Jono 19

₁Atunči o Pilato lias le Jesus, ai kerdias te maren les řaiansa. ₂Le ketani khuvde jekh kurona kanřengi, kai von thode pe lesko šero, ai von thode pe leste jekh bunda loli; porme, pašile paša leste. ₃Von phenenas: Unpači, amperato le Židovongo! Ai von denas les palmi.

₄O Pilato mai anklisto avri, ai phenel le Židovonge: Eta, me anav les tumenge avri, eta ke tume te žianen ke me či arakhav ande leste khanči nasul. ₅Kadia o Jesus anklisto avri, si pe leste e kurona le kanřengi ai e bunda loli. O Pilato phenel lenge: Eta o manuš.

₆Kana le bare raša ai le služi dikhle les, von tsipin: Amblav! amblav!

O Pilato phenel lenge: Len les tume, ai amblaven les pe o trušul; ke me, me či arakhav nasul ande leste.

₇Le Židovuri den les palpale: Amen si ame jekh zakono; ai, sar si amaro zakono, vo trubul te merel, ke vo phendias peske o Šiav le Devlesko.

₈Kana o Pilato ašundias kudia vorba, lias les mai bari dar. ₉Vo dias andre ande o kulvari, ai vo phenel le Jesusoske: Katar san tu?

Numa o Jesus či del les khanči palpale. ₁₀O Pilato phenel leske: Mansa či des tu duma? Či žianes tu ke si ma e putiaria te karfov tu pe jekh trušul, ai ke si ma e putiaria te mukav tu?

₁₁O Jesus del palpale: Tut nai tu pe mande či jekh putiaria, te na avilinosas dini tuke opral. Sa anda kadia kudo kai del ma tute kerel jekh mai bari bezex.

₁₂De kothar, o Pilato rodelas te mukel les. Numa le Židovuri tsipinas: Te mukesas les tu, tu či san o vortako le Amperatosko. Kon-godi kerdiol amperato phenel-pe pe o Amperato.

₁₃O Pilato, ašundias kadala vorbi, andias le Jesus avri; ai vo bešlo pe o skamin la krisako, ande o than kai akharen les e Vurma tsiglengi, ai židovitsko Gabata. ₁₄Sas kai lašiaren e Patradi, ai pašte mismeri, o Pilato phenel le Židovonge: Eta tumaro amperato.

₁₅Numa von tsipin: mudar les, amblav les pe o trušul!

O Pilato phenel lenge: Amblavava me tumare amperatos pe o trušul?

Le raša bare den palpale: Amen si ame amperato ferdi o Tsesar.

₁₆Atunči vo dias les lenge te karfon les pe o trušul.

Von kadia line le Jesus, ai ningerde les. ₁₇O Jesus ningerel pesko trušul, areslo ande o than Šeresko, kai akharen les židovitsko Golgota. ₁₈Kothe vo sas amblado, ai dui aver lesa, jekh pa sako rig, ai o Jesus maškaral. ₁₉O Pilato kerel jekh ramomos kai thodias les pe o trušul, ai kai si kadia: Jesus anda o Nazaret, amperato le Židovongo. ₂₀But anda le Židovuri gjinde kudo ramomos, ke o than kai sas thodino o Jesus po trušul, sas paša o foro. Sas ramome židovitsko, grekitsko ai latinitsko. ₂₁Le raša bare katar le Židovuri phenen ka o Pilato: Na ramosar: Amperato le Židovongo. Numa ramosar ke vo phendias: Me sim amperato le Židovongo.

₂₂O Pilato del anglal: So me ramosardem, ramosardem les.

₂₃Le ketani, pala ke karfosarde le Jesus pe o trušul, line leske tsalia, ai hulade len ande štar parti, jekh pe sako ketano. Von mai line lesko tsolo, kai nas suvdo, anda jekh kotor de opral ži tele. Ai von phende maškar pende: ₂₄Te na šinas les, numa khelas ame kaske avela. Kadia areslias te kerdiol e vorba kai sas ramome:

Von hulade muře tsalia. Ai khelde pe kon te lel muřo tsolo.

Eta so kerde le ketani.

₂₅Paša o trušul le Jesusosko bešen leski dei ai e phei leska daki, e Maria, řomni le Klopaski, ai e Maria anda e Magdala. ₂₆O Jesus, dikhlias peska da, ai paša late le vortakos kai vo kamelas, phenel ka peski dei: Žiuvlio, eta tjiro šiav.

₂₇Porme phenel le vortakoske: Eta tjiri dei. Ai, de kothar, o vortako lias la peste.

₂₈Pala kudia, o Jesus, kai žianelas ke si sa gata, phenel, eta ke te o ramomos getol pe: Trušalo sim.

₂₉Sas kothe jekh kanta pherdi šut. Le ketani pherde jekh dirza, ai, phangle la pe jekh krianga anda o hisopo, von pašarde la ka lesko mui. ₃₀Kana o Jesus lias o šut, vo phenel: Sa si gata.

Ai teliardias o šero, vo dias palpale o duxo.

₃₁Ande e dar ke le staturi te na bešen pe o trušul žikin si o sabato, ai kudo dies o sabato si jekh baro dies, kai si te lašiaren le Židovuri, mangen katar o Pilato te phagen le čanga le ambladenge te meren angla o sabato, ai te len le tele. ₃₂Le ketani avile kadia, ai phangle le čanga le mai anglunoske, porme le kavreske kai sas amblado lesa. ₃₃Pašile paša o Jesus, ai dikhle les ke si inke mulo, von či phagle leske čanga. ₃₄Numa jekh anda le ketani xiviardias lesko prašav jekha xanřesa, ai strazo anklisto avri rat ai pai. ₃₅Kudo kai dikhlias les si marturo, ai leski marturia si vorta; ai vo žianel ke phenel čačimos, eta te patiana vi tume. ₃₆Kadala dieli aresle, eta ke te o Ramomos getol pe: Či jekh anda leske kokala či avena inčarde. ₃₇Ai pe kaver rig o Ramomos mai phenel: Von dikhena kudales kai von pusade.

₃₈Pala kudia, o Josef anda o Arimate, kai sas vortako le Jesusosko numa garades ke daralas katar le Židovuri, manglias katar o Pilato te lel o stato le Jesusosko. Ai o Pilato muklias les. Vo kadia avilo, ai lias o stato le Jesusosko. ₃₉O Nikodem, kai angla savořende gelosas ka o Jesus riate, vi vo avilo, andias ande jekh hulado pašte trianda kilo mira ai aloes. ₄₀Von line kadia o stato le Jesusosko, ai phangle les dirzensa le duxiansa, sar si o zakono t'angropon le Židovon. ₄₁Eta, sas jekh kimpo ande o than kai o Jesus sas amblado, ande o kimpo jekh groapoševo nevo, kai inke khonik nas andre. ₄₂Kothe thode le Jesus, pala ke le Židovuri lašiarenas pe, ke o groapoševo sas paše.