PSALMI 114

Ἠγάπησα, ὅτι εἰσακούσεται κύριος

τῆς φωνῆς τῆς δεήσεώς μου,

₂ὅτι ἔκλινεν τὸ οὖς αὐτοῦ ἐμοί,

καὶ ἐν ταῖς ἡμέραις μου ἐπικαλέσομαι.

₃περιέσχον με ὠδῖνες θανάτου,

κίνδυνοι ᾅδου εὕροσάν με·

θλῖψιν καὶ ὀδύνην εὗρον.

₄καὶ τὸ ὄνομα κυρίου ἐπεκαλεσάμην

Ὦ κύριε, ῥῦσαι τὴν ψυχήν μου.

₅ἐλεήμων ὁ κύριος καὶ δίκαιος,

καὶ ὁ θεὸς ἡμῶν ἐλεᾷ.

₆φυλάσσων τὰ νήπια ὁ κύριος·

ἐταπεινώθην, καὶ ἔσωσέν με.

₇ἐπίστρεψον, ἡ ψυχή μου, εἰς τὴν ἀνάπαυσίν σου,

ὅτι κύριος εὐηργέτησέν σε,

₈ὅτι ἐξείλατο τὴν ψυχήν μου ἐκ θανάτου,

τοὺς ὀφθαλμούς μου ἀπὸ δακρύων

καὶ τοὺς πόδας μου ἀπὸ ὀλισθήματος.

₉εὐαρεστήσω ἐναντίον κυρίου ἐν χώρᾳ ζώντων.