Apostoli 3

₁O Petri ai o Jono anklenas ande jekh than ka o templo, ka o časo kai řudjin; sas o trinto časo pala mismeri. ₂Sas jekh manuš bango dekin arakhadilo, kai ningerenas les ai thonas les sako dies ka o vudar le templosko kai akharel les Šukar, te mangel vareso kudalendar kai den andre ande o templo. ₃Kudo manuš, dikhelas le Petri ai le Jono kai sas te den andre, manglias lendar vareso. ₄O Petri, sar vi o Jono thodine le jakha pe leste, ai phenel: Dikh pe amende. ₅Ai vo dikhel pe lende zurales, ažukerelas te lel lendar vareso. ₆Atunči o Petri phenel leske: Nai ma či rup, či sunakai; numa so si ma dav les tuke: ande o anav o Jesus Kristo anda o Nazaret, ušti ai phir. ₇Ai lias les katar o vast o čačo, vo uštiadias les. Ande kudo momento, leske punře ai leske kilikia zuraile; ₈pe jekh xutimos vo sas pe punřende, ai thodias pe te phirel. Vo dias lensa ande o templo, phirelas, xutelas, ai luvudilas le Devles. ₉Sa e lumia dikhlias les ke phirel ai luvudil le Devles. ₁₀Von prinžiaren ke vo si kudo kai bešelas ka o Šukar Vudar le templosko te mangel vareso, ai von pherdile šodo ai sas lenge šodo pala so areslias leske.

₁₁Sar vo či mukelas le Petri ai le Jono, sa o narodo kai sas lenge šodo našenas karing lende, ka o vudar phenen leske katar o Salomon. ₁₂O Petri, dikhlias kudia, phenel le narodoske: Manuš anda o Israel, sostar si tumenge šodo anda kadia? Sostar dikhen tume pe amende, sar t'avel katar amari zor vai katar amaro patiamos ke ame kerdiam te phirel kado manuš? ₁₃O Del katar o Abraham, katar o Isak kai katar o Jakob, o Del amare dadengo, luvudisardias peska sluga o Jesus, kai tume dias les ande o vast ai či prinžiardian les angla o Pilato, kai kamelas te mukel les. ₁₄Tume či prinžiardian le Svintos ai le Vorta, ai tume manglian te muken tumenge jekhes kai mudarel. ₁₅Tume kerdian te merel o Prinso le traiosko, kai o Del živindisardias les katar le mule; ame sam martururi. ₁₆Si katar o patiamos ande lesko anav kai lesko anav zuriardias kudales kai tume dikhen ai žianen; si o patiamos ande leste kai dias kadale manušes sa kado sastimos, angla sa tumende.

₁₇Ai akana, phralale, me žianav ke tume kerdian kudia ke či žianenas, ai vi tumare birevia. ₁₈Numa o Del kerdias kadia so vo phendiasas angla savořende pa o mui katar sa peske profeturi, ke lesko Kristo trubulas te kjinuil. ₁₉Kein tume kadia ai pařuven tume, ke tumare bezexa t'aven khosle. ₂₀Eta ke le vremi hodinake aven katar o Baro, ai ke te tradel kudales kai sas tumenge šinado, o Jesus Kristo, ₂₁kai o čeri trubul te lel les ži ka e vramia kai thola o Del palpale sa le dieli, kai o Del diasas duma pa lende angla savořende katar o mui katar peske svintsi profeturi. ₂₂O Moše phendias: O Baro tumaro Del ankalavela anda tumende jekhe profetos sar mande, tume ašunena leste ande sa so vo phenela tumenge, ₂₃ai kon-godi či ašunela ka kudo profeto avela tradino anda o narodo. ₂₄Sa le profeturi kai dine duma jekh pala kavreste de katar o Samuel, von phende kado dies. ₂₅Tume san le šiave katar le profeturi ai e patia kai o Del kerdias tumare dadensa, kai phendias ka o Abraham: Sa le vitsi pa e phuv avena svintsime katar leski vitsa. ₂₆Si tumenge angla savořende kai o Del vazdias peska sluga ai tradias les tumenge te svintsil tume, te del rigate sako anda tumende katar leske bezexa.