CHAPITRE TRESEN 3

₁En aquéu tèms, venguè Jan-Batisto predica dins lou desert de Judèio,

₂Disènt: Fasès penitènci, qu'es proche lou reiaume de paradis.

₃Es d'éu, saubrés, que parlavo lou proufèto Isaìo, quouro disié: Voues d'aquéu que clamo dins lou desert: Alestissès la draio dóu Segnour, aplanas si draiòu.

₄Or, aquéu Jan avié'n vièsti de péu de camèu em'uno taiolo de cuer à l'entour di ren; e fasié sa vido emé de sautarello e de mèu sóuvage.

₅Em'acò de-vers éu Jerusalèn s'alandavo emai touto la Judèio, emai touto la countrado di ribo dóu Jourdan.

₆E, counfessant si pecat, tout acò'ro bateja pèr éu dins lou Jourdan.

₇Mai quand veguè'n mouloun de Farisen e de Saduciéu que venien à soun batisme, ié diguè: Raço de vipèro, quau vous a aprés à fugi davans la coulèro que vèn?

₈Fasès dounc de fru digne de penitènci.

₉E anés pas dire entre vautre: Pèr paire avèn Abram; car vous afourtisse qu'es proun fort Diéu, pèr d'aquéli clapo faire sourti de fiéu d'Abram.

₁₀Es que, deja l'an boutado, la destrau, à la racino de l'aubre. Tout aubre dounc que fai pas de bon fru, lou couparan e lou jitaran au fiò.

₁₁Iéu, vès, vous bateje dins i'aigo amor de la penitènci; mai Aquéu qu'après iéu vai veni es mai fort que iéu, e siéu pas digne de pourta si soulié: éu vous batejara dins lou Sant-Esperit e dins lou fiò.

₁₂Tèn soun drai à la man e netejara soun iero; acampara soun blad dins l'òrri, mai brulara la paio dins un fiò inamoussable.

₁₃Alor Jèsu venguè d'en Galilèio au Jourdan vers Jan, sus l'estiganço d'èstre bateja pèr éu.

₁₄Mai Jan l'escartavo, ié disènt: Es à iéu d'èstre bateja pèr vous, e me venès trouva?

₁₅Or, ié respoundeguè Jèsu: Laisso pèr aro; es ansin, dóumaci, que nous counvèn de coumpli touto justiço. E Jan lou leissè faire.

₁₆Pas pulèu bateja, Jèsu sourtiguè de l'aigo; e subran à sa visto se durbiguè lou cèu, em'acò veguè l'Esperit de Diéu que davalavo en formo de couloumbo e ié venié dessus.

₁₇E veici que dóu cèu uno voues disié: Acò's moun Fiéu bèn-ama que dins éu me coungouste.