Jakob 2

₁Muře phralale kai patian ande amaro vestime Rai o Jesus Kristo te keren le manušensa sar jekh fialo. ₂Den tume godji, čačes, ke del andre kai tume san ande e khangeri jekh manuš jekha angrustiasa sunakuni ai jekha tsaliasa sar mai šukar, ai ke vi del andre jekh čořo nai mišto uriado; ₃t'avela te šiuden tumare dikhimata karing kudo kai si les e tsalia šukar, ai te tume phenen leske: Tu, beš kathe pe kako than pativalo! Ai te phenena tume le čořeske: Tu, beš katka pe puřende! vai te na niči: Beš kai thav muře punře! ₄Nai ke ande tumende dikhen sar si le manuš, ai keren kris tumare nasule gindonsa?

₅Ašunen, muře phral dragi: O Del či alosardias vo le čořen ka le jakha la lumiake, t'aven von barvale ande o patiamos, ai t'avel lenge e amperetsia kai vo phendias ke del la kudalenge kai si leske drago? ₆Ai tume, tume teliaren le čořes! Nai le barvale kai porončin pe tumende, ai kai ningeren tumen angla le krisa? ₇Nai von kai den pe o lažiav o šukar anav kai si tumaro?

₈Te kerena tume o zakono amperatisko, sar si ramome: T'avel tuke drago tjiro vortako sar kames tu tu, tume keren mišto. ₉Numa tume te na keren sar jekh, fialo sakoneske tume keren jekh bezex, tume san dine strafo katar o zakono sar kudala kai phagle e kris. ₁₀Ke kon-godi lel sama sa o zakono, numa kerel bezex pe ferdi jekh poronka, si došalo anda sa. ₁₁Čačes, kudo kai phendias: Tu či keresa kurvetsia, vi mai phendas: Tu či mudaresa. Eta, tu či keres kurvetsia, numa tu keres jekh merimos, tu areses te šines o zakono. ₁₂Den duma ai keren sar t'aven dine kris katar jekh zakono slobodo, ₁₃ke e kris si bi milako kudaleske kai nas leske mila. E mila niril e kris.

₁₄Muře phralale, so avela kudaleske kai phenel ke si les o patiamos te nai les leske butia? O patiamos šai skipil les? ₁₅Te si jekh phral vai jekh phei nange ai nai len so te xan sako dies, ₁₆ai ke jekh anda tumende phenel lenge: Žian ande e patia, tation ai pravardion! ai ke tume či den len so trubul o stato, so avela kudo? ₁₇Kadia si anda o patiamos; O patiamos korkořo bi le butiango si mulo.

₁₈Numa uni phenena: Tu, si tut o patiamos; ai me, si ma le butia. Sikav mange tjiro patiamos bi le butiango, ai me, sikavava tuke o patiamos katar muře butia. ₁₉Tu patias ke si ferdi jekh Del, tu keres mišto; vi le demonuri patian, ai von isdran. ₂₀Kames tu te žianes, manuša dilo, ke o patiamos bi le butiango si intaino? ₂₁O Abraham, amaro dad, nas vo čačardo katar peske butia, kana vo dias peske šiaves o Isak pe o altari? ₂₂Tu dikhes ke lesko patiamos kerdias butile butiansa, ai ke katar le butia o patiamos kerdilo sar mai mišto. ₂₃Kadia aresel so phenel o ramomos: O Abraham patiaias ande o Del, ai kudia sas leske laši kris; ai vo sas akhardo vortako le Devlesko. ₂₄Tume dikhen ke o manuš si kerdu vorta angle o Del katar le butia, ai na ferdi katar o patiamos.

₂₅E Rahab e kurva nas vi voi čačardi katar le butia, kana voi lias sama katar le tradine ai kerdias te žiantar pa jekh kaver vurma?

₂₆Sar o stato bi duxosko si mulo, sa kadia o patiamos bi le butiango si mulo.