Efesian 1

₁O Paul, apostolo katar o Jesus Kristo sar kamel o Del, ka le svintsi kai si ande o Efeso ai ka le čače ande o Jesus Kristo; ₂ke o mištimos ai e patia t'aven tumenge dine katar o Del amaro Dad ai katar o Rai o Jesus Kristo.

₃Svinto t'avel O Del, o Dad amare Baresko o Jesus Kristo, kai svintsisardias amen ande sako svintsimos duxosko ande le thana le čereske ande o Kristo! ₄Ande leste o Del alosardias amen angla savořende t'avel e lumia, t'avas ame svintsi ai bi došake angla o Kristo, ₅šinadias amen ande peski dragostia t'avas le šiave le Devleske katar o Jesus Kristo, sar vo kamel t'avel leske drago. ₆Te luvudisaras le Devles pe lesko mištimos kai vo dias ivia amen anda pesko šiav kai kamel mai but.

₇Ande o Kristo amen si ame o pokjinimos katar lesko rat, te lel amare bezexa, pala o barvalimos le mištimasko le Devlesko, ₈kai vo thodias but pe amende. Katar sako fialo žianglimos ai godiaverimos, ₉kerdias vo te žianas so si e čudenia kai vo kamlias, o mištimos kai thodias vo ande o Kristo. ₁₀O Del kerela so kamel kana getona pe le vrami, te kjidel sa ande o Kristo, so si ande o čeri ai kudia so si pe e phuv.

₁₁Ande o Kristo akhardias vi ame, sam vuže šinade sar kamel kudo kai kerel sa le dieli sar vo kamel. ₁₂Eta te ame služisaras te luvudisaras lesko vestimos, ame kai de anda o gor ažiukerdiam le Kristos.

₁₃Vi ande leste, pala ke tume ašundian e vorba le čačimaski, e Laši Viasta tumari skipimaski, ande leste tume patianas ai tume san pečatuime katar o Svinto Duxo kai sas phendo tumenge. ₁₄Kudia si jekh mištimos katar so si t'avel amenge, te skipisarel kudalen kai si le Devleske. Te luvudisaras lesko vestimos.

₁₅Sa anda kudia vi me, kana me ašundem ke den duma pa tumaro patiamos ande o Rai o Jesus ai pa tumari mila pe sa le svintsi, ₁₆me či mukav ma te na řudjiv tumenge. Phenav pa tumende ande muře řudjimata, ₁₇eta ke o Del katar amaro Rai o Jesus Kristo, o Dad o vestime, te del tumen jekh duxo godiako ai te žianen les; ₁₈ai ke kerel te strefian tumare jakha ande tumaro ilo, te tume te žianen so tume ažiukeren kai si astardo ka so vo akharel, so si lesko barvalimos le vestimasko kai garavel peske narodoske, ₁₉ai sar si bari ande amende kai patiaias leski zor. Te sikadiol kadia zor mišto sar kana ₂₀vo thodias la ande o Kristo, kai živindisailo katar le mule, ai vazdias les te bešel pe peski čači rig ande le thana le čereske. ₂₁Amperetsil opral sa kai porončin, pe sa le bare, pe sa zurale, pe sa birevia, ai pe sako anav kai šai mothon, na ferdi anda kadala berš, numa vi pe le berš kai avena. ₂₂Vo sa thodias tela leske punře, ai vo dias les sar birevo o mai baro ka e Khangeri, ₂₃kai si lesko stato, o pherdimos kudalesko kai pherel sa e lumia.