Ghjuanni 3

₁À buleghju à i Farusei, ci era unu chì si chjamava Nicodema, un capu di i Ghjudei. ₂Andeti à truvà à Ghjesù di notti è li dissi: «Rabbì, a sapemu chì tù sè un maestru mandatu da Diu, chì nimu pò fà issi segni chì tù faci s'eddu ùn hà à Diu cun eddu.» ₃Ghjesù risposi è li dissi: «da veru, a ti dicu à chì ùn hè turratu à nascia ùn pò veda u Regnu di Diu.» ₄È Nicodema li dissi: «comu hà da fà, un omu, à nascia quand'eddu hè vechju? Soca pò vulta una antra volta in corpu à a mamma è nascia?» ₅Ghjesù risposi: «da veru a ti dicu, à chì ùn nasci d'acqua è di spiritu, ùn pò entra in lu Regnu di Diu. ₆Ciò chì hè natu da a carri hè carri, è ciò chì hè natu da u Spiritu hè spiritu. ₇Ùn ti maraviddà di ch'e' ti abbii dittu: “ci voli chì vo' torghiti à nascia.” ₈U ventu soffia duv'edda li pari, è senti a so boci, ma ùn sai da induva eddu veni è induva eddu và; cusì hè par ogni omu natu da u Spiritu.» ₉Nicodema risposi è li dissi: è comu pudaria essa? ₁₀Ghjesù risposi è li dissi: tù sè maestru in Israela è ùn la sai? ₁₁A ti dicu da veru, dimu ciò chì no' sapemu è tistimuniemu di ciò chì no' emu vistu, ma voi, a nostra tistimunianza ùn l'accitteti. ₁₂Vi aghju parlatu di i cosi di a tarra è ùn criditi, comu eti da creda s'e' vi parlu di i cosi di u celi? ₁₃È in celi, nimu ci hè cuddatu, for di quiddu chì falò da u celi, u Fiddolu di l'Omu ₁₄È com'eddu innalzò Musè u sarpenti di bronzu in lu disertu, cusì ci voli ch'eddu sia innalzatu u Fiddolu di l'Omu, ₁₅Da chì ogni omu chì credi abbii in eddu a vita eterna.

₁₆«Da tantu chì Diu hà tinutu caru u mondu, hà datu u so Fiddolu solu, da fà chì ogni omu chì credi in eddu ùn sia distruttu ma abbii a vita eterna. ₁₇Chì Diu, u Fiddolu, ùn l'hà micca mandatu in u mondu à ghjudicà u mondu, ma par ch'eddu sia salvu u mondu par via d'eddu. ₁₈À chì credi in eddu ùn hè ghjudicatu; à chì ùn credi hè aghjà ghjudicatu, parch'eddu ùn hà cridutu in lu nomu di u Fiddolu solu di Diu. ₁₉Eccu un ghjudiziu: a luci hè vinuta in u mondu è l'omini ani tinutu caru u bughju inveci di a luci; chì i so opari erani gattivi. ₂₀À chì faci u mali ùn pò pata a luci è ùn s'avvicina da a luci di paura ch'eddi venghini palesi i so opari. ₂₁Ma à chì faci u veru s'avvicina da a luci, da ch'eddu venghi palesu chì i so opari sò stati fatti in Diu.»

₂₂Dopu, Ghjesù ghjunsi cù i discipuli in Ghjudeia, è quandì dà stava cun eddi è battizaia. ₂₃È Ghjuvanni dinò battizaia in Ainoni vicinu à Salema chì quandì dà, ci era monda acqua, è a ghjenti vinia è si facia battizà; ₂₄chì tandu Ghjuvanni ùn era ancu statu imprighjunatu. ₂₅Nascì un cuntrastu trà i discipuli di Ghjuvanni è un Ghjudeiu trattendu si di a purificazioni. ₂₆È ghjunsini à truvà à Ghjuvanni è li dissini: «Rabbì, sai quiddu chì era cù tecu da Ghjurdanu in dà, è chì tù l'ai fattu u tistimoniu, avà battiza, è vani tutti à truvà lu.» ₂₇Ghjuvanni risposi è dissi: «un omu ùn pò piddà cà ciò chì li hè statu datu da u celi. ₂₈Voi stessi seti tistimonii ch'e' aghju dittu: “eiu ùn socu micca u Missia ma li socu statu mandatu da nanzi.” ₂₉Quiddu chì hà a sposa, hè u sposu ma l'amicu intimu di u sposu hè quì, u senti è si ralecra à senta a boci di u sposu; è cusì veni cumpiita a me gioia. ₃₀Eddu ci voli ch'eddu creschi, ed eiu, ch'e' sminuischi.»

₃₁«Quiddu chì veni da l'altu hè sopra à tutti; à chì veni da a tarra, di a tarra hè è da a tarra parla; [Quiddu chì veni da u celi hè sopra à tutti.] ₃₂Ciò ch'eddu hà vistu è intesu, ni tistimunieghja, è a so tistimunianza nimu a ricevi. ₃₃À chì accetta a so tistimunianza, sugella chì Diu hè veru. ₃₄Chì quiddu chì Diu hà mandatu dici i paroli di Diu: Diu u Spiritu u li dà senza misura. ₃₅U Babbu teni caru u Fiddolu è li hà datu tuttu in manu. ₃₆À chì credi in lu Fiddolu, hà a vita eterna; à chì ùn si fida à u Fiddolu, ùn vidarà a vita, ma li hè à dossu a collara di Diu.»