Lukas 22

₁O prasniko le manřesko bi-drosdako, akhardo e Patradi, pašiol. ₂Le bare raša ai le zakonaria rodenas sar te keren te mudaren le Jesus; ke von daranas katar o narodo.

₃Eta, o Satan dias ande o Juda, kai akharena les Iskariot, kai sas anda le deš-u-dui. ₄Ai o Juda gelo te del duma le bare rašansa ai le birevonsa kudalenge kai arakhen o templo, sar te del les lenge ande o vast. ₅Len lias le e veselia, ai von dine pe duma te den les love. ₆Pala kudia ke thodias pe, vo rodelas sar mai mišto te del len ande o vast le Jesus te na žianel o narodo.

₇O dies le manřesko bi-drosdako, vai kai thon e Patradi, aresel, ₈ai o Jesus tradias le Petri ai le Jono, phenelas:

Žian te lašiaren amenge e Patradi, eta te ame te xas.

₉Von phenen leske:

Kai manges ame te lašiaras la?

₁₀Eta, kana tume dena ande o foro, tume arakhena jekhe manušes ningerel jekh khoro pai; žian pala leste ande o kher kai vo dela andre, ₁₁ai tume phenena ka o birevo le kheresko: Amaro birevo phenel tuke: «Kai si o than kai me xava e Patradi muře vortakonsa?» ₁₂Ai vo sikavela tumenge jekh soba opre, lašiardi: kothe tume lašiarena e Patradi.

₁₃Von geletar, ai arakhle le dieli sar vo phendias lenge ai von lašiaren e Patradi.

₁₄O časo avilo, vo thodias pe pala e skafidi, ai le apostoli lesa. ₁₅Vo phenel lenge:

Me but kamlem te xav kadia Patradi tumensa angla savořende te kjinuiv; ₁₆ke, me phenav tumenge, me či mai xava la, žikin či avela ande e amperetsia le Devleski.

₁₇Ai, lias jekh taxtai ai naisardias, vo phenel:

Len kado taxtai, ai den les maškar tumende; ₁₈ke, me phenav tumenge, me či mai piava d'akanara anda e fruta la rezaki, žikin či e amperetsia le Devleski avela.

₁₉Atunči vo lias manřo; ai, pala ke naisardias, vo phaglias les, ai dias les lenge:

Kado si muřo stato, kai si dino tumenge; keren kadia kana den tume godji mande.

₂₀Vo sa kadia lias o taxtai, kana xale, ai dias les lenge, phenela:

Kado taxtai si e nevi patia ande muřo rat, kai si dino muial tumenge. ₂₁Numa eta, o vast kai bikjinel ma si mansa pala kadia skafidi. ₂₂O Šiav le manušesko žialtar sar si leske šinado. Numa nasul le manušeske kastar si bikjindo!

₂₃Ai von line pe te pušen jekh kavrestar kon si kudo maškar lende kai kerela kudia.

₂₄Mai vazdelas maškar le apostoli jekh pušimos kai či žianen; savo anda lende trubul t'avel o mai baro? ₂₅O Jesus phenel lenge:

Le amperatsi le themenge si bare pe lende, ai kudala kai si bare pe lende akharen le laše. ₂₆Te na avel kadia maškar tumende. Numa ke o mai baro anda tumende t'avel o mai tsinořo, ai kudo kai vladil sar kudo kai služil. ₂₇Ke savo si o mai baro, kudo kai si pala e skafidi, vai kudo kai služil? Nai kudo kai si pala e skafidi? Ai me, numa, me sim maškar tumende sar kudo kai služil. ₂₈Tume, tume san kudala kai thodian zor mansa ande so me keravas; ₂₉sa anda kudia me dav muři amperetsia tumenge, sar muřo Dad dias la mange, ₃₀eta ke tume te xan ai te pen ka muři skafidi ande muři amperetsia ai ke tume te bešen pe le skamina amperatisko, te den kris le deš-u-do kumpanien anda o Israel.

₃₁O Baro phenel: Simon, Simon, ašun, o Satan manglias e putiaria, te maravel tumen sar o khas. ₃₂Numa me řudjisardem tuke, eta ke tjiro patiamos te ne perel; ai tu, kana tu pařuvesa tu, zuriar tjire phralen.

₃₃Baria, phenel leske o Petri, me sim gata te žiav tusa vi ande e temnitsa vi ande o merimos.

₃₄Ai o Jesus phenel:

Petri, me phenav tuke, o kokošo či gjilabela adies žikin či phenesa tri-var ke či prinžiares ma.

₃₅Vo mai phenel lenge:

Kana me tradem tumen bi tišilako, bi gonesko, ai bi papučengo, trubulas tume vareso? Von dine palpale: Khanči.

₃₆Ai vo phenel lenge:

Akana, aver fialo, ke kudo kai si les jekh tišila te lel la, ke kudo kai si les jekh gono te lel les, ai ke kudo kai nai les xanřo te bikjinel peske tsalia ai te kjinel jekh. ₃₇Ke, me phenav tumenge, trubul ke kudia vorba kai si ramome te kerdiol ande mande: Vo sas thodino maškar le čor. Ai so si pa mande si sigo t'aresel.

₃₈Von phenen:

Baria, eta dui xanře.

Ai vo phenel lenge: Dosta.

₃₉Pala ke anklisto avri, vo gelo, sar sas sikado, ka o plai le Maslinengo. Leske vortača gele pala leste. ₄₀Kana vo areslo ande o than, vo phenel lenge:

Řudjin, eta te na peren ande o zumaimos.

₄₁Porme durilo lendar pašte so šai šiuden jekh bař, ai, thodias-pe pe čangende, vo řudjil. ₄₂Phenelas:

Tate, te kamesa tu te duriares mandar kado taxtai! Numa, te na avel pe muři, numa pe tjiri.

₄₃Atunči jekh andželo sikadilo leske anda o čeri, te zuriarel les. ₄₄Sas kjinuime, vo řudjil mai but ai leske paia aresle sar grontsuli rateske kai peren tele.

₄₅Pala ke řudjisardias, vo uštilo ai avel karing le vortača, kai arakhel le sar soven nekežime,

₄₆ai vo phenel lenge:

Sostar tume soven? Ušten ai řudjin, eta te na peren ande o zumaimos.

₄₇Sar vo mai delas duma, eta, jekh narodo avel; ai kudo kai akharenas les Juda, jekh anda le deš-u-dui, phirelas angla leste. Vo pašiol paša o Jesus, te čimidil les. ₄₈Ai o Jesus phenel leske:

Juda, si jekhe čimidimasa ke tu bikjindian le Šiaves le manušesko!

₄₉Kudala kai sas le Jesusosa, dikhenas so si t'avel, phenen:

Baria, malavasa ame xanřensa?

₅₀Ai jekh anda lende malavel la sluga katar o baro rašai ai šindias lesko kan o čačo. ₅₁Numa o Jesus lias e vorba, phenel:

Muk, terdio!

Ai, asbadias o kan le manušesko, vo sastiardias les. ₅₂O Jesus phenel atunči ka le bare raša, ka le birevuri kai arakhen o templo ai ka le phure kai avile pe leste:

Tume avilian sar pala jekh řobaš, le xanřensa ai le rovliansa. ₅₃Me simas sako dies tumensa ande o templo ai tume či thodian o vast pe mande. Numa kathe si tumaro časo, ai e zor le tuniaričengi.

₅₄Pala ke line le Jesus, von ningerde les ai andine les ande o kher le bare rašasko. O Petri žialas palal dural. ₅₅Von dine jag maškar e bar ai von bešle tele. O Petri bešlo maškar lende. ₅₆Jekh sluganka, kai dikhlias les ke bešel angla e jag, thodias pe leste le jakha ai phenel:

Kado manuš vi vo sas lesa.

₅₇Numa vo či prinžiarel les, phenelas:

Žiuvlio, me či žianav les.

₅₈Tsiřa pala kudia, jekh kaver dikhlias les, phenel:

Vi tu san anda kudala žene.

Ai o Petri phenel:

Manuša, me či sim.

₅₉Pašte jekh časo pala kudia, jekh kaver phendias zurales:

Čačimasa kado manuš vi vo sas lesa, ke vo si Galileano.

₆₀O Petri del palpale:

Manuša, me či žianav so tu phenes.

Strazo ande kudia vramia, sar vo inke delas duma, o kokošo gjilabel. ₆₁O Baro amboldinisailo, dikhel pe o Petri. Ai o Petri dias pe godji ka e vorba kai o Baro phendiasas leske: Angla savořende ke o kokošo gjilabel adies, tu phenesa trivar ke či prinžiares man. ₆₂Ai anklisto avri, vo rovel zurales.

₆₃Le manuš kai ninkeren le Jesus maren mui lestar, ai malaven les. ₆₄Von garade lesko mui ai pušen les, phenenas:

De pe o gor kon malavel tu.

₆₅Ai von phenen pe leste but kaver lažiave.

₆₆Kana o dies areslo, le purane anda o narodo, le bare raša ai le zakonaria kjidinisaile, ai andine le Jesus ande pengi kris židovitsko. ₆₇Von phenen:

Te san tu o Kristo, phen les amenge.

O Jesus del len palpale:

Te me phenava les tumenge, tume či patian tume; ₆₈ai, te pušiava me tumendar, tume či dena ma palpale. ₆₉De akanara o Šiav le manušesko bešela pe e čači katar o Del o Mai Zuralo.

₇₀Sa phenenas:

Kadia tu san o Šiav le Devlesko?

Ai vo del palpale:

Tume phenen, me sim.

₇₁Atunči von phenen:

So mai trubun ame martururi? ame ašundiam les ame anda lesko mui.