Actou an Ebestel 6

₁En amzer‐ze, evel ma creske an niver euz an diskibien, e savaz trouz e‐touez ar Greked a‐enep an Hebreed, abalamour ma tremenet heb rei gant aked ho lod d’ho intanvezed er pez a vije distribuet bemdez. ₂Rag‐se an daouzec abostol a c’halvaz assambles ar foul euz an diskibien, hag a lavaraz dezhe: N’e ket deread deomp leuskel a‐gostez ger Doue, evit servicha ouz an taoliou. ₃Choazit eta, breudeur, seiz den en ho touez, tud a vrud‐vad, leun euz ar Spered‐Santel hag a furnez, evit ma lakaimp anezhe er garg‐se. ₄Evidomp‐ni a gendalc’ho d’en em rei d’ar beden ha da zervich ar ger.

₅Ar c’homzou‐ze a blijaz d’an holl assamble; hag e choazjont Stefan, den leun a feiz hag euz ar Spered‐Santel, ha Philip, ha Procor, ha Nicanor, ha Timon, ha Parmenas ha Nicolas, eur prozelit euz a Antiokia; ₆hag ho frezantjont d’an ebestel, pere, goude beza pedet, a astennaz varnezhe ho daouarn.

₇Ha ger Doue a rede, hag an niver euz an diskibien a greske kalz en Jerusalem. Hag eun niver braz euz ar veleien a zente ouz ar feiz.

₈Hogen, Stefan, leun a feiz hag a nerz, a rea burzudou ha miraclou braz e touez ar bobl. ₉Mes darn euz ar sinagog a hanver sinagog an dud liberet, hag euz a hini ar Cyreneed hag an Alexandrined, ha tud euz a Cilicia ha bro an Azi, a zavaz da zisput a‐enep Stefan. ₁₀Ha na hellent ket herzel ouz ar furnez hag ar Spered dre behini e komze. ₁₁Neuze e c’hounezjont tud da lavaret: Ni hon euz klevet anezhan o lavaret gwall‐gomzou a‐enep Moises hag a‐enep Doue. ₁₂Lakaad a rejont eta ar bobl, hag ar re Ancien, hag ar Scribed da zevel; hag oc’h en em deurel varnezhan, e crogjont enhan, hag e kasjont anezhan ganthe d’ar Sanhedrin; ₁₃hag e lekejont testou faoz, pere a lavare: An den‐man na baouez da lavaret komzou a vlasphem a‐enep al leac’h santel‐man hag a‐enep al lezen. ₁₄Rag klevet hon euz anezhan o lavaret penaos Jesus, an Nazaread‐se, a zistrujo al leac’h‐man, hag a chencho an ordrenansou roet deomp gant Moises. ₁₅Hag evel m’ho doa ar re holl a oa azezet er Sanhedrin ho daou‐lagad batet varnezhan, e veljont he visach henvel ouz bisach eun eal.