Marcu 1

₁Principiu di u Vangelu di Ghjesù Cristu Figliolu di Diu. ₂Cumu ch'ella hè scritta in lu libru di u prufeta Isaia:

₉In quelli ghjorni Ghjesù ghjunse da Nazarè di Galilea è fù battezatu da Ghjuvanni inde u Ghjurdanu. ₁₀A tempu esciutu da l'acqua vide apresi u celu è u Spiritu, sottu forma d'una culomba, chì li facia a stantara sopra. ₁₁Da u celu una voce si fece sente: «tu sì u mio figliolu dilettu. In tè mi sò cumpiaciutu.»

₁₂Senz'altru, u Spiritu u mandò inde u desertu, ₁₃duv'ellu stede quaranta ghjorni è quaranta notte messu à u provu da Satana era inturniatu di fere selvatiche, ma l'anghjuli u servianu.

₁₄Dopu chì Ghjuvanni fù incarceratu, Ghjesù andò in Galilea, predichendu u Vangelu ₁₅è dicendu: «u tempu hè compiu è s'avvicìna u Regnu di Diu: cunvertite vi è credite à u Vangelu.»

₁₆È passendu longu à u mare di Galilea, vide à Simone è à Andria u fratellu chì lampavanu e rete in mare: eranu pescadori. ₁₇È Ghjesù li disse: «Venite cù mè, è di voi ne feraghju pescadori d'omi.» ₁₈È subitu, lascendu e sò rete, u seguitonu. ₁₉È andendu appena più luntanu, vide à Ghjacumu, u figliolu di Zebedeu è à Ghjuvanni u fratellu chì eranu dinò elli inde a barca in traccia d'assestà rete. ₂₀È subitu i chjamò; è elli, lasciatusi u babbu Zebedeu inde a barca cù i so marinari, u seguitonu.

₂₁Poi andonu in Cafarnau; è subitu, u sabbatu, entratu inde a sinagoga, Ghjesù insegnava. ₂₂Eranu meravigliati da a so duttrina. Ci vole à dì ch'ellu insegnava per via di u putere ch'ellu avia è micca cum' è i Maestri di a Lege ₂₃È ci era, inde a sinagoga, un omu sottumessu da un spiritu malignu, chì, à voce rivolta disse: ₂₄«Di chè t'imbrogli, o Ghjesù Nazarenu? Forse sì venutu per mandacci à u sprufondu? A sò quale tù sì: sì u Santu di Diu.» ₂₅Rimpruverendulu Ghjesù li disse: «Falla finita è esci da st'omu.» ₂₆U spiritu malignu, dopu d'avellu straziatu, escì da l'omu briunendu à più pudè. ₂₇Eranu tutti meravigliati è si dumandavanu unu à l'altru: «Cumu spiegà stu fattu? Chì sarà sta duttrina nova è cusì putente? Ne impone ancu à i spiriti maligni è u stanu à sente.» ₂₈È a so rinomina si sparse subitu in tutta a Galilea.

₂₉À tempu esciuti da a sinagoga vensenu in casa di Simone è d'Andria, cù Ghjacumu è Ghjuvanni. ₃₀A socera di Simone era chjinata cù a frebba. À tempu ghjunti, li parlonu d'ella. ₃₁Ghjesù li s'avvicinò, a pigliò pè a manu, l'arrizzò, è ella, sfrebbata, dava capu à tutti. ₃₂A sera, à tardi, à u ciuttà di u sole, li presentonu tutti i malati è l'indemuniati. ₃₃È tutta a cità s'era radunita dananzu à a porta. ₃₄Ne risanò parechji chì eranu acciaccati da diverse malatie è scunviò parechji demonii, senza lascialli parlà, par via ch'elli u cunniscianu.

₃₅Sveghjendusi a mane di notte, Ghjesù escì di casa è andò ind'un locu scantatu duv'ellu precava. ₃₆Ma Simone è quelli chì eranu cun ellu li partinu apressu. ₃₇Avendulu trovu, li dissenu: «Ti cercanu tutti!» ₃₈Ellu rispose: «Andemu pè i paesi di u vicinatu è pè e cità ch' o' predicheghji ancu quallà u Vangelu chì sò esciutu per quessa.» ₃₉È andava per tutta a Galilea, predichendu inde e sinagoghe è scunviendu i demonii.

₄₀Vense à truvallu un leprosu chì li si ricumandava, è, inghjinuchjatusi, li disse: «Sì tù voli, mi poi purificà.» ₄₁È Ghjesù, presu di cumpassione, stese a manu è, tucchendulu, li disse: «Cusì vogliu, sii tù purificatu.» ₄₂Subitu a lepra cascò è l'omu fù purificatu. ₄₃È Ghjesù, u rimandò subitu, fenduli rimproveri ₄₄è dicendu: «Fà casu d'ùn dì nulla à nimu; ma vai è fà ti vede à u capisacerdote, è offri, pè a to purificazione ciò ch'ellu hà ordinatù Musè, da testimunìanza per elli.» ₄₅Ma u leprosu, andatusine, cuminciò à cuntà u fattu à voce rivolta, à tal puntu chì Ghjesù ùn pudia più entre à faccia aparta in cità, è stava fora, inde i lochi scantati. Ma ghjunghjianu da tutte e parte per scuntrallu.