2 Korintianuri 8

₁Ame keras te žianen, phralale, o mištimos le Devlesko kai sikadiol ande le Khangeria ande e Makedonia. ₂Maškar le but nekazuri kai zumade len, lengi veselia del opral ai makar pengo baro čořimos dine but barvalimata pendar. ₃Von, me šai phenav, dine pendar sar si le, ai inke mai but sar si le, ₄mangle amen zurales o mištimos t'aven partia ande so avela le svintsonge ande Judea. ₅Ai von dine na ferdi sar ame ažiukerasas, numa von dine mai — angle ka o Baro, porme amenge, sar kamlias o Del. ₆Ame mangliam katar o Titus te getol tumende kudia butji lašimaski, sar lias pe angla savořende. ₇Sar tume san laše ande sako diela, ande o patiamos, ande e vorba, ande o žianglimos, kai san laše ande sa, ai ande tumaro kamimos amenge, keren kadia mišto vi karing kudia butji mištimaski.

₈Me či phenav kadia te dav jekh ordina, numa te zumavav, ke keren mišto le kaver, o čačimos tumara milako. ₉Ke tume žianen o mištimos katar amaro Rai o Jesus Kristo, kai sas barvalo, numa pala tumende kerdilo čořo, eta ke katar lesko čořimos tume te barvalen tume.

₁₀Me phenava so gindiv ma pe kudia, ke tumenge avela mai mišto, geton akana so lian te keren o berš kai nakhlo. Tumen sanas le mai angluni na ferdi te keren numa te mangen te keren. ₁₁Geton akana te keren, eta te getol sar si tumen te keren kai thodian angla te keren kudalesa si tumen. ₁₂Te kamen te den, o Del lela tumaro dinimos sar si tumen te den, na sar so nai tumen.

₁₃Ke si t'avel, na te thon tume te vušiaren le kavren t'aven tume ande o nekazo, numa t'avel tumen sa jekh fialo; ₁₄ande e vramia akana so si tumen mai but avela lenge dosta, eta ke so si len mai but sa kadia jekh fialo ažutisarena tumen, kadia si sa jekh fialo, ₁₅sar si ramone:

₁₆Nais t'avel le Devleske ke thodias ande o ilo le Titusko t'ažutil tumen; ₁₇ke vo lias amendar, ai si pherdo laši zorasa ke anda peste korkořo ke vo žial tumende. ₁₈Ame tradas lesa o phral kai luvudin les pala e Laši Viasta kai žianen les ande sa le Khangeria, ₁₉ai kai, mai but, si alome katar le Khangeria t'avel amaro vortako ande kadia butji le dromeski ande kadia butji t'ažutisaras, kai ame keras pe o mištimos le Baresko ai te sikavas ke ame kamas te ažutisaras.

₂₀Ame keras kadia, eta ke te khonik te na prasal ame pala so ame kjidiam, katar ame las sama; ₂₁ke ame rodas so si mišto, na ferdi angla o Baro, numa vi angla le manuš.

₂₂Ame tradas lesa amare phrales, kai ame butivar zumadiam les ande le but dieli, ai kai mai sikavel kadia data ke si les baro čačimos ande tumende. ₂₃Kadia, so si anda o Titus, vo si amensa ai vo si amaro vortako la butiako paša tumende; so mai si anda amare phral, von si tradine katar le Khangeria, o vestimos le Kristosko. ₂₄Den len, angla e fatsa le Khangeriange, te sikaven ke kamen len, ai sikaven lenge ke amen si ame te luvudisavas anda tumende.