Apostoli 4

₁Žikin o Petri ai o Jono denas duma le narodosa, avile le bare raša, o fitsiri le templosko, ai le Sadusenuri. ₂Nai lenge mišto ke von sikiaren o narodo, ai phenen pa o Jesus ke si te živindin le mule. ₃Von thodine le vast pe lende, ai šiude le ande e temnitsa ži pe teharin; ke sas vuže e riat. ₄Numa, but anda kudala kai ašunde e vorba patian, ai kana gjinde le manuš sas pašte panž mii.

₅Teharin, le birevia le narodoske, le purane, ai kudala kai ramon, kjidinisaile ande o Jerusalem. ₆Ai o Anas, o baro rašai o Kaifas, o Jono, o Alexandre, ai sa kudala kai sas anda e vitsa katar le bare raša. ₇Von thode maškar pende le Petri ai le Jono, ai pušen lendar: Katar če putiaria, vai ande o anav savesko tume kerdian kudia?

₈Atunči o Petri, pherdo Svinto Duxo, phenel lenge: Birevia le narodoske, ai le phure anda o Israel, ₉sar amen pušen ame adies pala jekh mištimos kai sas dino jekhe nasvale manušeske, eta ame sar te phenas sar vo sas sastilo. ₁₀Te žianen sa, ai ke sa o narodo anda o Israel te žianel! Si katar o anav o Jesus Kristo anda o Nazaret, kai tume ambladian, ai kai o Del živindisardias katar le mule, si lestar ke kado manuš sikadiol sa sasto angla tumende.

₁₂Nai skipimos ande či jekh aver; ke nai tela o čeri či jekh kaver anav kai si dino ka le manuš, katar savo ame trubusaras t'avas skipime.

₁₃Kana von dikhle e zor katar o Petri ai o Jono, lenge sas šodo, žianenas ke von sas manuš anda o narodo bi te sikion; ai von prinžiarde ke von sas le Jesusosa. ₁₄Numa sar von dikhenas kothe paše paša lende o manuš kai sastilo, von naštin mai te phenen khanči. ₁₅Von dine len ordina t'anklen avri anda e kris e židovitsko, ai den pe duma maškar pende. ₁₆Phenenas: So kerasa ame kadale manušenge? Ke sa o narodo anda o Jerusalem dikhle ke jekh čudenia si sikardi kerdi lendar, ai ame naštisaras te das les palpale. ₁₇Numa, eta ke te e diela te na mai žial mai angle maškar o narodo, te na mukas le te das len dar d'akanara te den duma varekaske pe kudo anav.

₁₈Ai akharde le, von phende lenge zurales te na mai den duma ai te na sikiaren ande o anav le Jesusosko. ₁₉O Petri ai o Jono den len palpale: Den kris te si vorta, angla o Del, te šunas tumen sar mai mišto ke le Devles; ₂₀ke ame naštisaras te na das duma pa so ame dikhlias ai ašundiam. ₂₁Von mai daraven le, ai mukle le, či žianenas sar te den len strafo, pala o narodo, ke sa luvudin le Devles anda so areslias. ₂₂Ke o manuš kai sas vo sasto anda kudo nasvalimos čudato sas phuro de mai but sar štar-var-deš beršengo.

₂₃Pala ke mukle len, von gele karing penge, ai mothon sa sogodi le bare raša ai le phure pende lenge. ₂₄Kana von ašunde, von vazdine ka o Del o hango sa ande jekh than, ai phenen: Baria, tu kai kerdian o čeri, e phuv, e maria, ai sogodi si, ₂₅tu phendian katar o Svinto Duxo, pa o mui amare dadesko, leski sluga o David:

₂₇Kadia si, pe tjiro svinto sluga Jesus, kai tu svintsisardian, o Herodo ai o Pontius Pilato thode ande jekh than ande kado foro le themensa ai le narodosa anda o Israel. ₂₈Kamle te keren sa so ande e zor e tjiri tu gindisardian angla savořende. ₂₉Ai akana, Baria, dikh so von daraven, ai de ka tjire služi te phenen tjiri vorba zorasa, ₃₀ai vazde tjiro vast, t'aven sastimata, čudeni ai šodo, katar o anav svinto katar tjiro sluga o Jesus.

₃₁Kana von řudjisarde, o than kai von sas ande isdraias, von sa pherdile Svinto Duxo, ai von phenen e vorba le Devleski la zorasa.

₃₂Le but kudala kai ašunde patianas, sas len ferdi jekh ilo ai jekh duxo. Khonik či phenelas ke so si lesko sas čačes lesko, numa sa sas ande jekh than maškar lende. ₃₃Le apostoli sas but zorasa martururi, phenen sar živindisailo o Rai Jesus. Ai jekh bari dragostia bešel pe lende. ₃₄Ke nai maškar lende či jekh čořo; sa kudala kai sas len kimpuri vai khera bikjinenas le, anenas le love anda so von bikjinde, ₃₅ai thonas le ka le punře le apostolonge; ai denas sakones so trubulas les.

₃₆O Josef, akharen les le apostoli Barnabas, so si kudia o «šiav kai vazdel», Levito, anda e Kipra, ₃₇bikjindias jekh kimpo kai sas les, andias le love, ai thodias le ka le punře le apostolonge.