1Tandu Pilatu piddeti à Ghjesù è u feci minà di frusta. 2È i suldati intriccetini una curona di spini è a li missini in capu, è li lampetini à dossu un manteddu di porpura, 3Li s'avvicinaiani è diciani: «ti salutemu, o Rè di i Ghjudei?» è u ciaffittaiani. 4È tandu Pilatu vensi fora dinò è li dissi: «eccu, u vi portu dinò fora, chì vo' sappiati ch'e' ùn aghju trovu in eddu colpa nisuna.» 5Tandu Ghjesù vensi fora, purtendu a curona di i spini è u manteddu di a porpura. È Pilatu dici à a ghjenti: «eccu l'omu.» 6Quand'eddi u viditini i capisacerdoti è i guardia briunetini è dissini: «metti lu in croci! In croci?» Pilatu li dici: «piddeti lu voi è mittiti lu in croci; chì eiu ùn trovu in eddu colpa nisuna.» 7I Ghjudei li rispunditini: «noi avemu una Legi, è sicondu a Legi ci voli ch'eddu morghi, parchì eddu s'hè fattu Fiddolu di Diu.»8Intesu issu discorsu, Pilatu fù intimuritu, 9intriti dinò in palazzu è dissi à Ghjesù: «d'induva sè tù?» Ghjesù ùn li feci risposta. 10Tandu Pilatu li dici: «à mè ùn mi parli? Ùn la sai ch'e' aghju u puteri di lintà ti, è aghju u puteri di metta ti in croci?» 11Ghjesù li risposi: «ùn avarii alcun puteri nantu à mè s'eddu ùn ti fussi statu datu da in sù. Par quissa, quiddu chì m'hà missu in manu à tè faci u piccatu ancu più maiò.» 12Da tandu, Pilatu circò di lintà lu; ma i Ghjudei briunaiani dicendu: «sì tù u lenti, ùn sè amicu di Cesaru; à chì si faci rè si rivolta contru à Cesaru.»
13Intesu issi discorsi Pilatu feci escia à Ghjesù è si missi à posà in tribunali in u locu chjamatu u Impitratu , “Gabbatha” in abreiu.
14Era u ghjornu di l'appruntera di a Pasqua, sarà statu meziornu. È dici à i Ghjudei: «eccu u vostru Rè.» 15Tandu quiddi briunetini: porta lu, «porta lu, metti lu in croci.» Pilatu li dissi: «aghju da metta in croci u vostru Rè?» I capisacerdoti rispunditini: «rè ùn ni avemu for di Cesaru.» 16Tandu u li missi in manu da essa crucifissatu.
Tandu piddetini à Ghjesù,
Ghjesù missu in croci
17è, purtendu da par eddu a croci, isciti à via di u locu chjamatu a Chjeccula , chì si dici “Golgotha” in abreiu, 18quandì dà u missini in croci, cù dui altri, unu da ogni latu è Ghjesù à mezu. 19È Pilatu feci fà un iscrittoghju è u missi nantu à a croci; è ci era scrittu: «Ghjesù u Nazarenu, Rè di i Ghjudei.» 20Issu scrittoghju u lighjitini parechji di i Ghjudei, chì u locu duv'è Ghjesù fù missu in croci hè vicinu da a cità, è a scrittura era in abreiu, in latinu è in grecu. 21Tandu i capisacerdoti di i Ghjudei dissini à Pilatu: «ùn iscriva micca: Rè di i Ghjudei, ma: quistu hà dittu: socu u Rè di i Ghjudei.» 22Pilatu risposi: «ciò chì aghju scrittu, aghju scrittu.» 23Quandu eddi missini à Ghjesù in croci, i suldati piddetini a so vistitoghja è ni fecini quattru parti, una par omu, è a tunica. Ma a tunica era senza cusgitura, fatta sana sana cù una stofa sola. 24Tandu dissini trà eddi: «ùn la straccemu micca, ma mittimu la à l'imbusca par sapè à quali edda tuccarà.» Era par ch'edda fussi cumpiita a scrittura chì dici:
si sò spartuti i me panni
è ani missu a me vistitoghja à l'imbusca
Cusì fecini i suldati tandu. 25È à cantu à a croci di Ghjesù staiani a mamma, a suredda di a mamma, Maria di Clopà è Maria a Matalena. 26Ghjesù, videndu a mamma, cù u discipulu ch'eddu tinia caru chì li staia arrittu à cantu, dici à a mamma: «o donna, eccu à to fiddolu.» 27È po dissi à u discipulu: «eccu à mammata» è da quidda ora u discipulu a si piddeti in casa.
A morti di Ghjesù
28Dopu, Ghjesù, chì sapia chì tuttu era compiu, dissi, par ch'edda fussi cumpiita a scrittura: «aghju a seti.» 29È ci era quandì dà un istuvigliu pienu d'acetu; tandu missini una spunga intinta d'acetu nantu una rama d'isopu è li ni tucchetini a bocca. 30Quand'eddu piddeti l'acetu, Ghjesù dissi: «hè compia.» Calò u capu è resi u fiatu.
U fiancu di Ghjesù trapanatu
31Com'edda era l'appruntera di a Pasqua, par ch'eddi ùn istessini i catavari in croci u sabbatu, chì quidda ghjurnata di u sabbatu era sulenna, i Ghjudei dumandetini à Pilatu di fà li truncà i ghjambi è caccià li da in croci. 32Cusì ghjunsini i suldati, trunchetini i ghjambi di u prima, è po di u sicondu di quiddi chì erani in croci cun eddu. 33Ghjunti ch'eddi funu à Ghjesù, quand'eddi vistini ch'eddu era aghjà mortu, ùn li trunchetini micca i ghjambi 34ma unu di i suldati li trapaneti u fiancu cù a lancia, è ni isciti subitu sangui è acqua. 35È quiddu chì hà vistu ni tistimunieghja, è a so tistimunianza hè viritativa, è eddu sà ch'eddu dici u veru, da chì vo' crerghiti ancu voi. 36È cusì fù par ch'edda vinissi cumpiita a scrittura: «ossi ùn li ni sarà troncu mancu unu,» 37È altrò, a scrittura dici dinò: «fighjularani quiddu ch'eddi ani trapanatu.»
Intarru di Ghjesù
38Dopu, Ghjaseppu d'Arimatea, chì era discipulu di Ghjesù à l'appiattu par via di a so paura di i Ghjudei, dumandeti à Pilatu di pudè caccià u catavaru di Ghjesù; è Pilatu a li cuncessi. Tandu andeti è piddeti u catavaru. 39È vensi ancu Nicudemu, quiddu chì a prima volta era vinutu ind'è Ghjesù di notti, è purteti un mischiu di mirra è d'aloè, una cintunara di libri. 40Tandu piddetini u catavaru di Ghjesù è u ingutuppetini di stofa fatta à strisciuli cù l'arumati, com'eddu hè l'usu ind'è i Ghjudei pà i intarri. 41È in u locu duva eddu era statu missu in croci ci era un chjosu, è in u chjosu una tomba nova duv'è nimu era ancu statu intarratu; 42Par via di l'Appruntera di i Ghjudei, è parchì a tomba era vicina, missini à Ghjesù quandì dà.
