka o trito časo. ₄₅O kham kalilo, ai e zanaveska ande o templo šindili pa o maškar. ₄₆O Jesus tsipisardias jekhe hangosa zurale:

Tate, me thav muřo duxo ande tjire vast.

Ai, kai phendias kudala vorbi, vo getosailo.

₄₇O fitsiri dikhlias so areslias, luvudisardias le Devles, ai phenel:

Čačimasa, kado manuš sas vorta.

₄₈Ai sa kudala kai avile ande jekh than te dikhen, kana dikhle so areslias, gele palpale, marenas pengo kolin. ₄₉Sa kudala kai žianenas le Jesus ai le žiuvlia kai gele pala leste de katar e Galilea bešenas dur ai dikhenas so nakhel.

₅₀Sas jekh manuš akhardo ande e kris bari, bušolas Josef, manuš lašio ai vorta, ₅₁kai či kamlias te del le Jesus kris ai so kerde le kaver; vo sas anda o Arimate, foro židovitsko ai vo ažiukerelas e amperetsia le Devleski. ₅₂Kudo manuš gelo karing o Pilato, ai manglias o stato le Jesusosko. ₅₃Vo vuliardias les pa o trušul, patiardias les ande jekh tsolo, ai thodias les ande jekh groapoševo hunado ande jekh stanka, kai inke khonik nas thodino andre. ₅₄Sas paraštuine, ai o sabato si t'avel.

₅₅Le žiuvlia kai avilesas anda e Galilea le Jesusosa avile le Josefosa, dikhle o groapoševo ai sar thodine o stato le Jesusosko andre, ₅₆ai von gele palpale, von lašiarde draba ai duxia.

Porme von hodinisarde o sabato, sar si o zakono.