Jakob 1

₁O Jakob, sluga le Devleski ai katar o Rai o Jesus Kristo,

ka le deš-u-dui kumpani kai si puřitsime, impači!

₂Muře phralale, dikhen sa le but zumaimata sar jekh diela vesel kai šai avel pe tumende, ₃žianen ke o zumaimos tumare patiamasko del e řabda. ₄Numa trubul ke e řabda kerel mišto peski butji, eta tume t'aven vorta ai gata, ai te na peren ande khanči. ₅Te si anda tumende varekon ke nai les godji, te mangel la katar o Del, kai del sakones sar kamel ai bi te pušel, ai avela les dino. ₆Numa te mangel la patiamasa, te na gindil aver fialo; ke kudo kai gindil aver fialo si sar le talazuri la mariake, miškine katar e balval spidine pe jekh rig ai e kaver. ₇Ke jekh kasavo manuš te na gindil ke vo lela vareso katar o Baro: ₈Si jekh manuš kai či žianel so vo kamel, rigate anda sa peske vurmi.

₉Ke o phral kai si mai tele te luvudil pe ke uštel. ₁₀Ke o barvalo, aver fialo, te luvudil pe anda pesko kovlimos; ke vo nakhela sar e luludi la čaraki. ₁₁O kham uštilo peske tatimasa kai phabarel, vo šukiardias le čaria, lenge luludia pele, ai lengi šukarimos bilaili: kadia o barvalo rimola pe ande so vo kamel te kerel.

₁₂Veselo o manuš kai ninkerel o zumaimos, vo lela e kurona le traioski, kai o Baro phendias ke del la ka kudala kai kamen les. ₁₃Ke khonik, kana si zumado, te na phenel: O Del si kai zumavel ma. Ke o Del naštil te avel zumado katar o nasul, ai vo či zumavel khanikas. ₁₄Numa sako si zumado kana si lino ai astardo katar so vo kamel. ₁₅Porme so kamel, kana si gata, del e bezex; ai e bezex, kana getol pe, del e martia.

₁₆Te na šibin tume, muře phral dragi: ₁₇sa o mai lašio mištimos ai sa o mai lašio dinimos vulel de opral, katar o Dad la vedariako, kaste nai pařudimos ai či kerniol pe te kerel ušialin. ₁₈Vo kerdias amen sar vo kamlias, katar e vorba le čačimaski, eta t'avas sar te phenas le mai angluni kai si kerde lestar.

₁₉Te žianen, muře phral dragi, kadia. Ke sako manuš te gribil pe t'ašunel, kovles te del duma, kovles te xoliavol; ₂₀ke o xoli le manušeski či kerel e kris le Devleski. ₂₁Sa anda kudia, šiuden sa o mahrime ai sa e xitrenia, len kovles mišto e vorba kai si thodini ande tumende, ai kai šai skipil tumare duxuri.

₂₂Keren opre e vorba e Devleski, ai na ferdi ašunen la, te xoxaven tume korkořo, katar le falši ginduri. ₂₃Ke, te si varekon ke ašunel e vorba ai či kerel so phenel, si jekh fialo sar jekh manuš kai dikhel ande jekh glinda pesko mui, ₂₄ai kai, pala ke dikhlias pe, žialtar, ai strazo vo bustrel sar vo sas. ₂₅Numa kudo kai thol pesko dikhimos ande o zakono o lašio, o zakono le skipimasko, ai kai ninkerel pe leste, ai či bustrel so ašundias, numa kerel kadia, kudo avela veselo ande so vo kerel.

₂₆Te si varekon ke gindil ke patial, bi te ninkerel peski šib phangli, numa kai kerniol pesko ilo, o patiamos kudale manušesko si intaino. ₂₇O patiamos vužio ai bi makhlo, angla o Del amaro Dad, si te žias te dikhes le bidadenge ai le phivlian ande lengo nekazo, te len pe sama katar o mahrimos la lumiako.