2 Korintianuri 1

₁Lil katar o Paul, apostolo katar o Jesus Kristo sar kamel o Del, ai katar o phral o Timoteo,

ka e Khangeri le Devleski kai si ande o Korinto, ai ka sa le svintsi kai si ande e Gretsia; ₂Ke o dragimos ai e patia t'avel tumenge katar o Del ai katar o Rai o Jesus Kristo!

₃Svintsime t'avel o Del, o Dad amare Baresko o Jesus Kristo, o Del la milako ai o Del kai zuriarel, ₄kai zuriarel amen ande sa amare nekazo, eta ke, katar e zor kai ame si amen katar o Del, ame te šai zuriaras kudalen kai si ande o nekazo! ₅Ke, sar liam but dukha le Kristoske sa jekh fialo lasa jekh baro mištimos katar o Kristo. ₆Te sam ame nekežime, si kudia te len tume e zor ai o skipimos; te liam ame zor, si te len tume e zor te ninkeren sa kudala kjinuimata kai ame ninkeras. ₇Ai so ame ažiukeras karing tumende si zurales, ke ame žianas ke, ke te si vi tumen kjinuimos sar ame, tume vi avela tume mila amensa.

₈Ame kamas, čačes, te žianen tumen, so amen kjinuisaras ande e Azia, ke ame samas pria tela pharimos, mai but so šai ninkerdiam, kadia ke ame darailiam ke či traisaras. ₉Ai ame dikhliam siguro ke si te meras, eta te na patias ame ande amende, numa te thas kudia ande o Del, kai živindil le mulen. ₁₀Vo si kai skipisardias amen ai skipila amen katar savo merimos, vo katar ame ažiukeras ke si te mai skipil amen. ₁₁Vi tume ažutisaren ame tumare řudjimansa, eta ke e dragostia kai ame lias katar but žene ai t'avel butenge te naisin pala amende.

₁₂So si amaro vestimos, si so ame sam martururi amara godiake, ke ame sam tradine ande e lumia, ai mai but karing tumende, vužimasa ai svintsimasa angla o Del, na jekha godiasa manušeski, numa le mištimasa katar o Del. ₁₃Ame či ramosaras aver diela ferdi so tume gjinen, ai so tume prinžiaren. Ai me gindiv ma ke tume prinžiarena ži ande o gor, ₁₄sar tume prinžiardian jekh partia ke ame sam tumaro vestimos, sar vi tume avena amaro o dies katar o Rai o Jesus.

₁₅Ande kado spidimos, me kamavas angla savořende te žiav karing tumende, eta t'avel tumen duvar mištimos; ₁₆me kamlemas te nakhav tumendar kana žiav ande e Makedonia, porme kana avav anda e Makedonia pale, ai tume te ažutenas man te žiav ande e Judea. ₁₇Kana kamavas kudia, me simas vušoro? Vai so me gindisailem sas gindo masesko, kadia ke si ande mande o ei ai o niči? ₁₈Kadia sar ke o Del si čačo, e vorba kai ame phendiam tumenge nas «ei» ai «niči». ₁₉Ke o Šiav le Devlesko, o Jesus Kristo, kai sas phendo amendar maškar tumende, mandar, ai katar o Silas, ai katar o Timoteo, nai «ei» ai «niči», numa sa «ei» si ₂₀ke, sar phendias o Del, ande leste si o «ei»; sa anda kudia mai si o «Amen» lestar phendo vi tumenge vi amenge te vestisaras le Devles. ₂₁Ai kudo kai zuriarel amen ande o Kristo, ai ka svintsisardias amen, si o Del, ₂₂savo thodias e pečata pe amende ai thodias ande amaro ilo o mai angluno pokjinimos le Duxosko.

₂₃Eta, me lav marturo le Devles pe muřo duxo, ke si te na rimov tumen ke me či mai avilem ande o Korinto; ₂₄na te ame porončisaras tumen so te patian, numa te veselisavas tumensa; žianas ke tume ninkeren ande o patiamos.