Galatian 6

₁Phralale, te si jekh manuš ke len les ke kerdias varesavo doš, tume kai san ande o Duxo, vazden les jekhe kovle duxosa. Le tu sama, daratar ke vi šai t'aves zumado. ₂Ninkeren o pharimos jekh le kavreske, ai tume kerena kadia o zakono le Kristosko. ₃Te si varekon ke gindil pe ke vo si varekon, makar ke von nai khanči, vo korkořo diliarel pe. ₄Ke sako te lel sama so kerel, ai atunči šai luvudil pe katar leske butia, na sar lela sama sar keren le kavre; ₅Ke sako ningerela pesko pharimos.

₆Ke kudo kai sikiol e vorba te phenel sa le mištimata kudaleske kai sikiarel les.

₇Na šibin tume: či maren mui katar o Del. Sa so jekh manuš thodias te bariol, vo kadia kjidela. ₈Kudo kai thol te bariol so si drago peske, kjidela o merimos, numa kudo kai bariarel so si drago le Duxoske kjidela katar o Duxo o traio pe sakda. ₉Te na mukas ame te na keras o mištimos; ke ame kjidasa kana avela e vramia, te na mukasa ame tele. ₁₀Kadi si, žikin šai daštisaras, te keras o mištimos karing sa, ai mai but karing le phral kai patian.

₁₁Dikhen če bare bukvensa sar me ramosardem tumenge anda muřo vast ₁₂Sa kudala kai kamen t'aven tumenge drago sar si o mas thon pe tumende zor te šinen tume, eta ferdi te na maren le pala o trušul le Kristosko. ₁₃Ke le šinde inke von či len sama o Zakono; numa von kamen t'aven tume šinde, te luvudin pe anda o semno anda tumaro mas. ₁₄So si mange, dur mandar o gindo te luvudiv ma katar jekh kaver diela ke ferdi o trušul amare Baresko o Jesus Kristo. E lumia muli pe o trušul mange, ai me mulem la lumiake. ₁₅Ke nai khanči ke te san šindo vai te na san šindo; so si vareso si, t'aves jekh nevo manuš, katar o trušul le Kristosko. ₁₆Patia ai mila pe sa kudala kai len sama kudia diela, ai pe o Israel katar o Del!

₁₇Ke khonik de akanara te na nekežil ma, ke me ninkerav pe muřo stato le semnuri katar o Jesus.

₁₈Phralale, ka e dragostia katar amaro Rai o Jesus Kristo t'avel tumare duxosa! Amen!