2 Korintianuri 2

₁Me gindisailem ande mande te na avav palpale tumende te nekeživ tumen. ₂Ke me te nekeživ tumen, kon šai veselila man, te na kudo kai si nekežime mandar? ₃Me ramosardem sar te na zumavav tumen; kana me aresava, na mangav te avel man nekazo kudalendar kai trubulas te den ma veselia; si ma kudo patiamos ke muři veselia si vi tumari savořengi. ₄Si ande jekh baro nekazo, o ilo darasa, ai but asvensa, ke me ramosardem tumenge, na ke tume te nekežin tume, numa ke tume te žianen savo baro kamimos si ma tumenge.

₅Te si varekon kai nekežisardias kavres o nekazo, či nekežisardias man, numa tumen sa, vai jekh partia, te na butiarav but. ₆Aresel kudale manušeske ke si strafuime katar le mai but tumendar. ₇Kadia trubul mai mišto te jertin leske ai te miluin les, ke te na avel pe leste jekh mai baro nekežimos. ₈Me mangava tumen kadia t'avel tumenge mila anda leste; ₉ke me ramosardem tumenge kadia te žianav kana zumavav tumen, te patian tume man ande sako diela. ₁₀Eta, kaske tume jertin, vi me jertiv; ai so me jertisardem, te jertisardem vareso, si pala tumende, angla o Kristo, ₁₁eta te na mukas ka o Satan te niril pe amende, ke ame žianas so vo kamel te kerel.

₁₂So mai si, kana me areslem ande o Troas te phenav e laši viasta le Kristoski, makar ke o Baro puterdias mange jekh vudar, ₁₃nas ma hodina katar o duxo, ke me či arakhavas le Titus, muřo phral. Sa anda kudia, me muklem len, me gelemtar ande e Makedonia.

₁₄Nais t'avel le Devleske, kai kerdias te nirisaras sakda le Kristosa, ai kai kerel te sikiaras o Kristo sar jekh gudlo khandimos! ₁₅Ame sam, čačes, le Devleske o lašio khandimos katar o Kristo, kudalenge kai si skipime ai maškar kudala kai xasavon: ₁₆Le jekhenge, jekh khandimos mulengo, del o merimos; le kavrenge, jekh khandimos traimasko, del o traio. Kon šai kerel kadia butji? ₁₇Ke ame či bikjinas e vorba le Devleski, sar keren but; numa si čačimasa, si anda e partia le Devleski, ke ame das duma pa o Kristo angla o Del.