Ghjuanni 18

₁Dopu dittu cusì, Ghjesù isciti cù i discipuli, si varcheti u ghjargalu di u Cidroni, ghjunsi à un ortu, è ci intriti cù i discipuli. ₂È Ghjuda, quiddu chì u traditi, cunniscia u locu, chì Ghjesù ci era andatu à spessu cù i discipuli. ₃Cusì Ghjuda si pidda una squatra di suldati, è di guardia mandati da i capisacerdoti è da i Farusei, è và quandì dà cù lumeri, fiacculi di deda è armi. ₄Tandu Ghjesù, chì sapia tuttu ciò chì li aia da accada, isciti è li dissi: «à quali circheti?» ₅Li risposini: «à Ghjesù u Nazarenu.» Li dici: «socu eiu.» È ci era cun eddi Ghjuda, quiddu chì u tradia. ₆Quand'eddu dissi: «socu eiu.» Si tiretini in daretu è caschetini in tarra. ₇Tandu li dumandeti dinò: «à quali circheti?» Eddi dissini: «à Ghjesù u Nazarenu.» ₈Ghjesù risposi: «a vi aghju ditta, socu eiu. Aiò, sì vo' circheti à mè, lacheti chì quissi si ni andessini.» ₉Era da ch'edda vinissi cumpiita a parola ch'eddu aia dittu: «di quiddi chì tù mi ai datu ùn ni aghju persu mancu unu.» ₁₀Tandu Simon Petru, chì aia una spada, a cacceti, mineti u servu di u capisacerdoti, è li muzzeti l'arechji dritta; u servu si chjamaia Malcu. ₁₁Tandu Ghjesù dissi à Petru: «torra a spada! U caliciu ch'eddu mi hà datu u Babbu, ùn l'avariu da bia?»

₁₂Tandu a squatra di i suldati, l'ufficiali è i guardia ghjudei piddetini à Ghjesù, u lietini ₁₃è u purtetini prima ind'è Annas; era u sociaru di Caifassu, chì era capisacerdoti quiddu annu; ₁₄è Caifassu era quiddu chì aia cunsigliatu à i Ghjudei: «hè meddu ch'eddu morghi un omu solu pà u populu.»

₁₅Simon Petru è un antru discipulu suvitaiani à Ghjesù; quiddu discipulu era cunnisciutu da u capisacerdoti è intriti cù Ghjesù in a corti di u capisacerdoti, ₁₆ma Petru si ni staia fora davanti à a porta. Tandu l'altru discipulu, quiddu chì era cunnisciutu da u capisacerdoti, isciti, parleti à a purtinara è feci entra à Petru. ₁₇Tandu a zitedda chì vardaia a porta dici à Petru: «ùn saristi micca ancu tù di i discipuli di quiddu?» Petru dici: «innò.» ₁₈Ci erani quandì dà i schiavi è i guardia chì aiani fattu un focu di brusta, par via di u fretu, è si scaldaiani; è Petru staia cun eddi è si scaldaia.

₁₉Tandu u capisacerdoti feci dumandi à Ghjesù nantu à i so discipuli è u so insignamentu. ₂₀Ghjesù li risposi: «eiu aghju parlatu à palesu à u mondu, aghju sempri insignatu in a sinagoga è in u tempiu, induva eddi s'aduniscini tutti i Ghjudei, è ùn aghju dittu nudda à l'appiattu. ₂₁Chì dumandi à mè? Dumanda à quiddi chì ani intesu ciò ch'e' aghju dittu. Eddi a sani, mì, ciò ch'e aghju dittu.» ₂₂Quand'eddu dissi cusì, unu di i guardia chì era quandì dà ciaffitteti à Ghjesù, dicendu: «li rispondi cusì à u capisacerdoti?» ₂₃Ghjesù li risposi: «s'e' aghju parlatu mali, tistimunieghja di u mali; ma s'e' aghju parlatu bè, parchì mi meni?» ₂₄Tandu Annas u mandeti liatu à Caifassu, u capisacerdoti.

₂₅È Simon Petru era sempri quandì dà è si scaldaia; tandu li dissini: «ùn saristi micca ancu tù di i so discipuli?» Quiddu nigheti è dissi: «innò?» ₂₆Unu di i servi di u capisacerdoti, parenti di quiddu chì Petru li aia mozzu l'arechji, dici: «ùn t'aghju vistu in ortu cun eddu?» ₂₇Tandu Petru nigheti dinò, è ghjustu tandu un ghjaddu canteti.

₂₈Tandu da ind'è Caifassu, portani à Ghjesù in u palazzu di u guvernatori; era u fà di u ghjornu; è eddi ùn intritini micca in palazzu, par stà puri è pudè manghjà a Pasqua. ₂₉Cusì, Pilatu vensi fora à truvà li è dissi: «Di chì l'accuseti st'omu?» ₃₀Rispunditini è li dissini: «s'eddu ùn fussi unu chì faci u mali, ùn lu ti aiami missu in manu.» ₃₁Tandu Pilatu li dissi: «piddeti lu voi è ghjudicheti lu sicondu a vostra Legi.» I Ghjudei li dissini: «ma noi ùn emu drittu di fà mora à nimu.» ₃₂Era da ch'edda vinissi cumpiita a parola di Ghjesù, ch'eddu aia dittu par fà sapè di chì morti ch'eddu aia da mora. ₃₃Cusì Pilatu intriti dinò in palazzu, chjameti à Ghjesù è li dissi: «tù sè u Rè di i Ghjudei?» ₃₄Ghjesù risposi: «a dici da par tè, o a t'ani ditta l'altri di mè?» ₃₅Pilatu risposi: «soca socu ghjudeiu eiu? A to nazioni è i capisacerdoti t'ani missu in manu à mè; chì ai fattu?» ₃₆Ghjesù risposi: «u regnu meiu ùn hè d'issu mondu; s'eddu fussi statu d'issu mondu u regnu meiu, i me servi si sariani battuti par ch'e' ùn fussi micca missu in manu à i Ghjudei. Ma avà u regnu meiu ùn hè di quì.» ₃₇Tandu Pilatu li dissi: «allora sè Rè?» Ghjesù risposi: «a dici tù ch'e' socu Rè; eiu socu natu è vinutu in u mondu, da tistimunià pà a virità; à chì hè di a virità stà à senta a me boci.» ₃₈Pilatu li dissi: «è chì hè a virità?»

È dopu dittu cusì, isciti dinò à truvà i Ghjudei è li dissi: «eiu ùn aghju trovu nisuna colpa in eddu.

₃₉Ma hè a vostra tradizioni ch'e' vi libareghji à calchissia pà a Pasqua; vuleti ch'e' vi libareghji u Rè di i Ghjudei?» ₄₀Tandu briunetini è dissini: «innò, micca eddu, Barabbà.» È Barabbà era un banditu.