I Corintied 8

₁Evit ar pez a zell an traou bet offret d’an idolou, ec’h ouzomp penaos hon euz holl an anaoudegez a gementse. Hogen an anaoudegez a laka an dud d’en em c’houeza, mes ar garantez a edifi. ₂Ha mar d’euz unan‐benag hag a sonj dezhan e oar eun dra‐benag, ne oar c’hoas netra evel ma tleer gouzout. ₃Mes mar d’euz unan‐benag hag a gar Doue, hennes a anavez Doue. ₄Dre‐ze eta, var ar pez a zell dibri traou bet offret d’an idolou, ec’h ouzomp penaos eun idol n’eo netra er bed, ha penaos n’ez euz nemed eun Doue hep‐ken. ₅Rag, petra‐benag ma’z euz en env ha var an douar lod hag a zo hanvet doueou (evel m’az euz e gwirionez meur a zoue ha meur a aotrou), ₆koulskoude ni n’hon euz nemed eun Doue hep‐ken, an Tad, euz a behini e teu an holl draou, hag ez omp bet crouet evithan; hag eun Aotrou kep‐ken, Jesus‐Christ, dre behini ema an holl draou, ha ni a zo dreizhan. ₇Mes an holl n’ho deuz ket an anaoudegez‐ze; rag beza ez euz tud, pere o credi, evel ma reont c’hoas breman, ez eo an idol eun dra‐benag, a zebr eun dra evel pa vez bet offret d’an idol; hag ho c’houstians o veza febl, a vez souillet.

₈Hogen n’eo ket ar pez a zebromp eo hon rent agreabl da Zoue; rag mar tebromp n’hon euz profit e‐bed a gement‐se; ha mar na zebromp ket, n’hon euz ive koll e‐bed. ₉Mes likit evez na zeufe al liberte‐ze hoc’h euz, da veza skouer fall d’ar re febl. ₁₀Rag, mar deu unan‐benag da velet ac’hanoud‐te, pehini ec’h euz anaoudegez, azezet ouz taol en templ an idolou, an hini a zo febl a goustians, ha na vezo‐hen ket douget da zibri euz an traou a zo bet offret d’an idolou? ₁₁Hag e vezo kollet dre da wiziegez ar breur febl, evit pehini eo marvet ar C’hrist. ₁₂Evel‐se en eur bec’hi a‐enep ar breudeur, hag oc’h offansi ho c’houstians febl, e pec’hit a‐enep ar C’hrist. ₁₃Rag‐se, mar deu ar pez a zebran da rei gwall exempl d’am breur, na zebrin mui a gig, gant aoun ne lakfen va breur da gweza er pec’hed.