Ghjuanni 2

₁È u terzu ghjornu, ci fù un matrimoniu in Canà di Galilea, è ci era a mamma di Ghjesù. ₂Ghjesù fù invitatu à u matrimoniu cù i so discipuli. ₃È com'eddu ùn ci era più vinu, a mamma di Ghjesù li dissi: «ùn ani micca vinu.» ₄È Ghjesù li dissi: «chì ci hè trà mè è tè, o donna? A me ora ùn hè ancu vinuta.» ₅A mamma dissi à i servi: «feti com'eddu vi diciarà.» ₆È quandì dà ci erani i pili in petra, sei, pronti pà a purificazioni di i Ghjudei, è ugnuna pudia tena sittanta o centu litri. ₇Ghjesù li dissi: «impiitili d'acqua i pili.» È eddi l'impiitini à rasu. ₈È po li dissi: «avà ciutteti è purteti ni à u capifesta.» Eddi purtetini. ₉È u capifesta tastò l'acqua chì era divintata vinu, è ùn sapia da induva eddu vinissi, ma i servi, chì aiani piddatu l'acqua a sapiani; è u capifesta chjamò u sposu ₁₀è li dissi: «ugnunu servi prima u vinu bonu, è po, quand'eddi sò un pocu briachi, u menu bonu; tù u vinu bonu l' ai tinutu insini ad avà.» ₁₁Cusì fù u principiu di i segni fatti da Ghjesù, in Canà di Galilea; palisò a so gloria, è i discipuli criditini in eddu. ₁₂Dopu, trà eddu, a mamma, i frateddi è i discipuli, faletini in Cafarnau, è ùn ci stedini cà pochi ghjorni.

₁₃Si avvicinaia a Pasqua di i Ghjudei, è Ghjesù cuddeti in Ghjerusalema. ₁₄È truveti vinditori di boi, di pecuri è di culombi è cambiatori di soldi, chì pusaiani in lu tempiu; ₁₅si feci una frusta di canapa è i lampeti tutti fora di u tempiu, cù i so pecuri è i so boi, sparrucciò i soldi di i cambiatori è vultulieti i so toli, ₁₆è dissi à quiddi chì vindiani culombi: «cacceti mi tutta issa robba da quì! Di a casa di u me Bapu, ùn ni aveti micca da fà una casa di cumerciu!» ₁₇Tandu i discipuli s'arricurdetini ch'eddu hè scrittu: «a divuzioni pà a to casa mi si manghja». ₁₈I Ghjudei li rispunditini è dissini: «chì segnu ci faci veda, di chì tù poi fà cusì?» ₁₉Ghjesù li risposi è dissi: «distrughjiti issu tempiu, è in trè ghjorni eiu l'arrizzu.» ₂₀Tandu i Ghjudei dissini: «issu tempiu fù custruttu in quarantasei anni, è tù in trè ghjorni l'ai da arrizzà?» ₂₁Ma eddu dicia di u tempiu di a so parsona. ₂₂È da dopu ch'eddu fù risuscitatu da trà li morti, i so discipuli s'arricurdetini ch'eddu aia dittu cusì, è criditini in la Scrittura è in la parola chì Ghjesù aia dittu.

₂₃Quand'eddu era in Ghjerusalema à fà a Pasqua, in lu tempu di a festa, parechji, videndu i segni ch'eddu facia, criditini in lu so nomu; ₂₄ma Ghjesù ùn si ni fidaia chì i cunniscia à tutti ₂₅è ùn aia bisognu chì nimu tistimuniessi par ciò chì tocca à l'omu; chì ciò chì hè in l'omu, a sapia.