CHAPITRE QUATOURGEN
Eici coumenço lou sermoun après la Ceno. — Jèsu vai alesti la plaço pèr si disciple. — Es la Draio, la Verita, la Vido. — Qu lou vèi éu, vèi lou Paire. — Tout demanda en soun noum. — Caratère de l'amour. — Proumesso de l'Esperit counsouladou. — Ousservacioun di coumandamen. — Lou Sant-Esperit ensignara touto causo. — Jèsu douno sa pas.
1Que noun se treboule voste cor. Vautre, cresès en Diéu, agués fe tambèn en iéu.
2Dins l'oustau de moun Paire i'a mai que d'uno estànci. S'èro pa 'nsin, vous l'auriéu di; car vau vous alesti uno plaço.
3E quouro me sarai enana, e vous aurai alesti uno plaço, retournarai, e vous prendrai emé iéu, pèr qu'aqui ounte iéu siéu, tambèn vautre fugués.
4Or, ounte iéu vau, lou sabès, e sabès la draio.
5Toumas ié diguè: Segnour, sabèn pas ounte anas; e coume pourrian counèisse la draio?
6Ié diguè Jèsu: Iéu siéu la Draio, la Verita e la Vido; degun vèn vers lou Paire, senoun pèr iéu.
7Se m'avias couneigu iéu, tambèn moun Paire, boutas, l'aurias couneigu; e bèn lèu lou couneirés, e l'avès deja vist.
8Ié venguè Felip: Segnour, fasès-nous vèire lou Paire, e nous sufis.
9Ié respoundeguè Jèsu: I'a tant de tèms que siéu emé vautre, e me couneissès pas? Felip, qu me vèi iéu, vèi tambèn lou Paire. Coume vai que disès: Fasès-nous vèire lou Paire?
10Cresès pas que iéu siéu dins lou Paire, e que lou Paire es en iéu? Li paraulo que iéu vous dise, noun es de moun sicap que li dise; mai lou Paire, qu'en iéu demoro, fai éu-meme lis obro que fau.
11Cresès pas que iéu siéu dins lou Paire, e que lou Paire es en iéu?
12Au-mens cresès-lou raport à mis obro. Veramen, veramen vous lou dise, qu crèi en iéu fara éu-meme lis obro que iéu fau, e de mai grando encaro n'en fara, pèr-ço-que m'envau vers lou Paire.
13E tout ço que demandarés au Paire en moun noum, lou farai, pèr que siegue, lou Paire, glourifica dins lou Fiéu.
14Se me demandas quaucarèn en moun noum, lou farai.
15Se m'amas, gardas mi coumandamen.
16E iéu pregarai lou Paire, e vous dounara 'n autre Cousouladou, pèr qu' éu demore emé vautre eternamen:
17L'Esperit de verita que lou mounde noun pòu recebre, estènt que lou vèi pas, e que lou counèis pas. Mai vautre, lou couneirés, pèr-ço-que restara 'mé vautre, e dins vautre éu sara.
18Noun vous leissarai ourfelin; vendrai vers vautre.
19Encaro un pau, e lou mounde me veira plus. Mai vautre, me veirés, pèr-ço-que iéu vive, e que vautre viéurés.
20En aquéu jour d'aqui, vautre couneirés que iéu siéu dins moun Paire, e vautre en iéu, e iéu en vautre.
21Quau a mi coumandamen e li gardo, aquéu-d'aqui m'amo. Or, quau m'amo sara ama de moun Paire; tambèn iéu l'amarai, e me manifestarai à-n-éu.
22Judas, noun pas l'Escariot: Segnour, dis, coume se rescontro que vous manifestarés à nautre, e noun au mounde.
23Respoundeguè Jèsu, e ié diguè: Se quaucun m'amo, gardara ma paraulo, e moun Paire l'amara, e vers éu vendren, e faren dins éu nosto demouranço.
24Quau m'amo pas, gardara pas mi paraulo. E la paraulo qu'avès ausido noun es de iéu, mai d'Aquéu que m'a manda, dóu Paire.
25Vous ai di aquéli causo, dóu tèms qu'ère emé vautre.
26Mai lou Counsouladou, lou Sant-Esperit, que lou Paire mandara en moun noum, vous ensignara touto causo, e vous remembrara tout ço que vous ai di.
27Vous laisse la pas, vous doune ma pas; noun es coume la douno lou mounde que iéu vous la doune. Que noun se treboule voste cor, e que prengue pas pòu.
28Avès entendu que vous ai di: M'envau, e tourne vers vautre. Se m'amavias, sarias dins lou countentamen de ço que m'envau vers lou Paire, pèr-ço-que lou Paire es mai grand que iéu.
29E aro vous l'ai di, de davans que la causo arribe: ansin, se 'n-cop sara arribado, lou creirés.
30Vous parlarai plus gaire; car vai veni lou prince d'aquest mounde, e sus iéu pamens n'a ges de dre;
31Mai vèn pèr que sache lou mounde qu'ame lou Paire, e que, coume m'a ourdouna lou Paire, ansin fau… Aubouras-vous, sourten d'eici.
